AKP កំពង់ធំ ថ្ងៃទី១១ ខែកុម្ភៈ ឆ្នាំ២០២៥-- លោកជំទាវ ហ៊ូ សាមិត្ត រដ្ឋលេខាធិការក្រសួងកិច្ចការនារី តំណាងលោកជំទាវ អ៊ឹង កន្ថាផាវី រដ្ឋមន្ត្រីក្រសួងកិច្ចការនារី បានអញ្ជើញជាអធិបតីភាពក្នុងពិធីបើកសិក្ខាសាលាស្ដីពីការពិគ្រោះយោបល់ និងប្រមូលធាតុចូលដើម្បីរៀបចំផែនការសកម្មភាពជាតិស្ដីពីការបង្ការទប់ស្កាត់អាពាហ៍ពិពាហ៍នៅវ័យក្មេង និងការមានផ្ទៃពោះនៅវ័យជំទង់ (ឆ្នាំ២០២៤-២០២៨) ត្រូវបានរៀបចំឡើងដោយក្រសួងកិច្ចការនារីឧបត្ថម្ភគាំទ្រដោយអង្គការភ្លែនអន្តរជាតិកម្ពុជា កាលពីថ្ងៃទី១០ ខែកុម្ភៈ ឆ្នាំ២០២៥ ដែលរៀបចំឡើងនៅសណ្ឋាគាររ៉ូយ៉ាល់កំពង់ធំក្រុងស្ទឹងសែន ខេត្តកំពង់ធំ ដោយមានការអញ្ជើញចូលរួមពីលោកជំទាវ ស៊ឹម សុវណ្ណារិទ្ធ សមាជិកាក្រុមប្រឹក្សាខេត្ត និងជាប្រធានគ.ក.ស.កខេត្តកំពង់ធំ លោក រ័ត្ន តារាពិសួគ៌ នាយកកម្មវិធីភាពជាដៃគូ និងជាតំណាងអង្គការភ្លែនអន្តរជាតិកម្ពុជា ដែលមានសមាសភាពចូលរួមចំនួន៦៥នាក់ ជាតំណាងមន្ទីរពាក់ព័ន្ធសំខាន់ៗមកពីខេត្តចំនួន៩រួមមានខេត្តសៀមរាប ព្រះវិហារ ស្ទឹងត្រែង ក្រចេះ មណ្ឌលគិរី រតនគិរី ត្បូងឃ្មុំ កំពង់ចាម និងខេត្តកំពង់ធំ។

សិក្ខាសាលារៀបចំឡើងក្នុងគោលបំណង៖ ១. ប្រមូលធាតុចូលពីមន្ទីរ អង្គការសង្គមស៊ីវិល អ្នកពាក់ព័ន្ធនិងអ្នកអនុវត្តផ្ទាល់នៅថ្នាក់ក្រោមជាតិដើម្បីរៀបចំផែនការ សកម្មភាពជាតិស្តីពីការបង្ការទប់ស្កាត់អាពាហ៍ពិពាហ៍នៅវ័យក្មេងនិងការមានផ្ទៃពោះនៅវ័យជំទង់។ ២. ពិភាក្សាពីការចូលរួមនិងកិច្ចសហប្រតិបត្តិការរវាងដៃគូពាក់ព័ន្ធលើការឆ្លើយតបប្រកបដោយប្រសិទ្ធិភាពដើម្បីបង្ការទប់ស្កាត់អាពាហ៍ពិពាហ៍នៅវ័យក្មេងនិងការមានផ្ទៃពោះនៅវ័យជំទង់។ ៣. ប្រមូលអនុសាសន៍ក្នុងការធ្វើឱ្យមានបរិវជ្ជកម្មយេនឌ័រ និងសង្គមលើការបង្ការទប់ស្កាត់ការរៀបអាពាហ៍ពិពាហ៍នៅវ័យក្មេង និងការមានផ្ទៃពោះនៅវ័យជំទង់។

