កិច្ចប្រជុំស្ដីពីការបំពេញបន្ថែមមាត្រា៥ មាត្រា៣៧នៃអនុក្រឹត្យលេខ១២អនក្រ.បក ស្ដីពីឯកសណ្ឋាន ផ្លាកសញ្ញា និងទង់ជ័យនៃកងយោពលខេមរភូមិន្ទ
AKP ភ្នំពេញ ថ្ងៃទី១១ ខែកុម្ភៈ ឆ្នាំ២០២៥-- គណៈកម្មការកែសម្រួលព្រះរាជក្រឹត្យ អនុក្រឹត្យ ស្ដីពីឯកសណ្ឋានកងយោពលខេមរភូមិន្ទ បានបើកកិច្ចប្រជុំស្ដីពីការបំពេញបន្ថែម មាត្រា៥ មាត្រា៣៧ នៃអនុក្រឹត្យលេខ១២ អនក្រ.បក ចុះថ្ងៃទី០១ ខែកុម្ភៈ ឆ្នាំ២០១៧ ស្ដីពីឯកសណ្ឋាន ផ្លាកសញ្ញា និងទង់ជ័យនៃកងយោពលខេមរភូមិន្ទ និងឆ្លងប្រកាសស្ដីពីការរៀបចំស្លាកសញ្ញាសម្គាល់របស់អង្គភាពមួយចំនួន ក្រោមអធិបតីភាព ឯកឧត្ដម នាយឧត្ដមសេនីយ៍ ចាយ សាំងយុន រដ្ឋលេខាធិការប្រចាំការក្រសួងការពារជាតិ និងជាប្រធានគណៈកម្មការកែសម្រួលព្រះរាជក្រឹត្យ អនុក្រឹត្យស្ដីពីឯកសណ្ឋានកងយោពលខេមរភូមិន្ទ។

ឯកឧត្តម នាយឧត្តមសេនីយ៍ ចាយ សាំងយុន បានមានប្រសាសន៍កាលពីថ្ងៃទី១០ ខែកុម្ភៈ ឆ្នាំ២០២៥ ថា គណៈកម្មការកែសម្រួលព្រះរាជក្រឹត្យ អនុក្រឹត្យស្ដីពីឯកសណ្ឋានកងយោធពលខេមរភូមិន្ទ និងដំណើរការប្រជុំឆ្លងប្រកាសស្ដីពីការរៀបចំស្លាកសញ្ញាសម្គាល់នាយកដ្ឋានហិរញ្ញវត្ថុនៃអគ្គនាយកដ្ឋានភ័ស្តុភារ ហិរញ្ញវត្ថុ នាយកដ្ឋានភូមិសាស្ត្រ និងនាយកដ្ឋានអធិការកិច្ច ក្រសួងការពារជាតិ និងប្រកាសស្ដីពីការរៀបចំស្លាកសញ្ញាសម្គាល់ទីចាត់ការចលនូបឋម ទីចាត់ការការពារគីមីសាស្ត្រ វិទ្យាស្ថានបញ្ជាការសេនាធិការ និងវិទ្យាស្ថាននាយទាហានចម្រុះ ចំណុះអគ្គបញ្ជាការដ្ឋាននៃកងយោធពលខេមរភូមិន្ទ។
កិច្ចប្រជុំបានពិភាក្សាគ្នាយ៉ាងផុលផុស ដោយមានការចូលរួម និងការពារពីសំណាក់អង្គភាពសាមី និងការចូលរួមមតិកែលម្អ ក្នុងន័យស្ថាបនា ទាំងខ្លឹមសារ និងរូបភាពពីសំណាក់ថ្នាក់ដឹកនាំក្រសួងការពារជាតិ ថ្នាក់ដឹកនាំអគ្គមេបញ្ជាការ កងយោធពលខេមរភូមិន្ទ និងអង្គភាពពាក់ព័ន្ធ។ ចំពោះស្លាកសញ្ញាអង្គភាពខ្លះ ដែលគណៈកម្មការមិនទាន់សម្រេចឯកភាពទទួលយកបាន គណៈធិបតីបានសម្រេចបញ្ជូនត្រឡប់ទៅអង្គភាពដើមឲ្យរៀបចំកែសម្រួលជាថ្មីឡើងវិញ។

ឯកឧត្តម នាយឧត្តមសេនីយ៍ ចាយ សាំងយុន រដ្ឋលេខាធិការប្រចាំការក្រសួងការពារជាតិ និងជាប្រធានគណៈកម្មការកែសម្រួលព្រះរាជក្រឹត្យ អនុក្រឹត្យស្ដីពី ឯកសណ្ឋានកងយោធពលខេមរភូមិន្ទ បានប្រគល់ភារកិច្ចជូនឯកឧត្តម ឧត្តមសេនីយ៍ទោ អ៊ុក សារឹម នាយលេខាធិការដ្ឋាន សេនាធិការចម្រុះ អគ្គបញ្ជាការដ្ឋាន រៀបចំកែសម្រួលលទ្ធផលសរុប ដើម្បីធ្វើរបាយការណ៍ជូន ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ពិនិត្យ ពិចារណាសម្រេច។
គួរបញ្ជាក់ថា ការរៀបចំកែសម្រួលអនុក្រឹត្យស្ដីពីឯកសណ្ឋាន ស្លាកសញ្ញា និងទង់ជ័យនៃកងយោធពលខេមរភូមិន្ទកំពុងត្រូវបានគណៈកម្មការបន្តរៀបចំចងក្រងឡើងវិញជាបន្តបន្ទាប់ ផ្អែកតាមការបញ្ជូនឯកសារពីអង្គភាពសាមី៕
ដោយ សំ សាម៉ន





