AKP ភ្នំពេញ ថ្ងៃទី១៤ ខែមករា ឆ្នាំ២០២៥ -- មនុស្សចំនួន ៤នាក់បានស្លាប់នៅក្នុងទីក្រុងបាតាំ ខេត្តកោះរីអូនៃប្រទេសឥណ្ឌូណេស៊ី បន្ទាប់ពីមានហេតុការណ៍រអិលបាក់ដីមួយបានវាយប្រហារអគារលំនៅដ្ឋានមួយកាលពីព្រឹកព្រលឹមថ្ងៃទី១៣ ខែមករា ឆ្នាំ២០២៥ ម្សិលមិញនេះ។

យោងតាមទីភ្នាក់ងារកាត់បន្ថយគ្រោះមហន្តរាយខេត្តបានឱ្យដឹងថាគ្រោះមហន្តរាយនេះក៏បានធ្វើឱ្យមនុស្សចំនួន ៥នាក់ផ្សេងទៀតរងរបួស និងបានបំផ្លាញផ្ទះចំនួនប្រាំខ្នង។

លោក ហេនឌ្រីចា (Hendrija) ប្រធានផ្នែកស្តារនីតិសម្បទា និងការកសាងឡើងវិញរបស់ទីភ្នាក់ងារនោះ បានប្រាប់ប្រព័ន្ធផ្សព្វផ្សាយក្នុងស្រុកថា ភ្លៀងធ្លាក់ខ្លាំងបាននឹងកំពុងធ្លាក់នៅលើកោះរីអូ ចាប់តាំងពីថ្ងៃទី១០ខែមករាមក ហើយត្រូវបានគេរំពឹងថានឹងបន្តរហូតដល់ថ្ងៃទី១៨ ខែមករា។

ក្រោយ​មក លោក​បាន​ជំរុញឱ្យ​សាធារណជន​បន្ត​ប្រុង​ប្រយ័ត្ន​ចំពោះ​គ្រោះ​ធម្មជាតិ​ដែល​អាច​កើត​មាន​បន្ថែម​ទៀត។

ប្រទេសឥណ្ឌូណេស៊ី​តែងតែ​ជួប​គ្រោះ​ធម្មជាតិ​ក្នុង​រដូវវស្សា។ កាលពីខែវិច្ឆិកាកន្លងទៅ ទីភ្នាក់ងារឧតុនិយម អាកាសធាតុ និងភូគព្ភសាស្ត្ររបស់ប្រទេសនេះបានព្រមានថា ប្រទេសនេះបានឈានចូលរដូវវស្សាហើយដោយកម្រិតទឹកភ្លៀងត្រូវបានកេរំពឹងថានឹងកើនឡើងចន្លោះពី ២០ ទៅ៤០% ដោយសារតែបាតុភូតអាកាសធាតុឡានីណាចុះខ្សោយ៕

ដោយ៖ យា ចិន្ដាខន្ដី (ប្រភព៖ VNA)