លោក រ័ត្ន តារាពិសួគ៌ បានបញ្ជាក់ថា យោងតាមទិន្នន័យសិក្សាស្រាវជ្រាវស៊ីជម្រៅដោយក្រសួងកិច្ចការនារីនិងអង្គការភ្លែនអន្តរជាតិកម្ពុជាក្នុងឆ្នាំ២០២៤ ដោយចាប់យកសំណាកស្ត្រីអាយុពី២០ ទៅ២៤ឆ្នាំ ចំនួន១៣៥០នាក់។លទ្ធផលបានរកឃើញថាមានអត្រានៃការរៀបអាពាហ៍ពិពាហ៍មុនអាយុ១៨ឆ្នាំខ្ពស់។លទ្ធផលសិក្សាបង្ហាញថាមានអត្រាតិចតួចប្រមាណ០,៥០ភាគរយនៃអ្នកឆ្លើយតបបានរៀបអាពាហ៏ពិពាហ៍មុនអាយុ១៥ឆ្នាំ អ្នកឆ្លើយតបប្រមាណ១៣,៩៣ភាគរយបានរាយការណ៍ថាបានរៀការនៅអាយុចន្លោះ១៥ ដល់១៨ឆ្នាំ។ ជាលទ្ធផលស្ត្រីប្រមាណ១៤,៤៤ភាគរយបានរៀបការមុនអាយុ ១៨ឆ្នាំ ចំណែកបុរសវិញមានតែ០,២២ភាគរយប៉ុណ្ណោះដែលបានរៀបការមុនអាយុ១៥ឆ្នាំហើយបុរស២,៩៦១ភាគរយបានរៀបការនៅអាយុពី១៥ ទៅ១៨ឆ្នាំ។ អាពាហ៍ពិពាហ៍នៅវ័យកុមារ សំដៅលើការរៀបអាពាហ៍ពិពាហ៍ជាផ្លូវការ ឬការផ្សំផ្គុំមិនផ្លូវការ ឬតាមបែបតំបន់ប្រពៃណីដែលភាគីម្ខាងទៀតមានអាយុក្រោម១៨ឆ្នាំ និងមនុស្សពេញវ័យ ឬកុមារផ្សេងទៀត។

លោកជំទាវ ហ៊ូ សាមិត្ត បានលើកឡើងថា រាជរដ្ឋាភិបាលកម្ពុជាក្នុងនីតិកាលទី៧នៃរដ្ឋសភា នៅតែបន្តផ្តល់អាទិភាពខ្ពស់ និងបង្កើនការវិនិយោគក្នុងការលើកកម្ពស់សមភាពយេនឌ័រ ការពង្រឹងភាពអង់អាចផ្នែកសេដ្ឋកិច្ចដល់ស្ត្រី លុបបំបាត់គម្លាតយេនឌ័រក្នុងវិស័យអប់រំ និងឌីជីថលព្រមទាំងការលុបបំបាត់អំពើហិង្សាលើស្ត្រី និងក្មេងស្រី ដែលជាការរំលោភសិទ្ធិមនុស្សដើម្បីរួមចំណែកអភិវឌ្ឍធនធានមនុស្ស លើកកម្ពស់សីលធម៌សង្គម និងភាពសុខដុមរមនាក្នុងសង្គម ដែលនេះនឹងផ្តល់តម្លៃបន្ថែមនូវកាលានុវត្តភាពដល់ស្ត្រី និងក្មេងស្រីហើយពួកគេអាចមានលទ្ធភាពគ្រប់គ្រាន់ក្នុងការអនុវត្តសិទ្ធិប្រើប្រាស់សក្តានុពលរបស់ខ្លួនជាអតិបរមា ដើម្បីចូលរួមដោយស្មើភាពជាមួយបុរស ក្នុងដំណើរការអភិវឌ្ឍសេដ្ឋកិច្ច និងសង្គមជាតិ។

