AKP ភ្នំពេញ ថ្ងៃទី០៧ ខែមករា ឆ្នាំ២០២៤-- សម្រាប់ឆ្នាំសិក្សា២០២៥-២០២៦ រដ្ឋាភិបាលសហព័ន្ធរុស្ស៊ី បានផ្តល់អាហារូបករណ៍ចំនួន៤០ កន្លែងដល់សិស្ស និស្សិត និងមន្ត្រីរាជការកម្ពុជា ដើម្បីទៅបន្តការសិក្សាថ្នាក់ជំនាញឯកទេស បរិញ្ញាបត្រ បរិញ្ញាបត្រជាន់ខ្ពស់ និងបណ្ឌិត នៅសហព័ន្ធរុស្ស៊ី ក្នុងនោះចំនួន០១កន្លែងសម្រាប់ ជំនាញសិល្បៈ វប្បធម៌ តូរ្យតន្ត្រី ចម្រៀង ភាពយន្ត ចំនួន០៣កន្លែងសម្រាប់ជំនាញនុយក្លេអ៊ែរ ស៊ីវិល និងជំនាញផ្សេងៗទៀត ចំនួន៣៦កន្លែងសម្រាប់ការសិក្សាជំនាញវេជ្ជសាស្ត្រ វិស្វកម្មយន្ត ហោះ វិស្វកម្មមេកានិច សំណង់ស៊ីវិល ស្ថាបត្យកម្ម ព័ត៌មានវិទ្យា ទំនាក់ទំនងអន្តរជាតិ វិទ្យាសាស្ត្រនយោបាយ សេដ្ឋកិច្ច គ្រប់គ្រង នីតិសាស្ត្រ បរិស្ថាន វិទ្យាសាស្ត្រអាហារូបត្ថម្ភ កសិកម្ម ទេសចរណ៍។ល។ នេះបើតាមសេចក្តីជូនដំណឹងរបស់ក្រសួងអប់រំ យុវជន និងកីឡា។

ចំពោះបេក្ខជនដែលមានបំណងចូលរួមក្នុងកម្មវិធីអាហារូបករណ៍នេះ ត្រូវចុះឈ្មោះតាមរយៈ https://education-in-russia.com ចាប់ពីថ្ងៃផ្សាយដំណឹងរហូតដល់ថ្ងៃទី១៥ ខែមករា ឆ្នាំ ២០២៥។

សម្រាប់ព័ត៌មានលម្អិត សូមទំនាក់ទំនងដោយផ្ទាល់ជាមួយមជ្ឈមណ្ឌលវិទ្យាសាស្ត្រ និងវប្បធម៌ រុស្ស៊ី ដែលមានអាសយដ្ឋានអគារលេខ១០៣ មហាវិថីព្រះនរោត្តម (ទល់មុខក្រសួងអប់រំ យុវជន និងកីឡា) ទូរស័ព្ទលេខ ០២៣ ២១៣ ៥០៨ ឬតាមរយៈ Facebookhttps://facebook. com/ rcckcam៕

ដោយ៖ ចាន់ សុភឿន (ប្រភព៖ ក្រសួងអប់រំ)