AKP ភ្នំពេញ ថ្ងៃទី១៤ ខែកុម្ភៈ ឆ្នាំ២០២៥ -- ក្រសួងឧស្សាហកម្មរបស់ទីក្រុងសេអ៊ូលបាននិយាយកាលពីថ្ងៃព្រហស្បតិ៍ថា អនុរដ្ឋមន្ត្រីពាណិជ្ជកម្មកូរ៉េខាងត្បូងនឹងធ្វើទស្សនកិច្ចនៅទីក្រុងវ៉ាស៊ីនតោននៅសប្តាហ៍ក្រោយសម្រាប់កិច្ចពិភាក្សាស្តីពីការផ្លាស់ប្តូរគោលនយោបាយពាណិជ្ជកម្មរបស់សហរដ្ឋអាមេរិក រួមទាំងពន្ធថ្មីលើការនាំចូលដែកថែប និងអាលុយមីញ៉ូម។

យោងតាមក្រសួងពាណិជ្ជកម្ម ឧស្សាហកម្ម និងថាមពល បានឱ្យដឹងថា អនុរដ្ឋមន្ត្រីក្រសួងពាណិជ្ជកម្ម លោកស្រី ផាក ជុងវ៉ុន (Park Jong-won)នឹងជួបជាមួយមន្ត្រីមកពីក្រសួងពាណិជ្ជកម្មសហរដ្ឋអាមេរិក និងមន្រ្ដីតំណាងក្រសួងពាណិជ្ជកម្មសហរដ្ឋអាមេរិកនៅទីក្រុងវ៉ាស៊ីនតោន នៅថ្ងៃចន្ទ។

លោកស្រី ផាក នឹង​ក្លាយ​ជា​មន្ត្រី​ពាណិជ្ជកម្ម​ជាន់​ខ្ពស់​ដំបូង​គេ​​ក្នុងការធ្វើ​ទស្សនកិច្ច​ជា​ផ្លូវ​ការ​នៅ​សហរដ្ឋ​អាមេរិក ​ចាប់​តាំង​ពី​លោក​ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) ចូល​កាន់​តំណែង។

នៅក្នុងកិច្ចប្រជុំដែលបានគ្រោងទុក លោកស្រី ផាក ត្រូវបានគេរំពឹងថានឹងបង្ហាញពីក្តីកង្វល់របស់ទីក្រុងសេអ៊ូលចំពោះចំណាត់ការនាពេលថ្មីៗនេះរបស់រដ្ឋាភិបាលសហរដ្ឋអាមេរិកក្នុងការដាក់ពន្ធលើទំនិញផ្សេងៗពីប្រទេសផ្សេងៗ ជាពិសេសពន្ធ ២៥% លើការនាំចូលដែកថែប និងអាលុយមីញ៉ូមទាំងអស់ដែលត្រូវបានកំណត់ថានឹងដាក់នៅថ្ងៃទី១២ ខែមីនា។

កាតព្វកិច្ចថ្មីរបស់សហរដ្ឋអាមេរិកត្រូវបានគេរំពឹងថានឹងធ្វើឱ្យបញ្ហាប្រឈមដែលមានស្រាប់សម្រាប់ឧស្សាហកម្មដែកថែបកាន់តែអាក្រក់ហើយថែមទាំងមានឥទ្ធិពលលើឧស្សាហកម្មសំខាន់ៗផ្សេងទៀតដូចជារថយន្ត និងឧបករណ៍ប្រើប្រាស់ក្នុងផ្ទះ។

លោកស្រី ផាក ក៏ទំនងជានឹងរៀបចំឱ្យមានដំណើរទស្សនកិច្ចរបស់រដ្ឋមន្ត្រីឧស្សាហកម្មលោក អាន ដុកហ្គន់ (Ahn Duk-geun) ទៅកាន់សហរដ្ឋអាមេរិកនាពេលខាងមុខនេះ។

លោក អាន បានទៅបំពេញទស្សនកិច្ចនៅវ៉ាស៊ីនតោនកាលពីដើមខែមុន មុនពេលចូលកាន់តំណែងរបស់លោក ត្រាំ ដើម្បីពិភាក្សាអំពីកិច្ចសហប្រតិបត្តិការសេដ្ឋកិច្ចទ្វេភាគីជាមួយមន្ត្រីសភាសហរដ្ឋអាមេរិក៕

ដោយ៖ មូល មិនា (ប្រភព៖ យ៉ុនហាប់)