AKP ភ្នំពេញ ថ្ងៃទី១៨ ខែកុម្ភៈ ឆ្នាំ២០២៥ -- មន្ត្រីសេដ្ឋកិច្ចជាន់ខ្ពស់អ៊ីរ៉ង់បាននិយាយថា ប្រទេសអ៊ីរ៉ង់គ្រោងនឹងបង្កើនការនាំចេញពីតំបន់ពាណិជ្ជកម្មសេរីរបស់ខ្លួនដល់ ២ប៊ីលានដុល្លារអាម៉េរិកត្រឹមខែមីនា ឆ្នាំ២០២៦។

លេខាធិការនៃក្រុមប្រឹក្សាជាន់ខ្ពស់តំបន់សេរីរបស់ប្រទេសអ៊ីរ៉ង់ លោករ៉េហ្សា ម៉ាស្រួរ (Reza Masrour) បានធ្វើការកត់សម្គាល់នៅក្នុងសន្និសីទសារព័ត៌មានមួយក្នុងរដ្ឋធានីតេអេរ៉ង់ ប្រទេសអ៊ីរ៉ង់ ខណៈដែលលោកបានរៀបរាប់លម្អិតអំពីផែនការដែលបង្កើតឡើងដោយរដ្ឋាភិបាល និងក្រុមប្រឹក្សាដើម្បីជំរុញការនាំចេញពីតំបន់ពាណិជ្ជកម្មសេរីក្នុងស្រុកនៅឆ្នាំប្រតិទិនអ៊ីរ៉ង់ដែលនឹងចាប់ផ្តើមនៅថ្ងៃទី២១ ខែមីនា ឆ្នាំ២០២៥។

លោកបានដាក់តម្លៃនៃការនាំចេញពីតំបន់សេរីរបស់អ៊ីរ៉ង់ក្នុងរយៈពេល១០ខែចុងក្រោយនេះ គឺជិតមួយប៊ីលានដុល្លារអាម៉េរិក ដោយលោកបានកត់សម្គាល់ថា ការនាំចេញទៅក្រៅប្រទេសពីតំបន់សេដ្ឋកិច្ចពិសេសរបស់ប្រទេសនេះបានកើនឡើងដល់ ១០ប៊ីលានដុល្លារអាម៉េរិកក្នុងរយៈពេលដូចគ្នានេះ។

លោកបាននិយាយថា ដើម្បីជំរុញការនាំចេញបន្ថែមទៀត រដ្ឋាភិបាលបានដាក់ចេញនូវការលើកទឹកចិត្តថ្មីសម្រាប់អង្គភាពផលិតកម្មនៅក្នុងតំបន់ពាណិជ្ជកម្មសេរី និងកំពុងធ្វើការលើការបង្កើតក្រុមហ៊ុនដែលគ្រប់គ្រងការនាំចេញនៅក្នុងតំបន់ទាំងនេះ។

លោក ម៉ាស្រួរ បាននិយាយថា ការវិនិយោគបរទេសមានចំនួន១២៥លានអឺរ៉ូ និង ១៣១ លានអឺរ៉ូ (ប្រហែល ១៣១លានដុល្លារអាម៉េរិកនិង ១៣៧លានដុល្លារអាម៉េរិក) នៅក្នុងតំបន់ពាណិជ្ជកម្មសេរីរបស់ប្រទេស និងតំបន់សេដ្ឋកិច្ចពិសេសរៀងៗខ្លួនក្នុងរយៈពេល ១០ខែកន្លងមកដោយលោកបានសង្កត់ធ្ងន់ថា កំណែទម្រង់បទប្បញ្ញត្តិ និងការលើកទឹកចិត្តអ្នកវិនិយោគថ្មីកំពុងត្រូវបានផ្តល់អាទិភាពដើម្បីទាក់ទាញទុនបរទេសកាន់តែច្រើននៅឆ្នាំក្រោយ៕

ដោយ៖ មូល មិនា (ប្រភព៖ ភីបផលដេលី)