AKP កំពង់ធំ ថ្ងៃទី១៣ ខែមករា ឆ្នាំ២០២៥-- ឯកឧត្តម ចាន់ ស៊ីណាត រដ្ឋលេខាធិការក្រសួងធនធានទឹក និងឧតុនិយម និងជាប្រធានក្រុមការងារចុះមូលដ្ឋានឃុំចំណាលើ បានមានប្រសាសន៍លើកឡើងថា អគារស្នាក់ការគណបក្ស និងសំណង់សិល្បការជាច្រើននៅក្នុងឃុំចំណាលើនឹងជួយគណបក្ស និងសេដ្ឋកិច្ចប្រជាជនក្នុងមូលដ្ឋានឱ្យកាន់តែប្រសើរឡើង។

ឯកឧត្តម ចាន់ ស៊ីណាត បានមានប្រសាសន៍ដូចនេះក្នុងឱកាសអញ្ជើញជាអធិបតីភាពក្នុងពិធីបញ្ចុះបឋមសិលាកសាងអគារស្នាក់ការគណបក្សប្រជាជនកម្ពុជាឃុំចំណាលើ និងសំណង់សិល្បការជាច្រើនទៀតនៅឃុំចំណាលើ ស្រុកស្ទោង ខេត្តកំពង់ធំ កាលពីថ្ងៃទី១២ ខែមករា ឆ្នាំ២០២៥។

ទន្ទឹមនឹងនេះ ឯកឧត្តមបានជំរុញ និងលើកទឹកចិត្តដល់យុជនគណបក្ស និងក្រុមការងារត្រូវខិតខំបំពេញកិច្ចការរបស់ខ្លួន ជាពិសេសកិច្ចការទូទៅបម្រើជូនប្រជាពលរដ្ឋក្នុងមូលដ្ឋានប្រកបដោយនិរន្តរភាពនិងស្និទ្ធស្នាមព្រមទាំងប្រកបដោយគុណភាពប្រសិទ្ធភាព។ អគារស្នាក់ការគណបក្ស និងសំណង់សិល្បការថ្មីៗនៅទីនេះកាន់តែជួយពន្លឿន និងមានភាពងាយស្រួលដល់គណបក្ស និងក្រុមការងារជាពិសេសអាចជួយដល់ពុក ម៉ែ បងប្អូន ប្រជាពលរដ្ឋនៅក្នុងមូលដ្ឋានប្រើប្រាស់ទីនេះជាទីកន្លែងសម្រាប់ប្រារព្ធពិធីផ្សេងៗ ដូចជាពិធីមង្គលការ ពិធីបុណ្យទានផ្សេងៗ ឬពិធីជួបជុំណាមួយ ព្រមទាំងប្រើប្រាស់ និងអាស្រ័យផលលើស្រះទឹកយក្សដែលមានទំហំជាច្រើនម៉ឺនម៉ែត្រគូប ក្នុងការប្រើប្រាស់សម្រាប់ជីវភាពប្រចាំថ្ងៃ ឆ្លើយតបទៅនឹងគ្រោះរាំងស្ងួត ក៏ដូចជាស្រោចស្រពស្រែចម្ការ ច្បារដំណាំតាមស្ថានភាពជាក់ស្តែងចាំបាច់ និងអាចធ្វើទៅបាន។

ឯកឧត្តមបានថ្លែងអំណរគុណដល់អាជ្ញាធរស្រុកស្ទោង ប្រជាពលរដ្ឋនៅក្នុងមូលដ្ឋានជាពិសេសឃុំចំណើលើដែលបានចូលរួមសហការយ៉ាងធំធេងក្នុងការផ្ដល់ ស្វាគមន៍ និងបើកផ្លូវឱ្យបានធំទូលាយ និងបានធ្វើផ្លូវបេតុងថ្មីប្រវែងជាង១០គីឡូម៉ែត្រ ប្រកបដោយបទដ្ឋានបច្ចេកទេស រឹងមាំ និងប្រើប្រាស់បានយូរ។

សូមបញ្ជាក់ថា ការបញ្ចុះបឋមសិលាសាងសង់នៅពេលនេះរួមមាន អគារស្នាក់ការគណបក្ស១ខ្នង អគារស្នាក់នៅស្រះទឹកយក្យ១រួមជាមួយផ្លូវបេតុងប្រវែងជាង១០គីឡូម៉ែត្រផងដែរ៕

ដោយ ស៊ុម វណ្ណា