AKP ព្រះសីហនុ ថ្ងៃទី០៤ ខែមករា ឆ្នាំ២០២៥ -- ឯកឧត្តម សុខ គាង រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ និងឯកឧត្តម ម៉ាង ស៊ីណេត អភិបាលនៃគណៈអភិបាលខេត្តព្រះសីហនុ បានអញ្ជើញដឹកនាំមន្ត្រីបច្ចេកទេសចុះពិនិត្យវឌ្ឍនភាពការអនុវត្តការងារសាងសង់ពហុកីឡដ្ឋានខេត្តព្រះសីហនុ មានទីតាំងស្ថិតនៅភូមិចំណោតរាម ឃុំបិតត្រាំង ស្រុកព្រៃនប់ ខេត្តព្រះសីហនុ កាលពីរសៀលថ្ងៃសុក្រ ទី០៣ ខែមករា ឆ្នាំ២០២៥។

គម្រោងសាងសង់ពហុកីឡដ្ឋានខេត្តព្រះសីហនុសាងសង់លើផ្ទៃដីចំនួន៣៣ហិកតា មានសណ្ឋានដីលក្ខណ:ជាទួលភ្នំ ដែលគម្រោងនេះនឹងក្លាយទៅជាពហុកីឡដ្ឋានជាតិ អាចទទួលមនុស្សប្រមាណ៣០ ០០០នាក់ ដែលមានអគារពហុមុខងារខាងក្នុង និងខាងក្រៅ ចំណតរថយន្ត ចំណតម៉ូតូ ចំណតឡានក្រុង តំបន់សួនច្បារ លំហាត់ប្រាណមនុស្សចាស់ ហាងកាហ្វេ ហាងអាហារ និងកន្លែងអង្គុយលេង តំបន់ដើមកោងកាង ទីតាំងបោះតង់ សួនទេសចរណ៍ Westerdam អាងទឹក Westerdam អគារសារមន្ទីរ សាលមហោស្រព ដីបម្រុងទុក ទីធ្លាប្រជុំបក្ស អគារកាកបាទក្រហមកម្ពុជា អគារសហ គមន៍នារី អគារសហភាពសហព័ន្ធយុវជន ស.ស.យ.ក បន្ទប់ទឹក សួនឯករាជ្យ សួនសន្តិភាព សួនសហព័ន្ធកីឡាអាស៊ី អាងប្រតិកម្មទឹកកខ្វក់ ទីតាំងរក្សាកាកសំណល់ អាងហែលទឹក លោតទឹក និងវេទិកា។ គម្រោងសាងសង់នេះគឺកសាងទៅតាមតំបន់ផ្សេងៗគ្នា ដោយផ្តោតលើមុខងារតាមតំបន់នីមួយៗ បូករួមជាមួយការរចនាផ្សារភ្ជាប់នឹងធម្មជាតិ ក្នុងគោលបំណងឱ្យអគារមានលក្ខណៈប្រកបដោយផាសុខភាព ហើយប្រើប្រាស់ថាមពលតិច និងកាន់តែមានសោភ័ណភាពជាមួយលំហបៃតង។

ក្នុងឱកាសចុះពិនិត្យវឌ្ឍនភាពការអនុវត្តការងារសាងសង់នេះ ឯកឧត្តម សុខ គាង និងឯកឧត្តម ម៉ាង ស៊ីណេត បានឱ្យដឹងថា ពហុកីឡដ្ឋានជាតិនេះអាចទទួលការប្រកួតកីឡាថ្នាក់ជាតិ អន្តរជាតិ និងថ្នាក់តំបន់ ក៏ដូចការប្រកួតកីឡាជ្រើសរើសជើងឯកប្រចាំប្រទេសកម្ពុជា និងជាកន្លែងសម្រាប់ធ្វើការហ្វឹកហាត់របស់យុវជនកម្ពុជា ពិសេសយុវជនខេត្តព្រះសីហនុ មានទីលានហ្វឹកហាត់កីឡា ដើម្បីទទួលបានសុខភាព និងផាសុខភាពបន្ថែមទៀត ព្រោះការលេងកីឡានាំមកនូវសុខភាពរាងកាយ សុខភាពផ្លូវចិត្ត និងបង្កើនមិត្តភាព សាមគ្គីភាពរវាងក្រុមកីឡារបស់យើងជាមួយក្រុមកីឡាមកពីបណ្តាប្រទេសដែលបានចូលរួមប្រកួតកាន់តែមានភាពស្និទ្ធស្នាលបន្ថែមទៀត៕

ដោយ ងូ សុមុនី