AKP កំពង់ស្ពឺ ថ្ងៃទី០៣ ខែមករា ឆ្នាំ២០២៥ -- ឯកឧត្តមបណ្ឌិត ជាម ច័ន្ទសោភ័ណ អភិបាល នៃគណៈអភិបាលខេត្ត បានលើកឡើងថា រាជរដ្ឋាភិបាលកម្ពុជា នីតិកាលទី៧ ដែលមាន សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា សម្តេចបានគិតគូរខ្លាំងទៅលើសុខុមាលភាពប្រជាពលរដ្ឋដែលទៅរកសេវា  មណ្ឌលសុខភាពស្រុក ត្រូវបន្ថែមថ្នាំសង្កូវឱ្យបានគ្រប់គ្រាន់ ខិតខំសង្រ្គោះបឋមជូនប្រជាពលរដ្ឋដែលទៅសង្រ្គោះបន្ទាន់ រួចបញ្ជូនបន្តមកមន្ទីរពេទ្យបង្អែកខេត្ត  បញ្ហាក្មេងទំនើងប្រសាសន៍ដ៏ថ្លៃថ្លារបស់សម្តេចមហាបវធិបតី យើងកុំដើរបិកចក បើចកជាប់ជើងហើយត្រូវដកចកចេញពីបឹង ដូច្នេះត្រូវអនុវត្តអភិក្រមទាំង៥ រួមមាន ឆ្លុះកញ្ចក់ ងូតទឹក ដុសក្អែល ព្យាបាល និងវះកាត់ ដើម្បីធានាបានស្ថេរភាពសង្គម សន្តិសុខសង្គម សុវត្ថិភាពតាមមូលដ្ឋាន។

ឯកឧត្តមបានថ្លែងបែបនេះក្នុងពិធីសំណេះសំណាលជាមួយមន្ត្រីរាជការជាថ្នាក់ដឹកនាំ នៃរដ្ឋបាលស្រុកថ្ពង ខេត្តកំពង់ស្ពឺ ក្រោមអធិបតីភាពឯកឧត្តមបណ្ឌិត ជាម ច័ន្ទសោភ័ណ អភិបាល នៃគណៈអភិបាលខេត្តកំពង់ស្ពឺ សមាសភាពអញ្ជើញអមដំណើរ ឯកឧត្តម លោកជំទាវ អភិបាលរងខេត្ត លោកមេបញ្ជាការកងកម្លាំងទាំងបី លោកនាយករងរដ្ឋបាលសាលាខេត្ត លោកអភិបាលស្រុកឱរ៉ាល់ លោក លោកស្រីនាយកនាយករងទីចាត់ការសាលាខេត្ត ប្រធាន អនុប្រធានមន្ទីរនានាពាក់ព័ន្ធជុំវិញខេត្ត គណៈបញ្ជាការការស្រុក និងមន្ត្រីរាជការសាលាស្រុកជាច្រើនរូបទៀតសរុបប្រមាណជា១០០នាក់ ពិធីប្រារព្ធនៅសាលប្រជុំសាលាស្រុកថ្ពង ខេត្តកំពង់ស្ពឺ។

ឆ្លៀតក្នុងឱកាសនោះដែរ៖ ឯកឧត្តមបណ្ឌិត បានណែនាំនិងដាក់វិធានការចំនួន០៨ចំណុចជូនដល់គណៈបញ្ជាការឯកភាពរដ្ឋបាលស្រុកត្រូវអនុវត្តន៍ឱ្យបានក្នុងនោះ (១.បញ្ហាគ្រឿងញៀន ២.ល្បែងសុីសងខុសច្បាប់ ៣.ក្មេងទំនើង ៤.ថែរក្សាព្រៃឈើ ៥.អប់រំ ណែនាំ រឹតបន្តឹងច្បាប់ចរាចរណ៍ ៦.វិស័យទេសចរណ៍ ៧.វិស័យកសិកម្ម ៨.វិស័យសុខាភិបាល) 
ឯកឧត្តមបណ្ឌិតបានក្រើនរំឭកបន្ថែបទៀតថា៖ អភិបាលស្រុក គណៈបញ្ជាការឯកភាពស្រុក ចៅសង្កាត់ គិតគូរឡើងវិញ និងពិនិត្យមើលឡើងវិញ ជាពិសេសបម្រើសេវាសាធារណៈជូនប្រជាពលរដ្ឋឱ្យបានទាន់ពេលវេលា តាមដានកង្វល់របស់ប្រជាពលរដ្ឋ ទីតាំងតាមរោងចក្រ សូមជួយសម្រួលចរាចរណ៍ពេលចេញចូលធ្វើការ ត្រូវសហការឱ្យបានមុឺងម៉ាត់ ចំពោះបញ្ហាគ្រឿងញៀន ហាមដាត់ខាតកុំពាក់ព័ន្ធនិង គ្រឿងញៀនបើជាមន្ត្រីត្រូវបណ្តេញចេញពីក្របខណ្ឌ បង្រា្កបល្បែងសុីសង តាមមូលដ្ឋាន ល្បែងអនឡាញ មើលឡើងវិញមានអាជ្ញាប័ណ្ណប៉ុន្មាន គ្មានប៉ុន្មាន បើគ្មានច្បាប់ជាក់លាក់បិទជាបន្ទាន់ ពិនិត្យមើលស្លាកប៉ាណូផ្សព្វផ្សាយគ្រឿងស្រវឹងហាមដាត់ខាតកុំឱ្យមាន ជាពិសេសល្បែងសុីសងដាច់ខាតមិនឱ្យមានជាដាច់ខាតដើម្បីខេត្ត និងពលរដ្ឋមានសណ្តាប់ធ្នាប់ល្អក្នុងសង្គម។

ឯកឧត្តមបន្តទៀតថា៖ សូមបន្តយកចិត្តទុកដាក់ឱ្យបានខ្ពស់លើវិស័យទេសចរណ៍ វិស័យកសិកម្មការិយាល័យចំណុះស្រុក ពង្រឹងកិច្ចការជំនាញកសិកម្មផ្តល់បច្ចេកទេសដល់ប្រជាពលរដ្ឋ សហការជាមួយមន្ទីរកសិកម្ម ដែលមានមន្ត្រីកសិកម្មស្រុក ជាមន្ត្រីផ្សព្វផ្សាយកសិកម្ម ដើម្បីយល់ដឹងពីប្រភេទដី និងពូជស្រូវ និងជ្រើសរើសពូជមានទិន្នផលខ្ពស់ និងមានទីផ្សារ សម្តេចធិបតីខិតខំពង្រាយមន្រ្តីកសិកម្មដើម្បីជួយដល់បងប្អូនប្រជាកសិករ  សម្រួលជីវភាពប្រជាពលរដ្ឋ ទន្ទឹមគ្នានេះស្រុកថ្ពងមានបងប្អូនប្រជាពលរដ្ឋធ្វើដំណាំស្រូវច្រើនផងដែរ។

ឯកឧត្តមបណ្ឌិត អភិបាលខេត្ត បានកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់រដ្ឋបាលស្រុកគ្រប់លំដាប់ថ្នាក់ ពិសេសគណៈបញ្ជាការឯកភាពស្រុក ដែលស្រុកនេះមិនឃើញមានបញ្ហាក្មេងទំនើងគួរឱ្យកត់សម្គាល់នោះឡើយ៕

ដោយ៖ គង់ សិរីរ័ត្ន, ប្រភព៖ AKP-កំពង់ស្ពឺ