AKP ភ្នំពេញ ថ្ងៃទី១២ ខែមករា ឆ្នាំ២០២៥–ឯកឧត្ដម ឃួង ស្រេង អភិបាលរាជធានីភ្នំពេញ បានបញ្ជាឱ្យមន្ដ្រីមន្ទីរសុខាភិបាលរាជធានីភ្នំពេញ ចុះបាញ់ថ្នាំសម្លាប់សត្វមូសនៅមូលដ្ឋានខណ្ឌទាំង១៤ជូនពលរដ្ឋ ដើម្បីបង្ការជំងឺគ្រុនឈាម ។

ឯកឧត្ដម ឃួង ស្រេង អភិបាលរាជធានីភ្នំពេញ បានគិតគូរពីបញ្ហាសុខភាពសាធារណៈជូនពលរដ្ឋ រស់នៅក្នុងមូលដ្ឋាននៅដើមខែមករា ឆ្នាំ២០២៥ អាជ្ញាធរខណ្ឌទាំង១៤ ត្រូវសហការជាមួយក្រុមការងាររបស់មន្ទីរសុខាភិបាលរាជធានីភ្នំពេញបន្ដបើកយុទ្ធនាការចុះធ្វើការបាញ់ថ្នាំសម្លាប់មូសនៅមូលដ្ឋានរបស់ខ្លួន ដើម្បីបង្ការនិងទប់ស្កាត់ជំងឺគ្រុនឈាម ជូនពលរដ្ឋឱ្យបានល្អប្រសើរ ខណៈជំងឺគ្រុនឈាម កំពុងផ្ទុះឡើងវិញនៅកម្ពុជា  ។

ជាក់ស្ដែងអាជ្ញាធរខណ្ឌច្បារអំពៅនៅថ្ងៃអាទិត្យ ទី១២ ខែមករា ឆ្នាំ២០២៥  បានចុះបាញ់ថ្នាំសម្លាប់សត្វមូស តាមបណ្ដោយផ្លូវមាត់ទន្លេ ក្នុងភូមិព្រែក សង្កាត់ច្បារអំពៅទី១ និងក្នុងភូមិដើមចាន់ និងភូមិដើមចាន់១ សង្កាត់ច្បារអំពៅទី២ ។

មន្ដ្រីជំនាញខណ្ឌច្បារអំពៅ បានបញ្ជាក់ថា៖ប្រជាពលរដ្ឋនៅសង្កាត់ច្បារអំពៅទី១និងសង្កាត់ច្បារអំពៅទី២បានសម្តែងនូវទឹកចិត្តរីករាយយ៉ាងក្រៃលែងជាខ្លាំង នឹង ថ្លែងអំណរគុណយ៉ាងជ្រាលជ្រៅចំពោះឯកឧត្តម ឃួង ស្រេង អភិបាលរាជធានីភ្នំពេញ ដែលបានយកចិត្តទុកដាក់គិតគូរពីសុខទុក្ខពួកគាត់។

ចំណែកឯរដ្ឋបាលខណ្ឌចំការមនវិញ ដោយមានការយកចិត្តទុកដាក់ចង្អុលបង្ហាញពី ឯកឧត្ដម ឃួង ស្រេង អភិ បាលរាជធានី ភ្នំពេញ បានគិតគូរពីបញ្ហាសុខភាពសាធារណៈរបស់ប្រជាពលរដ្ឋ ដែលរស់នៅក្នុងមូលដ្ឋាន លោក កៀង ល័ក្ស អភិបាលខណ្ឌចំការមន បានចាត់ឱ្យក្រុមការងាររដ្ឋបាលខណ្ឌចំការមនចុះបាញ់ថ្នាំមូសនៅមូលដ្ឋានសង្កាត់ផ្សារដើមថ្កូវ និងសង្កាត់ទន្លេបាសាក់។
   ការបាញ់នេះដោយមានការចូលរួមពីកម្លាំងខណ្ឌ ៣នាក់កម្លាំងសង្កាត់-ភូមិសរុប ១៥នាក់,អ្នកបាញ់ថ្នាំ២នាក់នៅវេលាម៉ោង១៧នឹង០០នាទីល្ងាចថ្ងៃទី១០ ខែមករា ឆ្នាំ២០២៥ កម្លាំងបាញ់ថ្នាំបានចាប់ផ្តេីមបាញ់នៅតាមបណ្តាភូមិ១ ភូមិ២ ក្នុងសង្កាត់ផ្សារដើមថ្កូវ និងភូមិ៩ ភូមិ១៦ ក្នុងសង្កាត់ផ្សារដើមថ្កូវ។

