AKP ភ្នំពេញ ថ្ងៃទី១៥ ខែមករា ឆ្នាំ២០២៥ -- ក្រសួងការបរទេសកូរ៉េខាងត្បូងបាននិយាយកាលពីថ្ងៃអង្គារថា រដ្ឋាភិបាលកូរ៉េខាងត្បូងគ្រោងនឹងពិភាក្សាជាមួយអ៊ុយក្រែនអំពីការនាំយកទាហានកូរ៉េខាងជើងដែលត្រូវបានចាប់ខ្លួនដោយអ៊ុយក្រែនទៅកាន់កូរ៉េខាងត្បូង ប្រសិនបើពួកគេស្នើសុំការផ្លាស់ទីលំនៅទៅទីនោះ។

អ្នកនាំពាក្យក្រសួងការបរទេស លោក លី ជែវ៉ុង (Lee Jae-woong)បានធ្វើការកត់សម្គាល់ខាងលើនេះនៅក្នុងអំឡុងពេលនៃសន្និសីទសារព័ត៌មានមួយ បន្ទាប់ពីប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី (Volodymyr Zelenskyy) បាននិយាយកាលពីពេលថ្មីៗនេះថាទាហានកូរ៉េខាងជើងពីរនាក់ត្រូវបានចាប់ខ្លួនដោយអ៊ុយក្រែននៅក្នុងតំបន់ឃឺស នៅភាគខាងលិចនៃប្រទេសរុស្ស៊ី ខណៈដែលពួកគេកំពុងប្រយុទ្ធដើម្បីរុស្ស៊ី។

នៅក្នុងវីដេអូមួយដែលត្រូវបានចែករំលែកនៅពេលក្រោយមកដោយលោក ហ្សេលេនស្គី កងទាហានកូរ៉េខាងជើងម្នាក់ត្រូវបានគេសួរថា តើជនជាតិអ៊ុយក្រែនទាំងអស់ជាមនុស្សល្អដែរឬទេ? ហើយបន្ទាប់មក អ្នកបកប្រែម្នាក់បានឆ្លើយតបជាវិជ្ជមានដោយបាននិយាយថា «ខ្ញុំចង់រស់នៅទីនេះ»។

អ្នក​នាំពាក្យ​រូបនោះ​បាន​និយាយ​ថា​ «​ដោយ​សារ​ទាហាន​កូរ៉េ​ខាង​ជើង​ជា​ជនជាតិ​របស់​យើង​យោង​តាម​រដ្ឋធម្មនុញ្ញ (រដ្ឋាភិបាល) គ្រោង​នឹង​ពិភាក្សា​ជាមួយ​អ៊ុយក្រែន ប្រសិន​បើ​ពួកគេ​ស្នើ​សុំ​ផ្លាស់​ប្តូរ​ទៅ​កូរ៉េ​ខាង​ត្បូង»។

រដ្ឋធម្មនុញ្ញរបស់ប្រទេសកូរ៉េខាងត្បូងបានកំណត់ឧបទ្វីបកូរ៉េទាំងមូលជាទឹកដីរបស់ខ្លួន ដោយបានទទួលស្គាល់ប្រជាជនទាំងអស់នៅលើឧបទ្វីបកូរ៉េថាជាជនជាតិរបស់ខ្លួន។

ទោះជាយ៉ាងនេះក្តី អ្នកនាំពាក្យក្រសួងបានបញ្ជាក់ថា គ្មានទាហានណាម្នាក់ក្នុងចំណោមទាហានដែលចាប់ខ្លួនទាំងពីរបានបង្ហាញពីចេតនាចង់ទៅកូរ៉េខាងត្បូងនោះទេ ដោយលោកបាននិយាយបន្ថែមថា អាជ្ញាធរកូរ៉េខាងត្បូងដែលពាក់ព័ន្ធបច្ចុប្បន្នកំពុងទាក់ទងជាមួយអ៊ុយក្រែនទាក់ទងនឹងបញ្ហានេះ។

កាលពីថ្ងៃអាទិត្យ ទីភ្នាក់ងារចារកម្មរបស់ប្រទេសកូរ៉េខាងត្បូងបានបញ្ជាក់ពីការចាប់ខ្លួនទាហានកូរ៉េខាងជើងចំនួនពីរនាក់ដោយអ៊ុយក្រែនកាលពីសប្តាហ៍មុន ហើយបានសន្យាសម្រាប់កិច្ចសហប្រតិបត្តិការជិតស្និទ្ធជាមួយសមភាគីអ៊ុយក្រែន ដើម្បីបន្តចែករំលែកព័ត៌មានពាក់ព័ន្ធ៕

ដោយ៖ យា ចិន្ដាខន្ដី (ប្រភព៖ កូរ៉េថែមស៍)