AKP កំពង់ធំ ថ្ងៃទី០៥ ខែមករា ឆ្នាំ២០២៥ -- លោក សាយ គឹមឡម អភិបាលស្រុកស្ទោង បានលើកឡើងថា ពុទ្ធសាសនារុងរឿងទៅបានដោយពុទ្ធសាសនិកជនរួមសាមគ្គីគ្នាជាធ្លុងមួយនៅក្នុងឱកាសអញ្ជើញជួបសំណេះសំណាលសួរសុខទុក្ខសមណៈបេក្ខជន ត្រៀមប្រលងធម្មវិន័យថ្នាក់ត្រី ទោ ឯក នៅមណ្ឌលវត្តឃ្លាំងខ្មូត ស្រុកស្ទោង ខេត្តកំពង់ធំ កាលពីរសៀលថ្ងៃទី០៤ ខែមករា ឆ្នាំ២០២៥។

លោក សាយ គឹមឡម បានជំរុញ និងលើកទឹកចិត្តដល់គ្រូបង្រៀនដែលកំពុងបង្ហាត់បង្រៀនសមណសិស្សទាំងអស់ត្រូវគិតគូរយកចិត្តទុកដាក់បន្ថែមទៀតលើការពង្រឹងវិន័យ គុណភាពសិក្សាឱ្យបានកាន់តែប្រសើរឡើងថែមទៀត និងបានសំណូមពរដល់ព្រះសង្ឃគ្រប់អង្គសូមបន្តការយកព្រះទ័យទុកដាក់សិក្សាស្វែងយល់ពី ពុទ្ធប្បញ្ញត្តិ និងពុទ្ធសាសនាទាំងមូលឱ្យបានកាន់តែស៊ីជម្រៅថែមទៀត ហើយត្រូវបន្តធ្វើការប្រជុំប្រចាំខែឱ្យបានទៀងទាត់ដើម្បីរកឱ្យឃើញនូវបញ្ហា និងដំណោះស្រាយថ្មីៗថែមទៀតដើម្បីអភិវឌ្ឍវត្តអារាម និងគុណភាពសិក្សារបស់សមណសិស្ស។

លោកអភិបាលស្រុកបានសំណូមពរដោយទទូចដល់សមណសិស្សត្រូវខិតខំសិក្សារៀនសូត្រឱ្យអស់ពីលទ្ធភាព និងនៅឱ្យឆ្ងាយពីគ្រឿងញៀន និងអបាយមុខទាំងពួង និងបានថ្លែងអំណរព្រះគុណយ៉ាងក្រៃលែងដល់ព្រះគ្រូចៅអធិការវត្តឃ្លាំងខ្មូត និងប្រជាពុទ្ធបរិស័ទចំណុះជើងវត្តជិតឆ្ងាយដែលបានផ្ដល់ទីតាំងសម្រាប់ប្រឡង និងទ្រទ្រង់ចង្ហាន់សមណបេក្ខជននៅក្នុងឆ្នាំនេះ។

ជាមួយនេះផងដែរលោក តាន់ តៃជ្រាន់ ប្រធានមន្ទីរធម្មការ និងសាសនាខេត្តកំពង់ធំ បានមានប្រសាសន៍ថា ពុទ្ធិកសិក្សាជាឆ្អឹងខ្នងនៃព្រះពុទ្ធសាសនាដែលប្រជាពុទ្ធបរិស័ទនិងព្រះសង្ឃគ្រប់អង្គបានសិក្សារៀងសូត្រពីពុទ្ធវិន័យ និងខ្លឹមសារពុទ្ធសាសនាទាំងមូលជាពិសេសនៅក្នុងគម្ពីរព្រះត្រៃបិដកដែលបានសិក្សារៀនសូត្រនៅតាមសាលាពុទ្ធិកសិក្សានានា តាំងពីបឋមសិក្សាសិក្សារហូតដល់មហាវិទ្យាល័យក៏ដូចជាការប្រឡងសញ្ញាបត្រនានាគឺជាអ្នកទ្រទ្រង់ពុទ្ធសាសនាឱ្យបានគង់វង្សថិតថេរគ្រប់ប្រាំពាន់ព្រះវស្សា និងបានប្រគេនពរដល់បេក្ខជនទាំងអស់សូមទទួលបានលទ្ធផលល្អប្រឡងនៅឆ្នាំនេះល្អគ្រប់ៗគ្រប់អង្គ/នាក់។

សូមបញ្ជាក់ថាការប្រឡងធម្មវិន័យឆ្នាំនេះប្រព្រឹត្តទៅនៅថ្ងៃទី០៥ ខែមករា ឆ្នាំ ២០២៥ ហើយមណ្ឌលស្រុកស្ទោងមានបេក្ខជនសរុប៤១៤អង្គ/នាក់ ចែកជា១៧បន្ទប់៕

ដោយ ស៊ុម វណ្ណា