AKP កំពង់ស្ពឺ ថ្ងៃទី០៧ ខែមករា ឆ្នាំ២០២៥--នៅរង្វង់មូលវិមានឯករាជ្យ នាព្រឹកថ្ងៃទី០៧ ខែមករា ឆ្នាំ២០២៥នេះ រដ្ឋបាលខេត្តកំពង់ស្ពឺ បានរៀបចំពិធីអបអរសាទរខួបអនុស្សាវរីយ៍ជ័យជម្នះលើកទី ៤៦ (៧ មករា ១៩៧៩-២០២៥) ក្រោមអធិបតីភាពដ៏ខ្ពង់ខ្ពស់ឯកឧត្តម ហ៊ុន ម៉ានី ឧបនាយករដ្ឋមន្ត្រីរដ្ឋមន្ត្រីក្រសួងមុខងារសាធារណៈប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ស្ពឺ បានអានសន្ទរកថារបស់សម្ដេចអគ្គមហា សេនាបតីតេជោ ហ៊ុន សែន ប្រធានព្រឹទ្ធសភា ជូនដល់បងប្អូនជាមន្ត្រីរាជការ សិស្សានុសិស្ស និងប្រជាពលរដ្ឋ ប្រមាណជាង ៤៥០០ នាក់។

ឯកឧត្តម ហ៊ុន ម៉ានី ឧបនាយករដ្ឋមន្រ្តី រដ្ឋមន្រ្តីក្រសួងមុខងារសាធារណៈ និង​ជា​ប្រធាន​ក្រុមការងាររាជរដ្ឋាភិបាលចុះជួយខេត្តកំពង់ស្ពឺ បានលើកឡើងថា ខួបទី៤៦នៃទិវា​ជ័យជំ​នះ ៧មករា គឺជាថ្ងៃដែលប្រជាជាតិរស់រានមានជីវិតឡើងវិញពីជ្រោះមរណៈនៃ​របបបន​ប្រល័យពូជសាសន៍ ប៉ុល ពត។ការលើកឡើងដូច្នេះក្នុងពិធីអបអរសាទរខួបទី៤៦នៃទិវាជ័យជំនះ៧មករាឆ្នាំ១៩៧៩ -៧ មករា ឆ្នាំ២០២៥នៅវិមានឯករាជ្យខេត្តកំពង់ស្ពឺ ថ្ងៃទី៧ ខែមករា ឆ្នាំ២០២៥។

ឯកឧត្តមឧបនាយករដ្ឋមន្ត្រី ហ៊ុន ម៉ានី បានរឭកអំពីគុណបំណាច់នៃថ្ងៃ៧មករា ឆ្នាំ១៩៧៩ ខណៈថ្ងៃនេះត្រូវបានប្រជាពលរដ្ឋខ្មែរទូទាំងប្រទេសចងចាំមិនអាចបំភ្លេចបាន ហើយ​ថែម​ទាំង​ប្រសិទ្ធ​នាម​ថាជាថ្ងៃកំណើតទី២របស់ពួកគាត់ដែលបាន​រួច​ផុ​ត​ពី​របប​ដ៏​ខ្មៅ​ងងឹត​របស់​ខ្មែរ​ក្រហម​។

ឯកឧត្តម​បានលើកឡើងបន្ថែមថា៧មករា កើតចេញពីការងើបឡើងតស៊ូរបស់យុទ្ធជន ដែល​មិន​អាច​ទ្រាំ​ឃើញ​ប្រជាជន​រងទុក្ខវេទនា ក្នុងសោកនាដកម្មអស់រយៈពេល៣ឆ្នាំ ៨ខែ និង២០ថ្ងៃ។ហើយបើ​គ្មាន​ការ​ចាក​ចេញទៅស្វែងរកការសង្រ្គោះជាតិពីសំណាក់សម្តេចតេជោ នៅថ្ងៃទី២០ ខែមិថុនា ឆ្នាំ១៩៧៧ និង​ការប្រមូលផ្តុំនៃកម្លាំងពីទិសនានា ក៏គ្មានរណសិរ្សសាមគ្គីសង្រ្គោះជាតិកម្ពុជាដែរ។

