AKP ភ្នំពេញ ថ្ងៃទី១៥ ខែមករា ឆ្នាំ២០២៥ -- អង្គការសុខភាពពិភពលោក(WHO) និងមូលនិធិកុមាររបស់អង្គការសហប្រជាជាតិ (UNICEF) បាននិយាយថា ពួកគេបានទទួលមូលនិធិចំនួន ៨២ លានដុល្លារអាម៉េរិកពីធនាគារពិភពលោក ដើម្បីកែលម្អសេវាសុខភាពសម្រាប់ប្រជាជនជាង ៨លាននាក់នៅក្នុងប្រទេសស៊ូដង់។

អង្គការនានាបាននិយាយនៅក្នុងសេចក្តីថ្លែងការណ៍រួមមួយថា មូលនិធិនេះនឹងដោះស្រាយតម្រូវការសុខភាពបន្ទាន់ និងដាក់មូលដ្ឋានគ្រឹះសម្រាប់ការកែលម្អរយៈពេលវែង។

មូលនិធិនេះនឹង​ត្រូវ​ប្រើ​ដើម្បី​ផ្តល់​ឱសថ​សំខាន់ៗ បណ្តុះបណ្តាល​បុគ្គលិក​សុខាភិបាល ផ្តល់​សេវា​សុខភាព​មាតា ទារក និង​កុមារ ព្យាបាល​កង្វះ​អាហារូបត្ថម្ភ​ធ្ងន់ធ្ងរ និងពង្រឹងយុទ្ធនាការចាក់វ៉ាក់សាំង និងការផ្សព្វផ្សាយដល់កុមារ និងគ្រួសារដែលងាយរងគ្រោះនៅក្នុងសហគមន៍ដែលផ្លាស់ទីលំនៅ និងម្ចាស់ផ្ទះ។

អង្គការយូនីសេហ្វបានប៉ាន់ប្រមាណថា កុមារចំនួន ៣,៤លាននាក់ដែលមានអាយុក្រោម ៥ឆ្នាំនៅក្នុងប្រទេសស៊ូដង់ មានហានិភ័យខ្ពស់នៃជំងឺរាតត្បាត។

អង្គការ UN និយាយថា មនុស្សជាង ២៥លាននាក់ ជាងពាក់កណ្តាលនៃចំនួនប្រជាជនស៊ូដង់ ប្រឈមមុខនឹងអសន្តិសុខស្បៀងធ្ងន់ធ្ងរ រួមទាំងកុមារជិត ៣,៧លាននាក់ដែលទទួលរងពីកង្វះអាហារូបត្ថម្ភ។

យោងតាមអង្គការអន្តរជាតិបានឱ្យដឹងថា ប្រទេសស៊ូដង់បានទទួលរងនូវជម្លោះរវាងកងកម្លាំងប្រដាប់អាវុធស៊ូដង់ និងកងកម្លាំងគាំទ្ររហ័សប៉ារ៉ាយោធា ចាប់តាំងពីពាក់កណ្តាលខែមេសាឆ្នាំ២០២៣ ដែលបានសម្លាប់មនុស្សជិត ៣០.០០០នាក់ និងមនុស្សជិត ១៥លាននាក់បានផ្លាស់ទីលំនៅ៕

ដោយ៖ មូល មិនា (ប្រភព៖ ភីបផលដេលី