AKP ភ្នំពេញ ថ្ងៃទី១៧ ខែមករា ឆ្នាំ២០២៥ -- នាយករដ្ឋមន្ត្រីកាតាបានប្រកាសថា អ៊ីស្រាអែល និងក្រុមហាម៉ាស់ បានយល់ព្រមលើកិច្ចព្រមព្រៀងបទឈប់បាញ់សម្រាប់ចំណាប់ខ្មាំងនៅតំបន់ហ្គាហ្សា បន្ទាប់ពីកិច្ចខិតខំប្រឹងប្រែងសម្រុះសម្រួលយ៉ាងខ្លាំងដោយប្រទេសកាតា អេហ្ស៊ីប និងសហរដ្ឋអាមេរិក។

នៅក្នុងសន្និសីទសារព័ត៌មានមួយ នាយករដ្ឋមន្ត្រីកាតា និងរដ្ឋមន្ត្រីការបរទេស លោក សីខ៍ ម៉ូហាមមេដ ប៊ីន អាប់ឌុលរ៉ាហ៍ម៉ាន់ ប៊ីន ចាសស៊ីម អាល់ ថានី (Sheikh Mohammed bin Abdulrahman bin Jassim Al Thani) បាននិយាយថា ភាគីជម្លោះទាំងពីរនៅតំបន់ហ្គាហ្សាបានឈានដល់កិច្ចព្រមព្រៀងមួយទាក់ទងនឹងការផ្លាស់ប្តូរចំណាប់ខ្មាំង និងអ្នកទោស ហើយត្រឡប់ទៅរកភាពស្ងប់ស្ងាត់ប្រកបដោយនិរន្តរភាពដែលនឹងនាំឱ្យមានបទឈប់បាញ់ជាអចិន្ត្រៃយ៍។

លោក​បាន​បន្ថែម​ថា ការ​អនុវត្ត​កិច្ច​ព្រម​ព្រៀង​នឹង​ចាប់​ផ្តើម​នៅ​ថ្ងៃ​អាទិត្យ ទី១៩ ខែ​មករា។ យោងតាមកិច្ចព្រមព្រៀងនេះ ក្រុមហាម៉ាស់នឹងដោះលែងចំណាប់ខ្មាំង ៣៣នាក់ក្នុងដំណាក់កាលដំបូង មានរយៈពេល ៦សប្តាហ៍ជាថ្នូរនឹងការដោះលែងអ្នកទោសប៉ាឡេស្ទីន។ ព័ត៌មានលម្អិតនៃដំណាក់កាលទី២ និងទី៣ នឹងត្រូវបានប្រកាសបន្ទាប់ពីការបញ្ចប់ដំណាក់កាលទី១ នៃកិច្ចព្រមព្រៀង។

លោក អាល់ ថានី បានសង្កត់ធ្ងន់លើការប្តេជ្ញាចិត្តបន្តរបស់ប្រទេសកាតា រួមជាមួយនឹងប្រទេសអេហ្ស៊ីប និងសហរដ្ឋអាមេរិក ដើម្បីត្រួតពិនិត្យការអនុវត្តកិច្ចព្រមព្រៀង និងដោះស្រាយការរំលោភបំពានដែលអាចកើតមានណាមួយ។ លោក​បាន​បន្ត​ថា ក្រុម​អ្នកតាម​ដាន​មក​ពី​ប្រទេស​ទាំង​បី​នឹង​ធានា​បាន​នូវ​ការ​ប្រកាន់​ខ្ជាប់​នៃ​កិច្ច​ព្រម​ព្រៀង និង​ចាត់​វិធាន​ការ​ចាំបាច់​ដើម្បី​រក្សា​ស្ថិរភាព។

លោក អាល់ ថានី បានកត់សម្គាល់ថា «កិច្ចព្រមព្រៀងនេះ គឺជាជំហានឆ្ពោះទៅរកការសម្រេចបាននូវសន្តិភាពប្រកបដោយនិរន្តរភាពនៅក្នុងតំបន់ ហើយយើងកំពុងធ្វើការយ៉ាងជិតស្និទ្ធជាមួយភាគីទាំងអស់ដើម្បីធានានូវភាពជោគជ័យរបស់ខ្លួន»៕

ដោយ៖ មូល មិនា (ប្រភព៖ ភីបផលដេលី)