AKP កណ្ដាល ថ្ងៃទី១៤ ខែមករា ឆ្នាំ២០២៥-- ថ្លែងក្នុងកិច្ចប្រជុំពិនិត្យ និងផ្តល់យោបល់របស់គណៈអភិបាលខេត្ត និងគណៈកម្មាធិការសម្របសម្រួលបច្ចេកទេស លើសេចក្តីព្រាងក្របខ័ណ្ឌអភិវឌ្ឍន៍ខេត្តរយៈពេល៥ឆ្នាំ (២០២៥-២០២៩) កម្មវិធីអភិវឌ្ឍន៍មូលដ្ឋានរយៈពេល ៥ឆ្នាំ (២០២៥-២០២៩) និងកម្មវិធីវិនិយោគបីឆ្នាំរំកិលខេត្ត (២០២៥-២០២៧) កាលពីថ្ងៃទី១៣ ខែមករា ឆ្នាំ២០២៤ ឯកឧត្ដម គួច ចំរើន អភិបាលខេត្តកណ្ដាល បានស្នើដល់អង្គប្រជុំទាំងមូល ត្រូវរួមគ្នាពិនិត្យ និងពិភាក្សាទៅលើទិន្នន័យ និងផែនការនានាឱ្យបានល្អិតល្អន់ច្បាស់លាស់ ដើម្បីធ្វើឱ្យខេត្តមានការអភិវឌ្ឍលើគ្រប់វិស័យ ជួយលើកកម្ពស់ជីវភាពរស់នៅរបស់ប្រជាពលរដ្ឋប្រកបដោយសុខុមាលភាព តាមរយៈការធ្វើឱ្យមានកំណើនសេដ្ឋកិច្ចកាត់បន្ថយភាពក្រីក្រឱ្យនៅកម្រិតទាបទៅតាមគោលដៅដែលរដ្ឋបាលខេត្តបានកំណត់។

ឯកឧត្តមអភិបាលខេត្តបានមានប្រសាសន៍ថា ក្នុងដំណើរការរៀបចំ និងកសាងផែនការអភិវឌ្ឍន៍ប្រាំឆ្នាំរបស់រដ្ឋបាលខេត្តគឺពិតមានសារៈសំខាន់ណាស់ដោយទាមទារឱ្យគ្រប់ភាគីពាក់ព័ន្ធទាំងអស់គិតគូរ និងពិចារណាឱ្យបានហ្មត់ចត់ទៅលើចក្ខុវិស័យគោលដៅ គោលបំណង និងយុទ្ធសាស្រ្តនៃការអភិវឌ្ឍសម្រាប់ខេត្តកណ្តាល។ កិច្ចប្រជុំនេះគឺជាធាតុចូលយ៉ាងសំខាន់ ដែលទាមទារឱ្យមានការពិនិត្យ និងគិតគូរឱ្យបានស៊ីជម្រៅ ដើម្បីដោះស្រាយលើកិច្ចអភិវឌ្ឍន៍មូលដ្ឋាននៅក្នុងដំណើរការនៃការកសាងផែនការអភិវឌ្ឍន៍ប្រាំឆ្នាំ ជាពិសេស ពិនិត្យលើការរៀបចំគម្រោងសកម្មភាពនានារបស់ខ្លួនសម្រាប់អនុវត្តនៅក្នុងឆ្នាំបន្តបន្ទាប់ ធ្វើយ៉ាងណាដើម្បីឆ្លើយតបទៅនឹងតម្រូវ ជាក់ស្តែងនៅថ្នាក់មូលដ្ឋានពិតប្រាកដ ហើយបញ្ចូលទៅក្នុងផ្នែកសេដ្ឋកិច្ច សង្គមកិច្ច ការគ្រប់គ្រងដីធ្លី ធនធានធម្មជាតិ បរិស្ថាន ការប្រែប្រួលអាកាសធាតុ និងគ្រោះមហន្តរាយ រដ្ឋបាលសន្តិសុខ និងសណ្តាប់ធ្នាប់សាធារណៈ។

ទន្ទឹមនឹងនេះ ឯកឧត្តមអភិបាលខេត្តបានបញ្ជាក់ទៀតថា ការងារសំខាន់ក្នុងកិច្ចប្រជុំនេះគឺដើម្បីពិនិត្យពិភាក្សាកែសម្រួល លើសេចក្តីព្រាងក្របខ័ណ្ឌអភិវឌ្ឍន៍ខេត្តរយៈពេល៥ឆ្នាំ (២០២៥-២០២៩) កម្មវិធីអភិវឌ្ឍន៍មូលដ្ឋានរយៈពេល៥ឆ្នាំ (២០២៥-២០២៩) និងកម្មវិធីវិនិយោគបីឆ្នាំរំកិលខេត្ត (២០២៥ -២០២៧) ឱ្យបានរួចរាល់ ដើម្បីដាក់ឯកសារទាំងនេះជូនជូនក្រុមប្រឹក្សាខេត្តពិនិត្យ និងអនុម័តនាពេលខាងមុខនេះ។ ដូច្នេះមន្ទីរពាក់ព័ន្ធ អាជ្ញាធរក្រុង-ស្រុក ត្រូវយកចិត្តទុកដាក់ពិភាក្សា ផ្តល់យោបល់ឱ្យបានផុលផុសដើម្បីក្រុមការងារធ្វើការបូកសរុប និងស្នើមន្ទីរ-អង្គភាពពាក់ព័ន្ធរៀបចំក្របខណ្ឌអភិវឌ្ឍន៍ និងកម្មវិធីអភិវឌ្ឍន៍មូលដ្ឋានឱ្យស្របតាមលទ្ធភាពសមត្ថភាពរបស់ខ្លួន និងតាមតម្រូវការជាក់ស្តែងរបស់ប្រជាជន៕

ដោយ ណយ នឿន (ប្រភព៖ រដ្ឋបាលខេត្តកណ្តាល)