AKP ភ្នំពេញ ថ្ងៃទី០៧ ខែមករា ឆ្នាំ២០២៤-- ក្រសួងអប់រំ យុវជន និងកីឡា បានធ្វើការជូនដំណឹងដល់លោកគ្រូ អ្នកគ្រូ ដែលកំពុងបង្រៀននៅ តាមសាលារៀនបឋមសិក្សា មធ្យមសិក្សា ឬសាលាគរុកោសល្យនៅទូទាំងព្រះរាជាណាចក្រកម្ពុជា ថា សម្រាប់ឆ្នាំ២០២៥នេះ កម្មវិធីអាហារូបករណ៍ Teacher Training Students របស់ក្រសួងអប់រំ វប្បធម៌ កីឡា វិទ្យាសាស្ត្រ និងបច្ចេកវិទ្យា នៃប្រទេសជប៉ុន នឹងផ្តល់អាហារូបករណ៍មួយ ចំនួនដល់គ្រូបង្រៀនកម្ពុជា ដើម្បីទៅសិក្សាស្រាវជ្រាវលើវិស័យអប់រំនៅប្រទេសជប៉ុន ចាប់ពីខែកញ្ញា ឬតុលា ឆ្នាំ២០២៥ ដោយភាគីជប៉ុននឹងផ្តល់ប្រាក់អាហារូបករណ៍សម្រាប់ផ្គត់ផ្គង់ការរស់ នៅ រ៉ាប់រងថ្លៃសេវាសុខភាព ការស្នាក់នៅ និងថ្លៃសំបុត្រយន្តហោះទៅមក។

ចំពោះលក្ខខណ្ឌនៃការចុះឈ្មោះ បេក្ខជនត្រូវមានសញ្ជាតិខ្មែរ បានបញ្ចប់ការសិក្សាពីសាលាគរុកោសល្យណាមួយ និងកំពុងបង្រៀននៅតាមសាលារៀនបឋមសិក្សា សាលារៀនមធ្យមសិក្សា ឬសាលាគរុកោសល្យនានានៅកម្ពុជា ដែលមានរយៈពេលបំពេញការងារយ៉ាងតិច០៥ឆ្នាំ គិតដល់ ថ្ងៃទី០១ ខែតុលា ឆ្នាំ២០២៥ មានអាយុមិនលើសពី៣៥ឆ្នាំ (កើតត្រឹម ឬក្រោយថ្ងៃទី០២ ខែមេសា ឆ្នាំ១៩៩០) មានចំណេះដឹងភាសាអង់គ្លេសកម្រិតមធ្យម និងមានឆន្ទៈសិក្សាភាសាជប៉ុន មានសុខភាពល្អបរិបូណ៌ ទាំងកាយសម្បទា និងសតិបញ្ញា។

បេក្ខជនដែលមានចំណាប់អារម្មណ៍ចំពោះកម្មវិធីអាហារូបករណ៍ខាងលើ សូមទាញយកពាក្យស្នើ សុំអាហារូបករណ៍ជាភាសាអង់គ្លេសពី https://www.studyinjapan.go.jp/en/smap-stopj-applications-teacher.html ក្នុងគេហទំព័ររបស់ស្ថានទូតជប៉ុន ប្រចាំព្រះរាជាណាចក្រកម្ពុជា និងពាក្យសុំប្រឡងអាហារូបករណ៍ជាភាសាខ្មែរ (ដូចមានជូនភ្ជាប់ក្នុង QR Code ខាងក្រោម) មកបំពេញ ដោយចាំបាច់ត្រូវភ្ជាប់មកជាមួយព្រឹត្តិបត្រពិន្ទុពីសាលាគរុកោសល្យណាមួយ ដែល បេក្ខជនបានសិក្សា (មជ្ឈមណ្ឌលគរុកោសល្យភូមិភាគ សាលាគរុកោសល្យ និងវិក្រឹតការខេត្ត ជាដើម) រួចយកទៅដាក់នៅនាយកដ្ឋានសហប្រតិបត្តិការអន្តរជាតិ និងកិច្ចការអាស៊ាន ដែលមានអាសយដ្ឋានអគារលេខ២៣ ផ្លូវលេខ៣៦០ សង្កាត់បឹងកេងកង១ ខណ្ឌបឹងកេងកង រាជធានីភ្នំពេញឱ្យបានមុនថ្ងៃទី១៧ ខែមករា ឆ្នាំ២០២៥ វេលាម៉ោង១៦៖០០នាទី។

ចំពោះកាលបរិច្ឆេទ និងទីកន្លែងនៃការប្រឡង ក្រសួងអប់រំ យុវជន និងកីឡា សហការជាមួយ ស្ថានទូតជប៉ុន នឹងរៀបចំការប្រឡងវិញ្ញាសាសំណេរភាសាជប៉ុន និងភាសាអង់គ្លេស នាថ្ងៃទី១៧ ខែកុម្ភៈ ឆ្នាំ២០២៥ នៅស្ថានទូតជប៉ុន ប្រចាំព្រះរាជាណាចក្រកម្ពុជា។

សម្រាប់ព័ត៌មានបន្ថែមពីកម្មវិធីអាហារូបករណ៍ខាងលើបេក្ខជនអាចទាក់ទងសាកសួរតាមទូរសព្ទលេខ ០៩៨ ៩៨៩ ៧៨៩ ឬទាក់ទងនាយកដ្ឋានសហប្រតិបត្តិការអន្តរជាតិ និងកិច្ចការអាស៊ាន តាមអាសយដ្ឋានខាងលើ៕

ដោយ៖ ចាន់ សុភឿន (ប្រភព៖ ក្រសួងអប់រំ)