AKP ភ្នំពេញ ថ្ងៃទី0៧ ខែមករា ឆ្នាំ២០២៥--សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាប្រធានគណបក្ស​ប្រជាជនកម្ពុជា បានគូសបញ្ជាក់ថា ដល់ពេលហើយត្រូវកសាងច្បាប់ដែលនឹងកំណត់ចំពោះជនណា ឬក្រុមណាដែលមានគម្រោងការបង្កើតចលនាប្រឆាំងជ្រុលនិយម បង្កភាពវឹកវរ អសន្តិសុខក្នុងសង្គម និងប៉ុនប៉ងផ្តួលរំលំរាជរដ្ឋាភិបាលស្របច្បាប់ ត្រូវតែនាំខ្លួនយកមកវិនិច្ឆ័យទោសដើម្បីការពារសន្តិភាព។

ថ្លែងក្នុងពិធីអបអរសាទរខួបលើកទី៤៦ នៃទិវាជ័យជម្នះ ៧ មករា (១៩៧៩-២០២៥) នាព្រឹកថ្ងៃអង្គារ ទី០៧ ខែមករា ឆ្នាំ២០២៥ នៅទីធ្លាខាងមុខមហាស្រពកោះពេជ្រ រាជធានីភ្នំពេញ សម្តេចតេជោ ហ៊ុន សែន បានបញ្ជាក់យ៉ាងដូច្នេះថា៖ «ក្នុងស្មារតីនេះ ខ្ញុំយល់ថា វាដល់ពេលហើយ ត្រូវកសាងច្បាប់ចំពោះ ជន ឬក្រុមណា ដែលមានគម្រោងការ ឬអំពើឃុបឃិតបង្កើតចលនាប្រឆាំងជ្រុលនិយម បង្កភាពវឹកវរអសន្តិសុខដល់សង្គម បង្កឱ្យមានជម្លោះជាមួយប្រទេសដទៃ និងប៉ុនប៉ងផ្តួលរំលំរាជរដ្ឋាភិបាលស្របច្បាប់ គឺជាភេវករដែលត្រូវនាំខ្លួនមកវិនិច្ឆ័យទោសដើម្បីការពារសន្តិភាព»។ សម្តេចតេជោបានលើកឡើងថា យើងត្រូវយល់ឱ្យបានច្បាស់ថា សន្តិភាព នឹងមិនអាចរស់គង់វង្សយូរអង្វែងបានឡើយ ប្រសិនបើមិនមានការផ្សះផ្សាជាតិ យុត្តិធម៌ ការអភិវឌ្ឍ ប្រកបដោយចីរភាព និងបរិយាបន្ន។ សម្តេចតេជោប្រធានគណបក្សប្រជាជនកម្ពុជាបានឱ្យដឹងទៀតថា ប្រទេសកម្ពុជាបានកំពុងតែឆ្ពោះទៅមុខលើកផ្លូវមាគ៌ាសន្តិភាព ប្រជាធិបតេយ្យ និងនីតិរដ្ឋដើម្បីកសាងប្រទេស។

ជាមួយគ្នានេះដែរ សម្តេចតេជោ ហ៊ុន សែន បានប្រកាសផងដែរថា គ្មានអ្វីត្រូវស្រពេចស្រពិលនោះទេ គឺគណបក្សប្រជាជនកម្ពុជា ជានិមិត្តរូប នៃការផ្លាស់ប្ដូរកម្ពុជា ដូច្នេះអ្នកទាំងឡាយ កុំចាំបាច់និយាយថា «ដូរ ឬមិនដូរ»។ សម្តេចតេជោបានបន្ដថា គណបក្សប្រជាជនកម្ពុជា គឺជានិមិត្តរូប និងចលនា ចលករ នៃការផ្លាស់ប្ដូរ ពីស្ថានភាពដ៏លំបាក ទៅកាន់ភាពងាយស្រួលជាងមុន។ «ខ្ញុំ សូមគូសបញ្ជាក់ថា គ្មានអ្វីត្រូវស្រពេចស្រពិលទេ គឺគណបក្សប្រជាជនកម្ពុជា ជានិមិត្តរូប នៃការផ្លាស់ប្ដូររបស់ព្រះរាជាណាចក្រកម្ពុជា សូមអ្នកទាំងឡាយកុំចាំបាច់និយាយថាដូរ ឬដូរមិនដូរ។ គណបក្សប្រជាជន គឺជានិមិត្តរូប និងចលនា ចលករ នៃការផ្លាស់ប្ដូរពីស្ថានភាពដ៏លំបាក ទៅកាន់ភាពងាយស្រួលជាងមុន។ សូមជឿទុកចិត្ត នៃការផ្លាស់ប្ដូររបស់យើង»។

ក្នុងឱកាសនោះ សម្ដេចតេជោប្រធានគណបក្សប្រជាជនកម្ពុជាបានបញ្ជាក់បន្ថែម ក្នុងឆ្នាំ២០២៤ កន្លងទៅនេះ ដែលជាឆ្នាំដំបូង នៃរាជរដ្ឋាភិបាល សម្រាប់និតីកាលទី៧ នៃរដ្ឋសភា ដែលដឹកនាំដោយ សម្ដេចមហាបវរធិបតី ហ៊ុន ម៉ាណែត, រាជរដ្ឋាភិបាល បានសម្រេចសមិទ្ធផលធំៗជាច្រើន ក្នុងការអនុវត្តកម្មវិធីនយោបាយ និងយុទ្ធសាស្ដ្របញ្ចកោណដំណាក់កាលទី១ របស់ខ្លួន៕

ដោយ៖ ប៊ុនរិទ្ធ