AKP សៀមរាប ថ្ងៃទី០១ ខែមករា ឆ្នាំ២០២៥--

យោងតាមរបាយការណ៍របស់មន្ទីរទេសចរណ៍ខេត្តសៀមរាប បានបង្ហាញថា ស្ថានភាពទេសចរ និងបងប្អូនប្រជាពលរដ្ឋខេត្តសៀមរាបដើរកម្សាន្តនៅក្នុងឱកាសបុណ្យឆ្លងឆ្នាំសកល២០២៥ ដោយគិតចាប់ពីថ្ងៃទី ៣០-៣១ ខែធ្នូ ឆ្នាំ២០២៤ មានចំនួនប្រមាណ ៣៣៣,៦៦០ នាក់ មានការកើនឡើងប្រមាណ ៩.៧៣%បើប្រៀបធៀបនឹងឆ្នាំ២០២៣។ ក្នុងនោះ ទេសចរជាតិ និងបងប្អូនប្រជាពលរដ្ឋក្នុងខេត្ត មានចំនួនប្រមាណ ៣២៣,៤០០ នាក់ មានការកើនឡើងប្រមាណ៩.៦៣% បើប្រៀបធៀបនឹងរយៈពេលដូចគ្នាឆ្នាំ២០២៣។ ភ្ញៀវទេសចរអន្តរជាតិមានចំនួន ១០,២៦០ នាក់ មានការកើនឡើង ១៣.២០% បើប្រៀបធៀបនឹងរយៈពេលដូចគ្នាឆ្នាំ២០២៣។

ភ្ញៀវទេសចរទាំងនេះ ពេលថ្ងៃបានដើរកម្សាន្ត នៅតាមតំបន់រមណីយដ្ឋានអង្គរ រមណីយដ្ឋានភ្នំគូលែន  នៅតាមសហគមន៍ទេសចរណ៍ បឹងទន្លេសាប ពេលយប់ភ្ញៀវទេសចរបានស្រុកទៅកម្សាន្តនៅសួនច្បារមាត់ស្ទឹងសៀមរាប និងតំបន់ផាប់ស្រ្ទីតនិងកន្លែងកម្សាន្តថ្មី គឺទឹករាំតាមភ្លេងអមដោយអំពូលភ្លើងចម្រុះព័ណ៌ជំនាន់ចុងក្រោយ នៅស្ទឹងសៀមរាប ដែលមានកម្ពស់ទឹកបាញ់ឡើងលើរហូតដល់ទៅ៨០ម៉ែត្រ ដែលមានទីតាំងនៅជិតអតីតអាំងក្រពើ ស្ថិតនៅសង្កាត់សាលាកំរើក ក្រុងសៀមរាប៕

ដោយ ឃុត សៅ