AKP ភ្នំពេញ ថ្ងៃទី១៤ ខែកុម្ភៈ ឆ្នាំ២០២៥ -- ក្រុមហ៊ុនហុងដា ម៉ូទ័រ (Honda Motor Co.) និងក្រុមហ៊ុននីសសាន់ ម៉ូទ័រ (Nissan Motor Co.) កាលពីថ្ងៃព្រហស្បតិ៍បានប្រកាសពីការសម្រេចចិត្តបញ្ចប់ការពិភាក្សាលើការរួមបញ្ចូលគ្នាដ៏មានសក្តានុពលមួយ ដែលនាំមកនូវការរៀបចំរចនាសម្ព័ន្ធឡើងវិញដោយអាចបង្កើតក្រុមរថយន្តដ៏ធំបំផុតមួយរបស់ពិភពលោក។

ក្រុមហ៊ុនទាំងពីរបានបើកកិច្ចប្រជុំក្រុមប្រឹក្សាភិបាលកាលពីថ្ងៃព្រហស្បតិ៍ ជាកន្លែងដែលភាគីទាំងពីរបានយល់ព្រមដកកិច្ចព្រមព្រៀងជាមូលដ្ឋានដែលបានចុះហត្ថលេខាក្នុងខែធ្នូ ឆ្នាំ២០២៤ និងបញ្ចប់ការពិភាក្សាបញ្ចូលគ្នាជាផ្លូវការ។

ក្រុមហ៊ុន Nissan បាននិយាយនៅក្នុងសេចក្តីថ្លែងការណ៍មួយនៅលើគេហទំព័ររបស់ខ្លួនថា នៅក្នុងបរិយាកាសទីផ្សារផ្លាស់ប្តូរយ៉ាងឆាប់រហ័សក្នុងយុគសម័យអគ្គីសនី ការផ្តល់អាទិភាពដល់ល្បឿននៃការសម្រេចចិត្ត និងការអនុវត្តវិធានការគ្រប់គ្រងនឹងធ្វើឱ្យវាកាន់តែសមស្របក្នុងការបោះបង់ចោលការរួមបញ្ចូលគ្នានៅពេលនេះ។

ក្រុមហ៊ុនទាំងពីរបាននិយាយនៅក្នុងសេចក្តីថ្លែងការណ៍ដាច់ដោយឡែកពីគ្នាថា ដំណើរឆ្ពោះទៅមុខ ក្រុមហ៊ុននឹងបន្តសហការក្នុងក្របខ័ណ្ឌនៃអនុស្សរណៈនៃភាពជាដៃគូយុទ្ធសាស្ត្រ។

ក្រុមហ៊ុន Honda នឹង​ធ្វើ​សន្និសីទ​សារព័ត៌មាន​អនឡាញ​នៅ​ម៉ោង៤:៥០នាទីរសៀល (ម៉ោងក្នុងស្រុក) ទាក់ទងនឹងព័ត៌មានលម្អិតនៃការសម្រេចចិត្តនេះ។

ក្រុមហ៊ុនទាំងពីរដំបូងផ្តោតលើការបង្កើតក្រុមហ៊ុនកាន់កាប់ដែលនឹងត្រួតពិនិត្យម៉ាកយីហោទាំងពីរ ប៉ុន្តែការចរចារបានជាប់គាំងលើរចនាសម្ព័ន្ធភាគហ៊ុន ខណៈដែលភាពតានតឹងបានកើនឡើងនៅពេលដែលក្រុមហ៊ុនHonda បានស្នើបង្កើតក្រុមហ៊ុនបុត្រសម្ព័ន្ធរបស់ខ្លួន តែក្រុមហ៊ុន Nissan ជំទាស់យ៉ាងខ្លាំង៕

ដោយ៖ មូល មិនា (ប្រភព៖ ស៊ីនហួ)