AKP ភ្នំពេញ ថ្ងៃទី១០ ខែមករា ឆ្នាំ២០២៥ -- ជ្រលងភ្នំហូលីវូដបានក្លាយជាតំបន់នៃករណីភ្លើងឆេះព្រៃក្នុងទីក្រុងឡូសអេនជែឡេស (Los Angeles)ចុងក្រោយបំផុតកាលពីយប់ថ្ងៃពុធ ខណៈដែលអ្នកពន្លត់អគ្គីភ័យបានព្យាយាមទប់ទល់នឹងករណីភ្លើងឆេះព្រៃដែលបានឆក់យកអាយុជីវិតមនុស្សយ៉ាងហោចណាស់ ០៥នាក់ និងបានបំផ្លាញផ្ទះសម្បែង អាជីវកម្ម និងអគារផ្សេងៗទៀតប្រមាណ ១.១០០ខ្នងនេះ។

យោងតាមអង្គការសម្ព័ន្ធភ្លើងឆេះព្រៃ (Wildfire Alliance) បានឱ្យដឹងថា ករណីអគ្គីភ័យនៅក្នុងសង្កាត់ Pacific Palisades គឺជាការបំផ្លិចបំផ្លាញបំផុតនៅក្នុងប្រវត្តិសាស្ត្ររបស់ទីក្រុងឡូសអេនជែឡេស ហើយវានៅតែជាករណីភ្លើងឆេះដ៏ធំបំផុត បន្ទាប់ពីវាបានផ្ទុះឡើងជាលើកដំបូងកាលពីថ្ងៃអង្គារ ដោយបានឆេះក្នុងទំហំ ១៥.៨៣២ហិចតានៅជិតតំបន់ឆ្នេរសមុទ្រ។
 

ករណីភ្លើងឆេះព្រៃនៅតំបន់ជ្រលងភ្នំហូលីវូដ បានកើនឡើងដល់ជាង៦០ហិចតាហើយ ដែលនៅជិតនឹងជ្រលងភ្នំរ៉ាន់យ៉ុន (Runyon) ដ៏ល្បី ដែលធ្វើឱ្យវាក្លាយជាកន្លែងចុងក្រោយបង្អស់នៃគ្រោះមហន្តរាយនេះ ដែលបង្កការបំផ្លិចបំផ្លាញនៅទូទាំងតំបន់ឡូសអេនជែឡេស។ បទបញ្ជាជម្លៀសចេញត្រូវបានដាក់ចេញនៅក្នុងតំបន់នោះ នៅពេលដែលភ្លើងឆេះយ៉ាងលឿនផ្លាស់ទីទៅភាគនិរតីឆ្ពោះទៅកាន់មហាវិថីហូលីវូដ ដែលជាទីតាំងប្រវត្តិសាស្ត្រមួយ។

ជាមួយនឹងការបន្ថែមតំបន់ដែលរងការឆេះនេះ បានធ្វើឱ្យចំនួននៃការឆាបឆេះយ៉ាងសកម្មនៅក្នុងទីក្រុងបានកើនឡើងដល់៥ ដែលបង្ខំឱ្យអ្នកស្រុកជាង ១០០.០០០នាក់ត្រូវភៀសខ្លួនចេញពីផ្ទះរបស់ពួកគេ។

ជម្រកសុវត្ថិភាពជាច្រើនត្រូវបានបង្កើតឡើងនៅក្នុងតំបន់ផ្សេងៗនៃទីក្រុងនោះសម្រាប់ជនភៀសខ្លួន៕

ដោយ៖ យា ចិន្ដាខន្ដី (ប្រភព៖ AA-AKP)