AKP ភ្នំពេញ ថ្ងៃទី១៦ ខែមករា ឆ្នាំ២០២៥ -- លោក ម៉ាម៉ាន់ អាប់ឌុរ៉ាម៉ាន់ (Maman Abdurrahman) រដ្ឋមន្ត្រីក្រសួងសហគ្រាសធុនតូច និងមធ្យម (MSME) របស់ប្រទេសឥណ្ឌូណេស៊ី បានសង្កត់ធ្ងន់ទៅលើការប្តេជ្ញាចិត្តរបស់ក្រសួងក្នុងការគាំទ្រសន្តិសុខស្បៀង តាមរយៈការផ្តល់ហិរញ្ញប្បទានសម្រាប់ឧបករណ៍ដល់សហគ្រាសធុនតូច និងមធ្យម MSME ។

លោក​បាន​បញ្ជាក់​ថា ជំហាន​យុទ្ធសាស្ត្រ​មួយ​ចំនួន​ត្រូវ​បាន​អនុវត្ត​ដើម្បី​ធានា​ថា សហគ្រាស​ធុន​តូច និង​មធ្យម​អាច​ចូល​រួម​ចំណែក​យ៉ាង​ប្រសើរ​ក្នុង​ការ​គាំទ្រ​ដល់​សន្តិសុខ​ស្បៀង​ជាតិ។

លោកបាននិយាយថា ក្រសួងកំពុងរៀបចំបទប្បញ្ញត្តិមួយដើម្បីបែងចែកថវិកាចំនួន ២០ពាន់ពាន់លានរូពៀ (១,២២ពាន់លានដុល្លារអាម៉េរិក) សម្រាប់ (ការឧបត្ថម្ភធនអត្រាការប្រាក់ទាប) ឥណទានធុរកិច្ចប្រជាជន (KUR) ជាពិសេសសម្រាប់ឧបករណ៍ផលិតកម្ម។ លោកបាននិយាយបន្ថែមថា កម្មវិធីនេះមានគោលបំណងជួយដល់កសិករ និងសហគ្រិន MSME ក្នុងវិស័យជលផលក្នុងការទទួលបានឧបករណ៍អាជីវកម្មជាមួយនឹងកម្រិតឥណទានរហូតដល់ ២ពាន់លានរូពៀ។

លោកក៏បានទាក់ទាញការយកចិត្តទុកដាក់ចំពោះការផ្តល់ហិរញ្ញប្បទានជំនួសដែលផ្តល់ជូនតាមរយៈមជ្ឈមណ្ឌលវិនិយោគរដ្ឋាភិបាល (PIP) ដែលផ្តល់ការប្រាក់ ៤% សម្រាប់ហិរញ្ញប្បទានមិនមែន KUR MSME។ ជំនួយនេះក៏មានសម្រាប់សហគ្រាសភូមិ (BUMDes) ដែលបើកឱកាសសម្រាប់រដ្ឋាភិបាលមូលដ្ឋានក្នុងការពង្រីកលទ្ធភាពទទួលបានហិរញ្ញប្បទាននៅថ្នាក់ភូមិផងដែរ។

លើសពីនេះទៀត លោកបានគូសបញ្ជាក់ថា សហគ្រាសធុនតូច និងមធ្យមអាចដើរតួនាទីក្នុងវិស័យគាំទ្រផ្សេងៗទៀតនៃកម្មវិធីអាហាររូបត្ថម្ភឥតគិតថ្លៃ ដូចជាការផ្គត់ផ្គង់វត្ថុធាតុដើម ការផលិតអាហារស្រាប់ និងការចែកចាយអាហារ។

លោកបានកត់សម្គាល់ថា ការចូលរួមរបស់សហគ្រាសធុនតូច និងមធ្យមក្នុងវិស័យផ្សេងៗនឹងបើកឱកាសថ្មី និងជំរុញគោលជំហររបស់ពួកគេនៅក្នុងខ្សែសង្វាក់ផ្គត់ផ្គង់អាហារជាតិ៕

ដោយ៖ យា ចិន្ដាខន្ដី (ប្រភព៖ VNA)