AKP សៀមរាប ថ្ងៃទី១០ ខែមករា ឆ្នាំ២០២៥--

អង្គការ (Playground For Children នឹង Rotary Club) នៃប្រទេសកូរ៉េខាងត្បូង បានជួយសាងសង់សួនកុមារមួយកន្លែង ជូនដល់សាលាបឋមសិក្សាធ្លូកអណ្តូង ស្ថិតនៅសង្កាត់ស្លក្រាម ក្រុងសៀមរាប ខេត្តសៀមរាប ដោយថវិកាសាងសង់បានមកតាមរយៈ លោក អាន់ ឆេ កល់ (An Je-geol) លោក  គិម សាំង ស៊ូ (Kim Sang-su) នឹងលោក ខ្វន់ យ៉ុងថេ (Kwon Yong-tae) ហើយត្រូវបានសម្ពោធដាក់ឱ្យប្រើប្រាស់នៅព្រឹកថ្ងៃទី១០ ខែមករា ឆ្នាំ២០២៥។

ថ្លែងក្នុងពិធីសម្ពោធសួនកុមារនោះ លោក ឈុន ម៉េង អនុប្រធានការិយាល័យអប់រំក្រុងសៀមរាប ខេត្តសៀមរាប បានលើកឡើងថា ការរៀបចំសួនកុមារ ឬកន្លែងក្មេងលេងដែលមានផាសសុខភាព នៅតាមសាលាបឋមសិក្សា គឺជាចំណែកមួយដ៏សំខាន់សម្រាប់ទាក់ទាញឱ្យក្មេងៗចង់មករៀន។ បច្ចុប្បន្ននេះ អាជ្ញាធរតែងតែអំពាវនាវឱ្យឪពុក ម្តាយ យកកូនដែលគ្រប់អាយុទៅចុះឈ្មោះចូលរៀន ប៉ុន្តែមានក្មេងៗមួយចំនួនគាត់មិនចង់ទៅរៀនទេ ព្រោះទៅរៀនអត់បានលេង។ ដូចនេះលោកយល់ឃើញថា ការរៀបចំឱ្យមានសួនកុមារនៅតាមសាលាបឋមសិក្សានេះ គឺមានសារៈសំខាន់ព្រោះក្មេងៗគាត់បានរៀនផង បានលេងកីឡាធ្វើឱ្យសុខភាពផ្លូវចិត្តផ្លូវកាយរឹងមាំផង ធ្វើឱ្យពួកគាត់ចង់មករៀនរាល់ថ្ងៃ។ លោក ក៏បានថ្លែងអំណរគុណយ៉ាងជ្រាលជ្រៅចំពោះអង្គការ (Playground For Children នឹងRotary Club) នៃប្រទេសកូរ៉េខាងត្បុង ដែលបានជួយសាងសង់សួនកុមារនេះ ដើម្បីធ្វើឱ្យកុមារតូចៗមានសុខភាពផ្លូវចិត្តផ្លូវកាយរឹងមាំ និងរៀនសូត្រឆាប់ចេះឆាប់ចាំផងដែរ។

ទន្ទឹមនឹងនេះ លោក ខ្វន់ យ៉ុងថេ (Kwon Yong-tae) តំណាងឱ្យអង្គការ (Playground For Children នឹងRotary Club) នៃប្រទេសកូរ៉េខាងត្បូង បានលើកឡើងថា ការជួយសាងសង់សួនកុមារជូនដល់សិស្សានុសិស្សនៅទីនេះ គឺចង់ឱ្យក្មេងបានលេងកម្សាន្ត ធ្វើឱ្យសុខភាពពួកគាត់ល្អ ដូចលេងកីឡាចឹងដែរ ជាពិសេសចង់ចូលរួមជាមួយរាជរដ្ឋាភិបាលកម្ពុជា ក្នុងការបណ្តុះបណ្តាលធនធានមនុស្ស នៅតាមមូលដ្ឋាន។

លោកបានបន្តថា អង្គការរបស់លោកនៅតែបន្តជួយដល់សិស្សានុសិស្សក្រីក្រនៅកម្ពុជា ទៅតាមលទ្ធភាពដែលអង្គការអាចធ្វើទៅបាន ហើយរហូតមកដល់ពេលនេះ បានជួយសាងសង់សួនកុមារនេះ បានប្រមាណជា៧០កន្លែងហើយទូទាំងប្រទេសកម្ពុជា។ តែឥឡូវពួកគាត់បានចាប់ផ្ដើមបន្តការងារនេះទៀត ព្រោះគិតថាសួនកុមារនេះ មានប្រយោជន៍ខ្លាំងណាស់សម្រាប់រាងកាយរបស់កុមារ ក៏ដូចជាការរអភិវឌ្ឍផ្លូវចិត្តជាដើម ជាពិសេស សួនកម្សាន្តនេះ ចូលរួមចំណែកយ៉ាងច្រើនក្នុងការបង្កើនចំណង់ ធ្វើឱ្យសិស្សចង់មករៀនកាន់តែច្រើន៕

ដោយ ឃុត សៅ