AKP ភ្នំពេញ ថ្ងៃទី១៥ ខែមករា ឆ្នាំ២០២៥-ឯកឧត្តម នាយឧត្តមសេនីយ៍ មាស វិរិទ្ធ អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀនបានសំណូមពរដល់គ្រប់សមាសភាពទាំងអស់ត្រូវរួមគ្នាបន្តអនុវត្តនូវបទបញ្ជាលេខ០១ សម្អាតចកចេញពីបឹង”និងបង្កើនការប្រើប្រាស់App NoDrug។ ការលើកឡើងបែបនេះក្នុងពិធីបិទការផ្សព្វផ្សាយផែនការកម្មភាពការងាររបស់គណៈកម្មាធិការសម្របសម្រួល ជំរុញ អនុវត្តន៍ និងត្រួតពិនិត្យការងារប្រយុទ្ធប្រឆាំងគ្រឿងញៀននិងផ្សព្វផ្សាយចំណេះដឹងជាមូលដ្ឋានស្ដីពីបញ្ហាគ្រឿងញៀនដល់មន្ត្រីរាជការនៃអង្គភាពក្រោមឱវាទក្រសួងមហាផ្ទៃដែលមានការចូលរួមពីគ្រប់អង្គភាព និងរាជធានីខេត្ត ក្រសួងមហាផ្ទៃ នាល្ងាចថ្ងៃទី១៥ ខែមករា ឆ្នាំ២០២៥ នៅក្រសួងមហាផ្ទៃ។

ក្នុងឱកាសនោះ ឯកឧត្តម នាយឧត្តមសេនីយ៍ មាស វិរិទ្ធ ប្រធានគណៈកម្មាធិការ បានមានប្រសាសន៍ថ្លែងនូវអំណរគុណសមាជិកនៃអង្គពិធីទាំងមូលដែលបានចូលរួមក្នុងកម្មវិធីនេះ។ ឯកឧត្តម នាយឧត្តមសេនីយ៍ក៏បានថ្លែងអំណរ គុណដល់វាគ្មិន ដែលបានរួមគ្នាផ្តល់និងទទួលចំណេះដឹងកាន់តែច្បាស់អំពីផលប៉ះពាល់នៃគ្រឿងញៀន និងយន្តការនានាសំដៅលើកកម្ពស់ប្រសិទ្ធភាពការងារប្រយុទ្ធប្រឆាំងគ្រឿងញៀន។ ឯកឧត្តម នាយឧត្តមសេនីយ៍ មាស វិរិទ្ធ បន្ថែមថា ស្ថានភាព កែច្នៃ ផលិត ការចរាចរ ការជួញដូរ និងការប្រើប្រាស់គ្រឿងញៀននៅលើពិភពលោក និងតំបន់បន្តកើនឡើង ក្រុមឧក្រិដ្ឋជនកាន់តែសកម្មភាព ហើយការប្រើប្រាស់បន្តរាលដាលដល់ជនបទនាំឱ្យប៉ះពាល់ដល់សុខុមាលភាព សុវត្ថិភាព សន្តិសុខ សណ្ដាប់ធ្នាប់សាធារណៈ និងការអភិវឌ្ឍន៍សហគមន៍។ ឯកឧត្តម នាយឧត្តមសេនីយ៍បានលើកឡើងថា ឆ្លើយតបនឹងស្ថានភាពនេះ រាជរដ្ឋាភិបាល នីតិកាលទី៧ ដឹកនាំដោយសម្តេចធិបតី ហ៊ុន ម៉ាណែត មានបញ្ញាញាណ និងឆន្ទៈមុតស្រួចបានដាក់ការងារប្រយុទ្ធប្រឆាំងគ្រឿងញៀន ជាអាទិភាព ព្រមទាំងបានដាក់ចេញនូវគោលការណ៍ស្តីពីការ“សម្អាតផ្ទះយើង និងសម្អាតចកចេញពីបឹង”។

ជាមួយគ្នានេះ ឯកឧត្តម នាយឧត្តមសេនីយ៍ មាស វិរិទ្ធ បានសំណូមពរ៤ចំណុច ដល់អង្គភាពថ្នាក់ជាតិ និងក្រោមជាតិ ក្របខ័ណ្ឌក្រសួងមហាផ្ទៃ ដែលរួមមាន៖ ១.ត្រូវអនុវត្តន៍ឱ្យបានខ្ជាប់ខ្ជូននូវបទបញ្ជាលេខ០១បប “សម្អាតផ្ទះយើង និងសម្អាតចកចេញពីបឹង”។ ២.ត្រូវបន្តចាត់ចែងនិងលើកកម្ពស់ប្រសិទ្ធភាព ប្រសិទ្ធផលបង្កើតបាននូវសុចនាករល្អទាំងបរិមាណវិស័យ និងគុណវិស័យនៃការងារប្រយុទ្ធប្រឆាំងគ្រឿងញៀន ស្របតាមកម្មវិធីកំណែទម្រង់រដ្ឋបាលសាធារណៈរបស់រាជរដ្ឋាភិបាល។ ៣.ត្រូវរៀបចំផែនការសកម្មភាពជាក់ស្តែងតាមអង្គភាពរបស់ខ្លួនដើម្បីអនុវត្តនិងកៀរគរការចូលរួមពីគ្រប់សមាសភាពលើការងារប្រយុទ្ធប្រឆាំងគ្រឿងញៀន ។ ៤.រដ្ឋបាលរាជធានី ខេត្ត ក្រុង ស្រុក ខណ្ឌ ឃុំ/សង្កាត់ និងភូមិ ត្រូវមាន យន្តការជាអចិន្រ្តៃយ៍សម្រាប់គាំទ្រ ឆ្លើយតបនិងដោះស្រាយនូវរាល់បញ្ហាដែលពាក់ព័ន្ធនឹងគ្រឿងញៀនដែលតែងតែកើតមាននៅក្នុងមូលដ្ឋាន និងនៅក្នុងក្រុមគ្រួសារប្រជាពលរដ្ឋ និងបំផុសការទាញយកនិងប្រើប្រាស់ App NoDrug ៕

ដោយ៖ រិទ្ធី, ប្រភព៖ អាជ្ញាធរជាតិប្រយុទ្ធប្រឆាំងគ្រឿងញៀន