AKP ភ្នំពេញ ថ្ងៃទី ០១ ខែ មករា ឆ្នាំ ២០២៥-ស្របពេលដែលបានចូលរួមក្នុងពិធី «សាទរកម្ពុជា”និងពិធីបុណ្យចូលឆ្នាំសកល ២០២៥ នៅក្នុងរាជធានីភ្នំពេញ ពលរដ្ឋមួយចំនួនបានបង្ហាញក្តីសប្បាយរីករាយជាខ្លាំង ហើយចាត់ទុកថាការៀបចំព្រឹត្តិការណ៍នេះពិតជាអស្ចារ្យ ដែលបង្ហាញពីការរីកចម្រើនរបស់ ប្រទេសជាតិ និងក៏ដូចជាសុខសន្តិភាពពេញលេញ ដែលមិនត្រឹមតែផ្តល់ភាពម្លប់ត្រជាក់ត្រជុំការរស់នៅទេ តែពលរដ្ឋក៏មានសិទ្ធិសេរីភាពពេញទីទាំងការប្រកបការងារ ការរកស៊ីជួញដូរ ផងដែរ។
 ក្នុងព្រឹត្តិការណ៍នេះដែរត្រូវបានរៀបចំឡើងដោយចាប់ផ្តើមពីការតាំងលម្អ រចនាតុបតែង និងផ្សារភ្ជាប់ គំនិតច្នៃប្រឌិតសិល្បៈបុរាណ និង សហសម័យ នៅតាមសួនច្បារប្របមាត់ទន្លេចតុមុខ រហូតមកដល់សួន ច្បារមុខប្រាសាទច័ន្ទឆាយានៃព្រះបរមរាជវាំង។

សម្រាប់កម្មវិធី “សាទរកម្ពុជា» ត្រូវបានផ្តួចផ្តើមឡើងក្នុងគោលបំណង ផ្សារភ្ជាប់ប្រជាជន ទៅសង្គមជាតិទាំងមូល ដែលក្នុងនោះ តាម រយៈការរៀបចំព្រឹត្តិការណ៍ និងកម្មវិធីនានា ។ «សាទរកម្ពុជា» នឹងបង្ហាញក្នុងនាមជាប្រជាជាតិមានអាយុកាលដ៏យូរលង់ នៅថ្ងៃនេះកម្ពុជាកំពុងឈរដោយមោទនភាព ពោរពេញដោយក្តីសង្ឃឹម និងមានភាពជឿជាក់ រួមគ្នាឆ្ពោះទៅកាន់អនាគតដ៏រុងរឿងរបស់ជាតិខ្មែរ។
កំពុងឈរអបអរនៅខាងមុខព្រះបរមរាជវាំង អ្នកនាង ឆុន ស្រីលក្ខណ៍ រស់នៅរាជធានីភ្នំពេញបានប្រាប់ឱ្យដឹងថា ពិតជារីករាយណាស់ ការដែលអ្នកនាង និងមិត្តភក្តិ បានមកចូលរួមក្នុងពិធីនេះ។មនុស្សម្នាច្រើនណាស់បានធ្វើឱ្យអ្នកនាងរំភើបក្តុកក្តួល ហើយបើគិតគឺឆ្នាំនេះសប្បាយខ្លាំងណាស់។ ស្រ្តីវ័យជាង២០ឆ្នាំរូប នេះបាននិយាយបន្ថែមថា៖ «ប្រទេសកម្ពុជាពីមួយឆ្នាំៗប្លែកណាស់គឺរីកចម្រើន ទៅទីណាក៏ស្រស់ស្អាត និងមនុស្សម្នាក់ៗពោរពេញទៅដោយសេចក្តីសុខ»។

