AKP កំពង់ធំ ថ្ងៃទី១៤ ខែមករា ឆ្នាំ២០២៥--
ឯកឧត្ដម ឧត្តមសេនីយ៍ឯក លឹម តុងហួត ប្រធាននាយកដ្ឋានផ្សព្វផ្សាយ អប់រំ និងទំនាក់ទំនងសាធារណៈនៃអាជ្ញាធរជាតិប្រយុទ្ធប្រឆាំងគ្រឿងញៀនបានលើកទឹកចិត្ដដល់គ្រប់សមាសភាពទាំងអស់ក្នុងមូលដ្ឋានខេត្ដកំពង់ធំ ទាញយក និងប្រើប្រាស់ App NoDrug ដើម្បីចូលរួមប្រយុទ្ធប្រឆាំងគ្រឿងញៀន។ ការលើកឡើងរបស់ឯកឧត្ដម ឧត្តមសេនីយ៍ឯកបែបនេះ ក្នុងឱកាសចូលរួមពិធីបិទសន្និបាតបូកសរុបលទ្ធផលការងារប្រចាំឆ្នាំ២០២៤ និងលើកទិសដៅការងារឆ្នាំ២០២៥ របស់រដ្ឋបាលខេត្តកំពង់ធំ នាព្រឹកថ្ងៃទី១៤ ខែ  មករា ឆ្នាំ២០២៥។ ក្នុងពិធីសន្និបាតនេះក៏មានការអញ្ជើញចូលរួមពីឯកឧត្តម វង្សី វិស្សុត ឧបនាយករដ្ឋមន្ត្រីប្រចាំការ និងជារដ្ឋមន្រ្តីទទួលបន្ទុកទីស្ដីការគណៈរដ្ឋមន្ត្រី និងដោយមានការចូលរួមពីគ្រប់សមាសភាពក្រុមការងារថ្នាក់ជាតិ និងមូលដ្ឋាន ព្រមទាំងមន្ត្រីរាជការ កម្លាំងប្រដាប់អាវុធទូទាំងខេត្តកំពង់ធំ។ 

ក្នុងឱកាសនោះ ឯកឧត្តម នួន ផារ័ត្ន អភិបាលខេត្តកំពង់ធំបានលើកឡើងពីការប្រយុទ្ធប្រឆាំងគ្រឿងញៀនដោយបង្កើតបានជាចលនាគាំទ្រពីគ្រប់សមាសភាពក្នុងសង្គមចូលរួមជាមួយរាជរដ្ឋាភិបាលក្នុងបេសកកម្មប្រយុទ្ធប្រឆាំងគ្រឿងញៀនខុសច្បាប់ ប្រកបដោយមនសិការជាតិ និងទទួលខុសត្រូវខ្ពស់តាមរយ:ការរៀបចំចងក្រងជនបង្គោលតាមទីតាំងងាយរងគ្រោះ ដោយណែនាំឱ្យម្ចាស់សណ្ឋាគារ ផ្ទះសំណាក់ ផ្ទះជួល ក្រុមហ៊ុនសហគ្រាស និងអាជីវកម្មបម្រើសេវាកម្សាន្តនានាត្រូវរាយកាណ៍មកសមត្ថកិច្ចករណីមានការសង្ស័យ គ្រប់សមត្ថកិច្ចនិងអាជ្ញាធរពាក់ព័ន្ធបានរៀបចំយន្តការទប់ស្កាត់ បង្ក្រាប។ ឯកឧត្ដមអភិបាលខេត្ដក៏បានណែនាំដល់អាជ្ញាធរគ្រប់លំដាប់ថ្នាក់ក្នុងខេត្ដ ត្រូវអនុវត្តន៍នូវវិធានការច្បាប់ឱ្យបានម៉ត់ចត់ និងមានប្រសិទ្ធភាពខ្ពស់ ផ្សព្វផ្សាយឱ្យមានការចូលរួមផ្តល់ព័ត៌មានពីអាណាព្យាបាល និងប្រជាពលរដ្ឋតាមមូលដ្ឋាននូវមុខសញ្ញាប្រើប្រាស់គ្រឿងញៀន ដើម្បីឱ្យទៅទទួលសេវាព្យាបាលនៅតាមមណ្ឌលព្យាបាល ឬ មន្ទីរពេទ្យ។ល។ ឯកឧត្តមអភិបាលខេត្តកំពង់ធំបានសំណូមពរដល់អាជ្ញាធរមូលដ្ឋាន ក្រុង ស្រុក ឃុំ សង្កាត់ជួយជំរុញ និងលើកទឹកចិត្តដល់មន្ត្រីនិងប្រជាពលរដ្ឋក្នុងមូលដ្ឋានរបស់ខ្លួនទាញយក និងប្រើប្រាស់ App NoDrug ឱ្យបានទូលំទូលាយ ដើម្បីរួមគ្នាជាមួយសមត្ថកិច្ចក្នុងការប្រយុទ្ធប្រឆាំងគ្រឿងញៀន ។ 

ជាមួយគ្នានេះ ឯកឧត្ដមអភិបាលខេត្ដក៏បានជំរុញដល់គ្រប់សមត្ថកិច្ច និងអាជ្ញាធរពាក់ព័ន្ធត្រូវត្រូវរួមគ្នា បង្ការទប់ស្កាត់បទល្មើសគ្រឿងញៀននៅក្នុងមូលដ្ឋានធ្វើសម្រង់មុខសញ្ញាប្រើប្រាស់គ្រឿងញៀនស្វែងរកឬសគល់មុខសញ្ញាជួញដូរ ផ្សព្វផ្សាយណែនាំទៅគ្រឹះស្ថានសិក្សាសាធារណៈ និងឯកជនតាមដានសកម្មភាពសិស្សានុសិស្សករណីមានការសង្ស័យត្រូវរាយការណ៍ដល់សមត្ថកិច្ចដើម្បីធ្វើតេស្តរកសារធាតុញៀន។ ទន្ទឹមនេះ គ្រឹះស្ថានសិក្សាសាធារណៈ និងវិស័យឯកជន ត្រូវរៀបចំឱ្យមានជនបង្គោលដើម្បីផ្សព្វផ្សាយពីបញ្ហាគ្រឿងញៀនក្នុងគ្រឹះស្ថានរបស់ខ្លួនចំពោះសិស្សគេចសាលាចាប់ពី៣-៥ ថ្ងៃឡើងទៅត្រូវធ្វើតេស្តទឹកនោម បង្កើតជាមណ្ឌលស្តារនីតិសម្បទា ព្រមទាំងលើកទឹកចិត្តដល់អ្នកដែលបានផ្តល់ព័ត៌មានមកសមត្ថកិច្ច និងការគាំទ្រពីថ្នាក់ដឹកនាំនូវមធ្យោបាយ សម្ភារ និងថវិកាដល់សមត្ថកិច្ចអនុវត្តន៍ច្បាប់៕

ដោយ៖ រិទ្ធី, ប្រភព៖ អាជ្ញាធរជាតិប្រយុទ្ធប្រឆាំងគ្រឿងញៀន