AKP ភ្នំពេញ ថ្ងៃទី១៧ ខែកុម្ភៈ ឆ្នាំ២០២៥ -- ប្រព័ន្ធផ្សព្វផ្សាយរដ្ឋរបស់កូរ៉េខាងជើងបានរាយការណ៍ថា ប្រទេសកូរ៉េខាងជើងបានអះអាងជាថ្មីនូវការប្តេជ្ញាចិត្តរបស់ខ្លួនក្នុងការពង្រឹងសមត្ថភាពការពាររបស់ខ្លួនដើម្បីទប់ស្កាត់នូវអ្វីដែលខ្លួនហៅថា «ការប៉ុនប៉ងបង្កហេតុ» ដោយប្រទេសកូរ៉េខាងត្បូង និងសហរដ្ឋអាមេរិក។

សេចក្តីថ្លែងការណ៍របស់ប្រធានគោលនយោបាយការពារជាតិរបស់ទីក្រុងព្យុងយ៉ាង ដែលចេញផ្សាយដោយទីភ្នាក់ងារសារព័ត៌មានកណ្តាលកូរ៉េ (KCNA) ថា «ការពង្រឹងសមត្ថភាពការពាររបស់ប្រទេសកូរ៉េខាងជើងគឺជាតម្រូវការចាំបាច់សម្រាប់ការរារាំងដល់ការប៉ុនប៉ងបង្កហេតុផ្សេងៗដែលមិនធ្លាប់មានរបស់គូប្រជែង និងធានាសុវត្ថិភាពរបស់រដ្ឋ»។

សេចក្តីថ្លែងការណ៍នេះត្រូវបានចេញផ្សាយមួយថ្ងៃ បន្ទាប់ពីមេបញ្ជាការនៃបញ្ជាការភាគខាងជើង សហរដ្ឋអាមេរិក លោក ហ្គ្រេហ្គោរី ហ្គីលឡូត (Gregory Guillot) បាននិយាយនៅចំពោះមុខគណៈកម្មាធិការសេវាកម្មប្រដាប់អាវុធព្រឹទ្ធសភាសហរដ្ឋអាមេរិកថា មីស៊ីលផ្លោងអន្តរទ្វីប(ICBM) ថ្មីបំផុតរបស់ប្រទេសកូរ៉េខាងជើង អាចគំរាមកំហែងដោយផ្ទាល់ដល់ដីគោករបស់សហរដ្ឋអាមេរិក និងគ្របដណ្តប់លើការការពាររបស់ខ្លួន។លោកបាននិយាយថា ទីក្រុងព្យុងយ៉ាងអាចនឹងឆ្ពោះទៅរកការផលិតមីស៊ីលICBMs ថ្មីដែលមានសមត្ថភាពវាយប្រហារភាគខាងជើង សហរដ្ឋអាមេរិក ។

មន្ត្រីការពារជាតិរបស់ទីក្រុងព្យុងយ៉ាងបានថ្កោលទោសការលើកឡើងរបស់មេបញ្ជាការនៃបញ្ជាការភាគខាងជើង សហរដ្ឋអាមេរិកដោយមន្ត្រីរូបនោះបានចោទប្រកាន់សហរដ្ឋអាមេរិកថាបានចោទប្រកាន់ប្រទេសកូរ៉េខាងជើងដោយក្លែងបន្លំពី «ការគំរាមកំហែង» ដែល «មិនធ្លាប់មាន»។

មន្ត្រីរូបនេះបាននិយាយថា «សហរដ្ឋអាមេរិកពណ៌នាថានេះជា «ការគំរាមកំហែង» គ្រាន់តែបង្ហាញថាខ្លួនជាអរិភាពចំពោះប្រទេសកូរ៉េខាងជើង»ដោយលោកបានកត់សម្គាល់ថា សហរដ្ឋអាមេរិកកំពុងព្យាយាមបង្ហាញអំពីភាពត្រឹមត្រូវនៃ «មហិច្ឆតាយោធាបែបផ្សងព្រេង» របស់ខ្លួន។លោកបានបន្ថែមថា «នេះគ្រាន់តែជាសិទ្ធិការពារខ្លួនរបស់រដ្ឋអធិបតេយ្យមួយក្នុងការអភិវឌ្ឍសមត្ថភាពការពារខ្លួនជាលំដាប់»៕

ដោយ៖ មូល មិនា (ប្រភព៖ យ៉ុនហាប់)