ចំណែកកញ្ញា វី ភារម្យ រស់នៅខេត្ត ព្រះវិហារ ដែលបានមកចូលរួមក្នុងពិធីនេះដែរបានប្រាប់ឱ្យដឹងផងដែរថា៖ «ប្រទេសកម្ពុជាមិនត្រឹមតែមានសិទ្ធសេរីភាព ហើយ ទៅទីណាបានគ្រប់ទីកន្លែងទេ គឺពលរដ្ឋរស់នៅបានសេចក្តីសុខដុមគ្រប់គ្នា។ឆ្នាំនេះពិតជាអស្ចារ្យ និងពលរដ្ឋមកចូលរួមពិតជាសប្បាយគ្រប់គ្នា»។
លោក ភារម្យ ដែលរស់នៅរាជធានីភ្នំពេញរូបនេះបានបញ្ជាក់ថា ប្រទេសកម្ពុជាមានសុខសន្តិភាព ធ្វើឱ្យពលរដ្ឋរស់នៅមានសេចក្តីសុខ ចង់ទៅទីណាក៏បាន ដូចជាការរៀបចំកម្មវិធីនេះស្រាប់គឺគួរឱ្យកោតសរសើរ ហើយពលរដ្ឋកម្ពុជាបច្ចុប្បន្នមានសិទ្ធិសេរីភាពពេញទី។
ជាមួយគ្នានេះ អ្នកនាង គី ស្រីនិច្ច រស់នៅខេត្តកណ្តាលដែលបានបីកូនតូចមកចូលរួមក្នុងពិធី សាទរកម្ពុជា ក៏ដូចជាចូលរួមពិធីឆ្លងឆ្នាំថ្មី ២០២៥នេះដែរបាននិយាយដោយក្តីសប្បាយរីករាយថា អ្នកនាងពិតជារំភើប ពេលដែលបានមកចូលរួមកម្មវិធីនេះ។ អ្នកនាងបន្តថា កម្ពុជាពិតជារីកចម្រើន មនុស្សម្នាក់ៗមានសិទ្ធិពេញទី។សម្រាប់អ្នកនាងគឺចង់ឱ្យប្រទេសជាតិរីកចម្រើន មានសុខសន្តិភាព ដែលធ្វើឱ្យពលរដ្ឋរស់នៅសុខដុមរៀងរហូតទៅ។

គួរបញ្ចាក់ថា ក្នុងពិធីនេះដែរ ឯកឧត្តមឧបនាយករដ្ឋមន្ត្រី ហ៊ុន ម៉ានី រដ្ឋមន្ត្រីក្រសួងមុខងារសាធារណៈបានគូសបញ្ជាក់ថា ព្រឹត្តិការណ៍«សាទរកម្ពុជា»លើកដំបូង ជាព្រឹត្តិការណ៍នៃការអបអរសាទរដល់សង្គមមួយ ប្រកបដោយភាពរស់រវើក ជាមួយនឹងការបង្ហាញវិសេសភាពនៃអត្តសញ្ញាណ ដោយសមានចិត្តសោមនស្សចំពោះអ្វីៗដែលបានឆ្លងកាត់ និងបានជម្នះ និងការលើកតម្កើងមោទនភាពក្នុងភាពជាប្រជាជាតិមួយ។ ឯកឧត្តមឧបនាយករដ្ឋមន្ត្រី បានថ្លែងបន្ថែមថា៖ «សាទរកម្ពុជា រៀបចំឡើងដើម្បីផ្សារភ្ជាប់ប្រជាជន មនោសញ្ចេតនារបស់ប្រជាជនទៅនឹងសង្គមជាតិយើងទាំងមូល។ បង្កើតជាវេទិកា ជាឱកាសសម្រាប់គ្រប់កោសិកាទាំងអស់ចូលរួមបង្ហាញអត្តសញ្ញាណរបស់ខ្លួន ដោយមោទនៈក្រោមស្មារតីសាមគ្គីភាពនិងមោទនភាពក្នុងនាមជាជាតិខ្មែរតែមួយ»។

ព្រឹត្តិការណ៍ «សាទរកម្ពុជា»និងពិធីបុណ្យចូលឆ្នាំសកលឆ្នាំ ២០២៥ បានប្រព្រឹត្ត ទៅក្នុងបរិយាកាសសប្បាយរីករាយ ដោយបានបន្សល់ទុកនូវស្នាមញញឹម និងការជួបជុំសាទរជាមហាគ្រួសារខ្មែរ៕

ដោយ៖ ដេប៉ូ