ជាមួយនោះឧបនាយករដ្ឋមន្រ្តីនិងជាប្រធានក្រុមការងារចុះជួយ ក៏បានបញ្ជាក់បន្ថែមទៀតថា នេះជាសច្ចធម៌ប្រវត្តិសាស្រ្តមួយដែលមិនអាចប្រកែកបាន។ក្នុងនាមយើង​ខ្ញុំ​ជា​យុ​វជនជំនាន់ក្រោយចងចាំជានិច្ចគុណូបការៈដ៏ធំធេងនៃថ្ងៃ ៧មករា ដែលជា​ចំណុច​ផ្តើម​នៃ​ដំណើរ​ស្វែង​រកសន្តិភាព និងការអភិវឌ្ឍជាបន្តបន្ទាប់ រហូតមកដល់យើង​មានអ្វីៗ​ដូច​សព្វថ្ងៃ​នេះ​។ហើយថ្ងៃ ៧មករា នឹងឋិតនៅក្នុងបេះដូងរបស់យើងជារៀងរហូតតទៅ។

សូមបញ្ជាក់ផងដែរថា ថ្ងៃ ៧មករា ឆ្នាំ១៩៧៩ គឺជាទិវា​មហាជ័យជំ​នៈ របស់​​ប្រជា​ជន​កម្ពុជា​លើប​ន​ប្រល័យ​ពូជសាសន៍ ប៉ុល ពត ដោយកម្ពុជាបានបិទនូវទំព័រសករាជដ៏ខ្មៅងងឹតរបស់ខ្លួន ហើយ​បើក​ចេញ​នូវទំព័រសករាជថ្មីគឺសករាជឯករាជ្យ សេរីភាព ប្រជាធិបតេយ្យ និងវឌ្ឍនភាពសង្គម ហើ​យ​ជ័យ​ជម្នះនេះក៏បានឆ្លាក់ជាប់ក្នុងប្រវត្តិសាស្រ្ត និងជាព្រឹត្តិការណ៍​សំខាន់​មួយ​នៃ​សាមគ្គី​ភាព​ដ៏​បរិសុទ្ធ ស្មោះត្រង់ និងមិត្តភាពដ៏ពិសេសរវាងកងទ័ពកម្ពុជា និងវៀតណាមផងដែរ។បើ​គិតមកដល់ឆ្នាំ២០២៥នេះ គឺមានរយៈពេល៤៦ឆ្នាំហើយ ចាប់តាំង​ពី​ប្រជាជនកម្ពុជា​ត្រូវ​បាន​រំដោះ​ចេ​ញ​ពី​របប​ប្រល័យ​ពូជសាសន៍​ដ៏​ឃោឃៅរបស់​ខ្មែរ​ក្រហមដែលដឹកនាំដោយ ប៉ុល ពត គឺជាស្លាក់ស្នាមនិងការឈឺចាប់​ដោយ​មិន​អាច​បំភ្លេច​បាន​ឡើ​យ។ យ៉ាងណាក៏ដោយក្រោយថ្ងៃ៧មករា ឆ្នាំ​១៩៧៩ ប្រទេសកម្ពុជា ក្រោមការដឹកនាំដោយគណបក្ស ប្រជាជន​កម្ពុ​ជាបា​ន​ធ្វើ​ឱ្យប្រទេស​​មាន​សុខ​សន្តិភាព និងការអភិវឌ្ឍជាបន្តបន្ទាប់រហូតដល់សព្វថ្ងៃនេះ៕

ដោយ៖ គង់ សិរីរ័ត្ន, ប្រភព៖ AKP-កំពង់ស្ពឺ