AKP កំពង់ធំ ថ្ងៃទី១៣ ខែមករា ឆ្នាំ២០២៥-- ឯកឧត្តម នួន ផារ័ត្ន អភិបាលខេត្តកំពង់ធំ កាលពីល្ងាចថ្ងៃទី១២ ខែមករា ឆ្នាំ២០២៥ បានអញ្ជើញប្រគល់ពានដល់កីឡាករដែលទទួលបានជ័យលាភីក្នុងការប្រកួតកីឡាប៊ូល និងប៉េតង់ពានរង្វាន់មន្ទីររ៉ែ និងថាមពលខេត្តកំពង់ធំ ដើម្បីអបអរសាទរខួបលើកទី ៤៦ទិវាជ័យជម្នះ៧ មករា (៧ មករា ១៩៧៩-៧ មករា ២០២៥)។

ការប្រកួតប៊ូល និងប៉េតង់ពានរង្វាន់មន្ទីររ៉ែ និងថាមពលខេត្តកំពង់ធំ ប្រព្រឹត្តទៅនៅមន្ទីរគណបក្សប្រជាជនកម្ពុជាខេត្តកំពង់ធំ ដោយមានការចូលរួមពីក្លឹបប៊ូល និងប៉េតង់តាមបណ្ដារាជធានី-ខេត្តចំនួន៧មានចំនួន៤៨ក្រុមដែលមានកីឡាករ និងគណៈប្រតិភូសរុបចំនួន២៤០នាន់ ក្នុងនោះខេត្តកំពង់ចាមចំនួន៨ក្រុម ខេត្តសៀមរាបចំនួន៤ក្រុម ខេត្តកែបចំនួន៣ក្រុម រាជធានីភ្នំពេញចំនួន៤ក្រុម ខេត្តព្រះវិហារចំនួន៣ក្រុម ខេត្តបាត់ដំបងចំនួន១ក្រុម និងខេត្តកំពង់ធំចំនួន២៥ក្រុម។

ឆ្លងកាត់ការប្រកួតរយៈពេលមួយថ្ងៃពេញជាលទ្ធផលចំណាត់ថ្នាក់លេខ១បានទៅក្លឹបមន្ទីរ៉ែ និងថាមពលខេត្តកំពង់ធំ ចំណាត់ថ្នាក់លេខ២បានទៅក្លឹបដំរីសមកពីរាជធានីភ្នំពេញ ចំណាត់ថ្នាក់ទី៣បានទៅក្លឹបសន្តិភាពមកពីភ្នំពេញ និងក្លឹបគណបក្សប្រជាជនកម្ពុជាខេត្តកំពង់ចាម២មកពីខេត្តកំពង់ចាម៕

ដោយ ស៊ុម វណ្ណា