ក្នុងការបាញ់ថ្នាំមូសនេះបានប្រេីប្រាស់ម៉ាសុីនបាញ់ថ្នាំ ចំនួន ០២ គ្រឿង ប្រេងម៉ាស៊ូតចំនួន  ៤០លីត្រ សាំង ១៥លីត្រ ថ្នាំមូសចំនួន ០៣កំប៉ុង។  នៅវេលាម៉ោង២១នឹង ៥០នាទីថ្ងៃខែឆ្នាំដដែល  ក្រុមការងារបាញ់ថ្នាំរបស់រដ្ឋបាលខណ្ឌចំការមនបានបញ្ចប់ការបាញ់ថ្នាំនៅក្នុង ភូមិ៩ ក្នុងសង្កាត់ទន្លេបាសាក់ ខណ្ឌចំការមន។នៅវេលាម៉ោង២១ នឹង០០នាទីថ្ងៃទី១១ខែមករាឆ្នាំដដែលនេះក្រុមការងារបាញ់ថ្នាំរបស់រដ្ឋបាលខណ្ឌចំការមនបានបញ្ចប់នៅក្នុង ភូមិ៩ ក្នុងសង្កាត់ទន្លេបាសាក់ ខណ្ឌចំការមន។

ក្រោយពីកម្លាំងបាញ់ថ្នាំរបស់រដ្ឋបាលខណ្ឌចំការមន ចុះទៅបាញ់ថ្នាំសម្លាប់មូសរួចរាល់ ប្រជាពលរដ្ឋ នៅក្នុងមូលដ្ឋានខណ្ឌចំការមនបានសម្តែងនូវទឹកចិត្តរីករាយយ៉ាងក្រៃលែងជាខ្លាំង សូមថ្លែងអំណរគុណយ៉ាងជ្រាលជ្រៅចំពោះឯកឧត្តម ឃួង ស្រេង អភិបាលរាជធានីភ្នំពេញ លោកកៀង ល័ក្ស អភិបាលខណ្ឌចំការមន និងក្រុមការងាររបស់ រដ្ឋបាលខណ្ឌចំការមន ដែលតែងតែគិតគូរពីសុខភាពសាធារណៈរបស់បងប្អូនអាជីវករ ប្រជាពលរដ្ឋដែលស្ថិតនៅក្នុងមូលដ្ឋាន ខណ្ឌចំការមន។

ឯកឧត្តម ឃួង ស្រេង អភិបាលរាជធានីភ្នំពេញ នៅរសៀលថ្ងៃទី១១ ខែមករា ឆ្នាំ២០២៥ រដ្ឋបាលខណ្ឌពោធិ៍សែនជ័យ ដឹកនាំដោយលោក សក់ ច័ន្ទកញ្ញារិទ្ធ អភិបាល នៃគណៈអភិបាលខណ្ឌពោធិ៍សែនជ័យ បានឱ្យកម្លាំងចុះបាញ់ថ្នាំសម្លាប់មូសតាមបណ្តោយផ្លូវរថភ្លើង បានចំនួន៣ភូមិ ស្ថិតនៅសង្កាត់កាកាបទី១ ខណ្ឌពោធិ៍សែនជ័យ។ ក្រុមការងារបានបញ្ចប់ការបាញ់ថ្នាំសម្លាប់មូសនៅវេលាម៉ោង ១៩:០០យប់។ នៅយប់ថ្ងៃសៅរ៍ទី១១ ខែមករា ឆ្នាំ២០២៥ លោក សេង គន្ធ អភិបាលខណ្ឌមានជ័យ បានដឹកនាំកម្លាំងគណៈបញ្ជាការឯកភាពខណ្ឌមានជ័យ សហការជាមួយកម្លាំងរបស់សង្កាត់ចាក់អង្រែលើ បានចុះបាញ់ថ្នាំសម្លាប់មូស ជូនដល់បងប្អូនប្រជាពលរដ្ឋ ក្នុងភូមិព្រែកតានូ និងភូមិព្រែកតានូ១ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ។ ក្នុងនោះបាញ់បានភូមិព្រែកតានូ មាន៤៣៧ ខ្នងផ្ទះភូមិព្រែកតានូ១មាន២៧៥ខ្នងផ្ទះ៕

ដោយ៖ សួស សំរិត