កេសរកូលពីងពាងព័ទ្ធសម្បុក មានដុះច្រើនតាមដើមឈើ និងថ្ម ហើយគេឃើញមានដុះជាច្រើនតំបន់ក្នុងប្រទេសកម្ពុជា
AKP ភ្នំពេញ ថ្ងៃទី០៤ ខែមករា ឆ្នាំ២០២៥ -- កេសរកូល (អរគីដេ) ពីងពាងព័ទ្ធសម្បុក ជាប្រភេទកេសរកូលដុះតោងជាប់នឹងដើមឈើ ជួនកាលដុះជាប់នឹងថ្ម។ វាមានតួដើមវែងស្រដៀងវល្លិ មានស្លឹកច្រើនដុះជិតគ្នាជា២ជួរ ហើយស្លឹកមានស្ទប គ្មានរោម។ កេសរកូលពីងពាងព័ទ្ធសម្បុក មានឈ្មោះតាមវិទ្យាសាស្រ្តថា Arachinis labrosa ហើយគេច្រើនប្រទះឃើញមានវត្តមាននៅក្នុងឧទ្យានជាតិព្រះមុនីវង្ស "បូកគោ" ឧទ្យានជាតិជួរភ្នំក្រវាញ និងឧទ្យានជាតិព្រះសុរាម្រិត-កុសុមៈ "គិរីរម្យ"ជាដើម។

ឯកឧត្តម បណ្ឌិត សាម អ៊ីន រដ្ឋលេខាធិការក្រសួងបរិស្ថាន បានឱ្យដឹងថា រុក្ខជាតិប្រភេទនេះគេអាចសង្កេតឃើញកេសរកូលពីងពាងព័ទ្ធសម្បុកចេញផ្កានៅចុងរដូវប្រាំង។ ផ្កាមានលក្ខណៈកញ្ចុំផ្កាចំហៀងជាចង្កោម និងមានផ្កាដុះឃ្លាតពីគ្នា។ កេសរកូលប្រភេទនេះគេច្រើនឃើញ ដុះនៅលើដើមឈើធំៗ និងលើថ្ម ក្នុងព្រៃតូចៗ ក្នុងរយៈកម្ពស់ពី ៨០០ ដល់១៧០០ម៉ែត្រ។ ដោយឡែកបើយោងតាមសៀវភៅមគ្គទេសក៍ ស្តីពីកេសរកូលព្រៃកម្ពុជាវិញបានឱ្យដឹងថា កេសរកូល ពីងពាងព័ទ្ធសម្បុក មានដើមកំណើតផងដែរនៅឥណ្ឌា ភូមា ថៃ ចិន តៃវ៉ាន់ វៀតណាម និងប៉ូតង់។

គួរបញ្ជាក់ថា រដ្ឋបាលព្រៃឈើ នៃក្រសួងកសិកម្ម រុក្ខាប្រមាញ់ និងនេសាទបានឱ្យដឹងនាថ្មីៗមកនេះថា តាមរយៈការសិក្សាស្រាវជ្រាវទៅលើប្រភេទរុក្ខជាតិ រួមទាំងកេសរកូលព្រៃ អស់រយៈពេលជាច្រើនទសវត្សមកហើយ ដោយបានរកឃើញកេសរកូលព្រៃជាង ៥០០ប្រភេទ ដែលមានវត្តមាននៅក្នុងប្រទេសកម្ពុជា។

ក្រសួងកសិកម្មបានឱ្យដឹងដែរថាការសិក្សាស្រាវជ្រាវនេះនៅតែបន្តស្វែងរកប្រភេទថ្មីៗបន្ថែមទៀត។ សម្រាប់ការសិក្សាស្រាវជ្រាវ ប្រមូលសំណាកកេសរកូលព្រៃ គឺវិភាគទានដ៏សំខាន់មួយសម្រាប់សិស្ស និស្សិត មន្ត្រីរាជការ និងដៃគូអភិវឌ្ឍន៍នានា ប្រើប្រាស់ជាមគ្គុទេសក៍ក្នុងការស្រាវជ្រាវ និងអភិវឌ្ឍ។ ការងារនេះ ក៏កំពុងលើកស្ទួយមុខមាត់របស់ប្រទេសកម្ពុជា ដែលមានឆន្ទៈមុតស្រួចក្នុងការការពារ ថែរក្សា ស្រាវជ្រាវ និងយកចិត្តទុកដាក់ខ្ពស់ ចំពោះប្រភេទកេសរកូលព្រៃទាំងនេះ ដែលខ្លះមានរកឃើញវត្តមានតែនៅក្នុងប្រទេសកម្ពុជាប៉ុណ្ណោះ៕

ដោយ៖ ដេប៉ូ





