AKP កំពង់ធំ ថ្ងៃទី១៦ ខែកុម្ភៈ ឆ្នាំ២០២៥-- 

នៅស្នាក់ការកណ្ដាលគណបក្សប្រជាជនកម្ពុជាខេត្តកំពង់ធំ កាលពីថ្ងៃទី១៥ ខែកុម្ភៈ ឆ្នាំ២០២៥ ឯកឧត្តម នួន ផារ័ត្ន ប្រធានគណបក្សប្រជាជនកម្ពុជាខេត្តកំពង់ធំ ដឹកនាំកិច្ចប្រជុំប្រចាំខែរបស់គណៈកម្មាធិការគណបក្សខេត្ត និងផ្សព្វផ្សាយលទ្ធផលសន្និបាតគណៈកម្មាធិការកណ្តាលលើកទី៤៥ អាណត្តិទី៥ របស់គណបក្សប្រជាជនកម្ពុជាជូនមន្ត្រីគណបក្សគ្រប់ថ្នាក់គ្រប់ផ្នែក និងពង្រឹងសាមគ្គីភាពឯកភាពផ្ទៃក្នុង លើកកម្ពស់ប្រសិទ្ធភាពនៃការដឹកនាំរបស់គណបក្សដែលប្រកាន់យកការការពារ និងលើកស្ទួយផលប្រយោជន៍របស់ប្រជាជនជាធំ។ 

ឯកឧត្តម នួន ផារ័ត្ន មានប្រសាសន៍លើកឡើងអំពីគោលការណ៍តួនាទី ភារកិច្ចសិទ្ធិ រចនាសម្ព័ន្ធអង្គការចាត់តាំង និងរបៀបរបបធ្វើការងាររបស់គណៈកម្មាធិការគណបក្សមូលដ្ឋាន ឃុំ សង្កាត់ ក្រុង ស្រុក និងបន្តពង្រឹងសាមគ្គីភាពឯកភាពផ្ទៃក្នុងឱ្យបានរឹងមាំដែលជាកត្តាសំខាន់បំផុតរបស់គណបក្ស ក្នុងការអនុវត្តគោលនយោបាយរបស់គណបក្សថែរក្សាសន្តិភាព ពង្រឹងលទ្ធិប្រជាធិបតេយ្យ និងបង្កើតសមិទ្ធផលធំៗ ថ្មីៗបន្ថែមទៀតក្នុងការអភិវឌ្ឍជាតិមាតុភូមិកម្ពុជា។ 

ឯកឧត្តមបានក្រើនរំលឹកដល់ប្រធានគណបក្សគ្រប់ថ្នាក់ គ្រប់ផ្នែកត្រូវតែប្រព្រឹត្តតែអំពើល្អចុះជួបជាមួយប្រជាពលរដ្ឋឱ្យញឹកញាប់ និងត្រូវខិតខំកសាងសមាជិកគណបក្ស ស្របតាមគោលការណ៍ រក្សាចាស់បង្កើតថ្មីព្រមទាំងមានបើកវគ្គបណ្តុះបណ្តាលអំពីគោលនយោបាយរបស់គណបក្សដល់យុវជនសមាជិកបក្សជាបន្តបន្ទាប់ ដើម្បីបង្កើនសមត្ថភាពយុវជនវ័យក្មេងរបស់គណបក្ស ជាសមាជិកពោរពេញទៅដោយធនធានសមត្ថភាព ហើយក៏ជាអ្នកបន្តវេនសម្រាប់គណបក្សប្រជាជនកម្ពុជាផងដែរ។ 

ក្នុងឱកាសនោះ ឯកឧត្តមបានគូសបញ្ជាក់អំពីកិច្ចខិតខំប្រឹងប្រែងរបស់រាជរដ្ឋាភិបាល និងប្រធានគណបក្សប្រជាជនកម្ពុជា ដឹកនាំដោយសម្តេចអគ្គមហាសេនាបតីតេជោ ហ៊ុន សែន បានធ្វើឱ្យប្រទេសជាតិមានសុខសន្តិភាពមានស្ថិរភាពនយោបាយមានការអភិវឌ្ឍលើគ្រប់វិស័យ ជាពិសេសបានគ្រប់គ្រងនូវស្ថានភាពនៃវិបត្តិកូវីដ-១៩ បានយ៉ាងល្អប្រសើរ ជាពិសេស អនុវត្តកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះ ក្នុងអំឡុងពេលប្រយុទ្ធនឹងជំងឺកូវីដ-១៩ និងអនុវត្តកម្មវិធីឧបត្ថម្ភស្រ្តីមានផ្ទៃពោះ និងកុមារអាយុក្រោម២ឆ្នាំនៃគ្រួសារក្រីក្រផងដែរ៕

ដោយ ស៊ុម វណ្ណា