AKP ភ្នំពេញ ថ្ងៃទី១៥ ខែមករា ឆ្នាំ២០២៥ -- យោធាកូរ៉េខាងត្បូងបាននិយាយថា ប្រទេសកូរ៉េខាងជើងបានបាញ់សាកល្បងមីស៊ីលផ្លោងរយៈចម្ងាយខ្លីជាច្រើនគ្រាប់ឆ្ពោះទៅកាន់សមុទ្រខាងកើតកាលពីថ្ងៃអង្គារ នៅក្នុងការបង្កហេតុដែលធ្វើឡើងតែប៉ុន្មានថ្ងៃមុនពេលប្រធានាធិបតីជាប់ឆ្នោតរបស់សហរដ្ឋអាមេរិក លោក ដូណាល់ ត្រាំ (Donald Trump) ចូលកាន់តំណែង។

អគ្គសេនាធិការចម្រុះ (JCS) បាននិយាយថា ខ្លួនបានរកឃើញការបាញ់បង្ហោះនៅម៉ោងប្រហែល ៩:៣០នាទីព្រឹកពីតំបន់ Ganggye ក្នុងខេត្តចាហ្គាង ភាគខាងជើង។

ការ​បាញ់​បង្ហោះ​កាល​ពី​ថ្ងៃ​អង្គារ​បាន​បង្ហាញ​ពី​ការ​បង្ក​ហេតុ​ជា​លើក​ទី​ពីរ​​ដែល​មាន​ការ​ប្រឌិត​ឡើង​ក្នុង​ឆ្នាំ​នេះ។ បន្ទាប់​ពី​ប្រទេសនេះ​បាន​បាញ់​ចេញ​នូវ​អ្វី​ដែល​ខ្លួន​អះអាង​ថា​ជា​មីស៊ីល​ផ្លោង  ​រយៈ​ចម្ងាយ​មធ្យម​លឿន​ជាង​សំឡេង​កាលពី​ថ្ងៃ​ទី​៦ ខែមករា។

នៅក្នុងកិច្ចប្រជុំចុងឆ្នាំ ប្រទេសកូរ៉េខាងជើងបានប្រកាសថា ខ្លួននឹងអនុវត្តន៍យុទ្ធសាស្ត្រប្រឆាំង «ដ៏តឹងតែងបំផុត» ចំពោះសហរដ្ឋអាមេរិកដោយអះអាងថា កិច្ចសហប្រតិបត្តិការយោធាក្នុងចំណោមប្រទេសកូរ៉េខាងត្បូង សហរដ្ឋអាមេរិក និងជប៉ុន បានពង្រីកទៅជា «ប្លុកយោធាសម្រាប់ការឈ្លានពាន» ។

JCS បាននិយាយថា «នៅក្នុងការរៀបចំប្រឆាំងនឹងការបាញ់បង្ហោះបន្ថែម យោធារបស់យើងបានពង្រឹងការត្រួតពិនិត្យ និងការប្រុងប្រយ័ត្នហើយបានចែករំលែកព័ត៌មានយ៉ាងជិតស្និទ្ធអំពីមីស៊ីលកូរ៉េខាងជើងជាមួយភាគីសហរដ្ឋអាមេរិក និងជប៉ុន និងរក្សាជំហរត្រៀមខ្លួនយ៉ាងពេញលេញ»៕

ដោយ៖ មូល មិនា (ប្រភព៖ យ៉ុនហាប់)