AKP ភ្នំពេញ ថ្ងៃទី១៥ ខែមករា ឆ្នាំ២០២៥ -- ប្រធានាធិបតីអេមីរ៉ាត់អារ៉ាប់រួមលោក ស្សេក ម៉ូហាម៉េដ ប៊ីន ហ្សាយ៉េដ អាល់ ណាយ៉ាន់ (Sheikh Mohamed bin Zayed Al Nahyan) បានចូលរួមជាមួយលោក គ្រីស្តូហ្វ័រ លូសុន (Christopher Luxon) នាយករដ្ឋមន្ត្រីនៃប្រទេសនូវែលសេឡង់ដើម្បីធ្វើជាសាក្សីក្នុងពិធីចុះហត្ថលេខាលើកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយ (CEPA) រវាងប្រទេសទាំងពីរ។

កិច្ចព្រមព្រៀងដែលត្រូវបានចុះហត្ថលេខានៅមជ្ឈមណ្ឌលពិព័រណ៍ជាតិអាប៊ូដាប៊ី (ADNEC) ដោយលោក ថានី ប៊ីន អាម៉េដ អាល់ ហ្សេយូឌី (Thani bin Ahmed Al Zeyoudi) រដ្ឋមន្ត្រីក្រសួងពាណិជ្ជកម្មបរទេសរបស់អេមីរ៉ាត់អារ៉ាប់រួម និងលោក ថូដ ម៉ាកក្លេយ (Todd McClay) រដ្ឋមន្ត្រីក្រសួងពាណិជ្ជកម្មនូវែលសេឡង់នេះ នឹងជួយកាត់បន្ថយរបាំងពាណិជ្ជកម្មពង្រឹងនីតិវិធីគយ និងសម្របសម្រួលក្នុងការបង្កើនកិច្ចសហប្រតិបត្តិការ និងការវិនិយោគរបស់វិស័យឯកជន។

លោក ស្សេក ម៉ូហាម៉េដ ប៊ីន ហ្សាយ៉េដ បាននិយាយថា កិច្ចព្រមព្រៀងនេះ គឺជាការបន្ថែមដ៏សំខាន់មួយចំពោះកម្មវិធី CEPA របស់អេមីរ៉ាត់អារ៉ាប់រួម ដោយពង្រឹងទំនាក់ទំនងជាមួយតំបន់អាស៊ីប៉ាស៊ីហ្វិកប្រកបដោយភាពស្វាហាប់ តាមរយៈទីផ្សារដែលមានការបើកចំហ និងអភិវឌ្ឍន៍។

លោកបានគូសបញ្ជាក់ថា កិច្ចព្រមព្រៀង CEPA អេមីរ៉ាត់អារ៉ាប់រួម-នូវែលសេឡង់ នឹងបង្រួបបង្រួមប្រទេសទាំងពីរក្នុងមហិច្ឆតារួមគ្នាមួយដើម្បីអភិវឌ្ឍន៍សេដ្ឋកិច្ចដែលមានភាពធន់ និងត្រៀមខ្លួនជាស្រេចនាពេលអនាគតដែលបង្កើតឡើងដោយចំណេះដឹង នវានុវត្តន៍ និងទេពកោសល្យ។

កិច្ចព្រមព្រៀង CEPA អេមីរ៉ាត់អារ៉ាប់រួម-នូវែលហ្សេឡង់ ជាការកសាងទំនាក់ទំនងសេដ្ឋកិច្ចរវាងប្រទេសទាំងពីរដែលកំពុងមានការរីកចម្រើន ដោយពាណិជ្ជកម្មទ្វេភាគីមិនមែនប្រេងឈានដល់តម្លៃ៦៤២លានដុល្លារអាម៉េរិកក្នុងរយៈពេល ៩ខែដំបូងនៃឆ្នាំ២០២៤ដែលកើនឡើង ៨% ធៀបនឹងរយៈពេលដូចគ្នាកាលពីក្នុងឆ្នាំ២០២៣។

នៅក្រោមកិច្ចព្រមព្រៀង CEPA នេះ ប្រទេសនូវែលហ្សេឡង់នឹងផ្តល់ការលើកលែងពន្ធ ១០០% ចំពោះការនាំចូលពីអេមីរ៉ាត់អារ៉ាប់រួម ខណៈដែលអេមីរ៉ាត់អារ៉ាប់រួមនឹងលើកលែងពន្ធ ៩៨,៥% សម្រាប់ផលិតផលនូវែលសេឡង់ ដែលវានឹងឡើងដល់ ៩៩% ក្នុងរយៈពេលបីឆ្នាំបន្ទាប់។

កិច្ចព្រមព្រៀងនេះត្រូវបានគេរំពឹងថានឹងជួយជំរុញពាណិជ្ជកម្មទ្វេភាគីឱ្យបានដល់ ៥ពាន់លានដុល្លារអាម៉េរិកនៅត្រឹមឆ្នាំ២០៣២ ដែលកើនឡើងបីដងនៃទំហំពាណិជ្ជកម្មជាមធ្យមដែលមានរយៈពេល ៥ឆ្នាំ ដែលមានចំនួន១,៥ពាន់លានដុល្លារអាម៉េរិករវាងអេមីរ៉ាត់អារ៉ាប់រួម និងនូវែលសេឡង់ពីឆ្នាំ២០១៩-២០២៣។ កិច្ចព្រមព្រៀង CEPA តំណាងឱ្យកិច្ចព្រមព្រៀងពាណិជ្ជកម្មដំបូងបង្អស់របស់ប្រទេសនូវែលសេឡង់ជាមួយប្រទេសនៅមជ្ឈិមបូព៌ា និងជាកិច្ចព្រមព្រៀង CEPAs ដ៏ធំបំផុតមួយរបស់អេមីរ៉ាត់អារ៉ាប់រួម ដែលគ្របដណ្តប់លើវិស័យមួយចំនួន ដែលរួមមានទាំងពាណិជ្ជកម្មការអភិវឌ្ឍប្រកបដោយចីរភាព ការផ្តល់សិទ្ធិអំណាចសេដ្ឋកិច្ចរបស់ស្ត្រី និងតម្លាភាព៕

ដោយ៖ យា ចិន្ដាខន្ដី (ប្រភព៖ ANI)