AKP កណ្ដាល ថ្ងៃទី១៤ ខែមករា ឆ្នាំ២០២៥-- អង្គសិក្ខាសាលាឆ្លុះបញ្ចាំងលទ្ធផលការងារឆ្នាំ ២០២៤ និងលើកទិសដៅការងារឆ្នាំ ២០២៥ របស់គណៈកម្មាធិការព្រោះយោបល់កិច្ចការស្ត្រី និងកុមារ (គ.ក.ស.ក) ខេត្តកណ្តាល ដែលបានដំណើរការទៅមួយថ្ងៃពេញទទួលបានលទ្ធផលជាផ្លែផ្កាតាមកម្មវិធីដែលបានគ្រោងទុក ត្រូវបានបិទកាលពីរសៀលថ្ងៃទី១៣ ខែមករា ឆ្នាំ២០២៥ ក្រោមអធិបតីភាព ឯកឧត្តម នូ សាខន ប្រធានក្រុមប្រឹក្សាខេត្តកណ្តាល។

ក្នុងពិធីបិទអង្គសិក្ខាសាលា ឯកឧត្តមប្រធានក្រុមប្រឹក្សាបានមានប្រសាសន៍ថា អង្គសិក្ខាសាលានេះពិតជាទទួលបាននូវបទពិសោធន៍ថ្មីៗបន្ថែមទៀត នូវចំណុចខ្លាំង ចំណុចខ្វះខាត បញ្ហាប្រឈម និងនីតិវិធីដោះស្រាយបញ្ហាទាំងនោះ ដើម្បីឆ្លើយតបទៅនឹងតម្រូវការរបស់ស្ត្រី យុវជន កុមារ និងជនងាយរងគ្រោះ ជាពិសេសបានអនុវត្តផែនការ កិច្ចការពារកុមារ ព្រមទាំងបង្កើនភាពអង់អាចដល់ស្ត្រីឱ្យកាន់តែល្អប្រសើរ។ ម៉្យាងទៀតអង្គសិក្ខាសាលាក៏បានចែករំលែកនូវបទពិសោធន៍នៃការអនុវត្តតួនាទីភារកិច្ចរបស់គ.ក.ស.កនៃរដ្ឋបាលក្រុង-ស្រុក និង គ.ក.ស.កឃុំសង្កាត់ ដើម្បីជាមូលដ្ឋានសម្រាប់លើកជាយោបល់ និងអនុសាសន៍ ជូនក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សាស្រុក ក្រុមប្រឹក្សាឃុំ សង្កាត់ក្នុងការផ្តល់ការគាំទ្រដល់ការពង្រឹងភាពអង់អាចដល់ស្ត្រីជាអ្នកដឹកនាំ និងជំរុញឱ្យការងារពាក់ព័ន្ធលើកកម្ពស់សមភាពយេនឌ័រ ស្ត្រី យុវជន កុមារ និងជនងាយរងគ្រោះ ឈានឆ្ពោះទៅសម្រេចឱ្យបាននូវចក្ខុវិស័យរបស់រាជរដ្ឋាភិបាលកម្ពុជានីតិកាលទី៧ នៃរដ្ឋសភា ក្រោមការដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។

ក្នុងនាមរដ្ឋបាលខេត្ត ឯកឧត្តមសូមទទួលយកនូវមតិយោបល់ និងសំណូមពរដែលបានលើកក្នុងកិច្ចប្រជុំនេះយកទៅធ្វើការពិនិត្យពិចារណារកដំណោះស្រាយ និងផ្ដល់ការគាំទ្របន្តទៀតដល់ការងារអនុវត្តមុខងារភារកិច្ចរបស់ គ.ក.ស.ក ខេត្ត គ.ក.ស.កក្រុង-ស្រុក គ.ក.ស.កឃុំ-សង្កាត់ ពិសេសការអភិវឌ្ឍសមត្ថភាពដល់ស្ត្រីបង្កើនថែមទៀតនូវអត្រានៃការចូលរួមរបស់ស្ត្រីជាអ្នកធ្វើសេចក្តីសម្រេចទាំងក្នុងវិស័យនយោបាយវិស័យមុខងារសាធារណៈ ព្រមទាំងជំរុញការលើកកម្ពស់ការអភិវឌ្ឍវិស័យសេវាសង្គម។ 

ឯកឧត្តមប្រធានសង្ឃឹមជឿជាក់ថា សិក្ខាសាលានេះបានរកឃើញនូវធាតុចូលសំខាន់ៗមួយចំនួនបន្ថែមទៀត ដើម្បីឆ្លុះបញ្ចាំងឱ្យឃើញនូវចំណុចខ្លាំង ចំណុចខ្វះខាត បទពិសោធន៍ អនុសាសន៍ ដើម្បីយកទៅអនុវត្តបន្ត ក្នុងឆ្នាំ២០២៥នេះ ឱ្យកាន់តែមានប្រសិទ្ធភាព និងសម្រេចបានជោគជ័យតាមផែនការដែលបានគ្រោងទុក និងបានផ្តាំផ្ញើដល់អង្គការដៃគូអភិវឌ្ឍន៍ និងអង្គការសមាគមនានា សូមបន្តកិច្ចសហការ និងគាំទ្រទាំងបច្ចេកទេស និងថវិកាដល់គ.ក.ស.កខេត្ត ក្រុង ស្រុក និងគ.ក.ស.ក ឃុំសង្កាត់ ក្រុមការងារលើកកម្ពស់វិស័យសេវាសង្គម និងក្រុមការងារកិច្ចការពារកុមារខេត្ត ក្នុងការបំពេញមុខងារ ភារកិច្ច របស់ខ្លួនឱ្យកាន់តែមានប្រសិទ្ធភាព៕

ដោយ ណយ នឿន (ប្រភព៖ រដ្ឋបាលខេត្តកណ្តាល)