AKP កំពង់ធំ ថ្ងៃទី១៦ ខែកុម្ភៈ ឆ្នាំ២០២៥--

ឯកឧត្តមបណ្ឌិត សួង ណយ អនុប្រធានគណៈកម្មការជាតិជំរុញចលនាភូមិ១ ផលិតផល១ និងជាក្រុមការងារអភិវឌ្ឍន៍សេដ្ឋកិច្ចមូលដ្ឋាន និងទីផ្សារផលិតផលខ្មែរ លោក ជា វ៉ាន់ចាន់ អភិបាលរងខេត្តកំពង់ធំ សមាជិកភូមិ១ផលិតផល១ខេត្តកំពង់ធំ អ្នកកែច្នៃថ្មី សែឡូ (slo) ដំឡូងមី រោងម៉ាស៊ីនកិនស្រូវ ប្រធានសហគមន៍កសិកម្ម និងសិប្បករ បានអញ្ជើញចូលរួមក្នុងសិក្ខាសាលាស្តីពីដំណោះស្រាយហិរញ្ញវត្ថុ ក្នុងវិស័យកសិកម្ម សិប្បកម្ម និងពាណិជ្ជកម្ម ប្រមាណ១៦៥នាក់ កាលពីថ្ងៃទី១៥ ខែកុម្ភៈ ឆ្នាំ២០២៥ នៅសាលប្រជុំសាលាខេត្តកំពង់ធំ។ 

ក្នុងឱកាសនោះ លោក ជា វ៉ាន់ចាន់ បានលើកឡើងថា ខេត្តកំពង់ធំមានអំណោយផលសម្រាប់ដំណាំ កសិឧស្សាហកម្ម ស្ថានភាពនេះបង្ហាញឱ្យឃើញថា ប្រជាពលរដ្ឋភាគច្រើនបំផុតមានមុខរបរចម្បង ក្នុងវិស័យកសិកម្ម។ សហគ្រាស ឧស្សាហកម្ម និងសិប្បកម្មសរុប៣១១៨ មូលដ្ឋានកំពុងដំណើរការ មានដើមទុនសរុបប្រមាណ១២៥៣៥១៤៥១ ដុល្លារអាមេរិក ហើយបានប្រើប្រាស់កម្លាំងពលកម្មសរុប១១៣០០នាក់ (ស្រី៤៦២២នាក់)។ ខេត្តកំពង់ធំមានទីតាំងលក់ទំនិញ និងសេវាកម្មសរុប៩៥០៧ទីតាំងដែលភាគច្រើន មានទ្រង់ទ្រាយតូចជាលក្ខណៈគ្រួសារ។ ឯកឧត្តមបណ្ឌិត សួង ណយ បានមានប្រសាសន៍ថា ក្រុមការងារអភិវឌ្ឍន៍សេដ្ឋកិច្ចមូលដ្ឋាន និងទីផ្សារផលិតផលខ្មែរខេត្តកំពង់ធំ បានសិក្សាស្វែងយល់អំពីផលិតផលសក្តានុពល បញ្ហាប្រឈម និងសំណូមពរ។ ក្រុង/ស្រុកទាំង៩ នៃខេត្តកំពង់ធំ សុទ្ធតែបានសំណូមពរឱ្យជួយដោះស្រាយបញ្ហាឥណទានទាំងអស់។ 

អាស្រ័យហេតុនេះទើបក្រុមការងារ រៀបចំសិក្ខាសាលាស្តីពីដំណោះស្រាយហិរញ្ញវត្ថុ ក្នុងវិស័យកសិកម្មនិងសិប្បកម្មដោយ អញ្ជើញសាខាធនាគារ និងស្ថាប័នហិរញ្ញវត្ថុមួយចំនួន មកធ្វើបទបង្ហាញ និងជជែកជាក្រុមដើម្បីដោះស្រាយបញ្ហាប្រឈម ទាំងនោះ ដែលផ្តោតលើ ហិរញ្ញប្បទាន Loan ឬ លទ្ធភាពទទួលបានហិរញ្ញវត្ថុ Access to Finance រួមមាន៖ ១. ឥណទានមានរយៈពេលកំណត់ Term Loan (TL) ២. ឥណទានវិបារូបន៍ Overdraft (OD) ៣. ការផ្តល់ប្រាក់កម្ចីឡើងវិញ Loan Refinance ៤. ការប្តូរលក្ខខណ្ឌឥណទាន Restructuring Loan។ 

ឯកឧត្តមបណ្ឌិតបានថ្លែងថា ក្រុមការងារអភិវឌ្ឍន៍សេដ្ឋកិច្ចមូលដ្ឋាន និងទីផ្សារផលិតផលខ្មែរខេត្តកំពង់ធំ បានដាក់គោលការណ៍ចំនួន៨៖ ១. បង្កើតផ្សារកសិករផ្សារចុងសប្តាហ៍ ផ្សាររាត្រី បណ្ដុំអ្នកផលិត សួនកសិឧស្សាហកម្ម កសិទេសចរណ៍។ ២. ដើម្បីបង្កើតទី១បានត្រូវមាន ផលិតផលសក្ដានុពល វត្ថុធាតុដើម អភិវឌ្ឍធនធានមនុស្ស អភិវឌ្ឍន៍ផលិតផល។ ៣. ដើម្បីបានទី២ ត្រូវមានថវិការ ត្រូវជួបស្ថាប័នហិរញ្ញវត្ថុដើម្បីដោះស្រាយពង្រីកអាជីវកម្ម។ ៤. បានថវិការ ត្រូវខ្ចីគេ ត្រូវចូលហ៊ុនគ្នា ឬត្រូវសុំគេ។ ៥. បើខ្ចីគេ ឬចូលហ៊ុន ត្រូវសងញេវិញ។ ៦. ដើម្បីសងគេវិញបាន ត្រូវរកប្រាក់ចំណេញ ដោយផលិតច្រើន ចំណាយតិច បើលក់អត់ដាច់ត្រូវចេះកែច្នៃ វេចខ្ចប់ រកទីផ្សារ។ ៧. ដើម្បីរកទីផ្សារ សេវាកម្មល្អ ផលិតផលមាន សោភ័ណភាព សុវត្ថិភាពនិរន្តរភាព សក្ដានុពល តម្លៃសមរម្យ និង៨. ដើម្បីទទួលបានទី៦ និងទី៧ ត្រួវរួមគ្នាជា សហគមន៍ សហគ្រាស ក្រុមហ៊ុន បណ្ដុំផលិត អភិវឌ្ឍធនធានមនុស្សតាមជំនាញដែលមានស្រាប់នៅនឹងកន្លែង៕ 

ដោយ ស៊ុម វណ្ណា