លោកជំទាវរដ្ឋលេខាធិការបានបន្ថែមទៀតថា កិច្ចការពារកុមារ និងការលើកកម្ពស់សិទ្ធិកុមារ ជាពិសេសការចូលរួមបង្ការទប់ស្កាត់ការរៀបអាពាហ៍ពិពាហ៍នៅវ័យក្មេង និងការអភិវឌ្ឍខ្លួនក្លាយជាមនុស្សពេញវ័យក៏ជាការងារស្នូលរបស់រាជរដ្ឋាភិបាលកម្ពុជា និងត្រូវបានដាក់បញ្ចូលទៅក្នុងក្របខ័ណ្ឌច្បាប់ គោលនយោបាយ ផែនការសកម្មភាពជាតិ លិខិតបទដ្ឋាន គតិយុត្តិ ដើម្បីធានាឱ្យមានភាពល្អប្រសើរឡើងនូវបរិយាកាសរៀនសូត្រល្អក្នុងសាលារៀនដើម្បីកាត់បន្ថយ ហានិភ័យនៃការបោះបង់ការសិក្សា ការក្លាយជាជនរងគ្រោះនៃការរៀបអាពាហ៍ពិពាហ៍នៅវ័យក្មេង អាពាហ៍ពិពាហ៍ដោយបង្ខំ និងបង្កើតឱ្យមានជាឱកាស ជម្រើសឯករាជ្យភាពការពង្រឹងសិទ្ធិអំណាច ជាពិសេសក្មេងស្រីវ័យជំទង់អាចអនុវត្តសិទ្ធិរបស់ខ្លួនក្នុងការការពារពីការរំលោភបំពានផ្លូវភេទ អំពើហិង្សាទាក់ទងនឹងយេនឌ័រ និងការចូលរួមយ៉ាងសកម្មក្នុងវិធានការទប់ស្កាត់នានា នៅក្នុងសហគមន៍។

លោកជំទាវបានបញ្ជាក់ថា ក្រសួងកិច្ចការនារីជាសេនាធិការរបស់រាជរដ្ឋាភិបាល និងជាយន្តការថ្នាក់ជាតិក្នុងការសម្របសម្រួលលើកកម្ពស់សមភាពយេនឌ័រ និងចូលរួមទប់ស្កាត់អំពើហិង្សាលើស្ត្រីនិងក្មេងស្រីគ្រប់ទម្រង់ក្នុងប្រទេសកម្ពុជា។ ជាមួយគ្នានេះដែរ ក្រសួងកិច្ចការនារីដោយមានការគាំទ្រពីអង្គការភ្លែនអន្តរជាតិកម្ពុជាកាលពីថ្ងៃទី០២ ខែមិថុនា ឆ្នាំ២០២១ បានចុះអនុស្សារណៈនៃការយោគយល់គ្នារវាងក្រសួងកិច្ចការនារីនិងអង្គការភ្លែនអន្តរជាតិកម្ពុជាលើគម្រោងចំនួន៣ដែលក្នុងនោះគម្រោងទី៣គឺការកាត់បន្ថយការរៀបអាពាហ៍ពិពាហ៍វ័យកុមារ និងការមានផ្ទៃពោះនៅវ័យជំទង់របស់ស្ត្រីជនជាតិដើមភាគតិច។ ផែនការសកម្មភាពជាតិនេះមានសារៈសំខាន់ណាស់ និងជួយដល់រាជរដ្ឋាភិបាលក្នុងការពន្លឿនការឈានទៅសម្រេចបាននូវគោលដៅអភិវឌ្ឍន៍ប្រកបដោយចីរភាព។ ក្នុងភាពជាដៃគូជាមួយអង្គការភ្លែនអន្តរជាតិកម្ពុជា ក្រសួងកិច្ចការនារីនឹងដឹកនាំរៀបចំផែនការសកម្មភាពជាតិ ស្តីពីការបង្ការទប់ស្កាត់អាពាហ៍ពិពាហ៍នៅវ័យក្មេង និងការមានផ្ទៃពោះនៅវ័យជំទង់ៗនេះប្រកបដោយធាតុចូលគ្រប់គ្រាន់ ក្នុងការឆ្លើយតបគោលនយោបាយ និងក្របខ័ណ្ឌច្បាប់ការអប់រំ និងផ្សព្វផ្សាយការពង្រឹងភាពអង់អាចផ្នែកសេដ្ឋកិច្ច ការចូលរួមរបស់សហគមន៍ សេវា និងជំនួយឆ្លើយតបនឹងចូលរួមកិច្ចសហការពីអ្នកពាក់ព័ន្ធ៕

ដោយ ស៊ុម វណ្ណា