AKP ភ្នំពេញ ថ្ងៃទី២២ ខែឧសភា ឆ្នាំ ២០២៦---
ឯកអគ្គរាជទូតកម្ពុជានៅសាធារណរដ្ឋកូរ៉េបានបញ្ជាក់ថាកិច្ចសហប្រតិបត្តិការរវាងសាកលវិទ្យាល័យជុងវ៉ុន និងក្រសួង-ស្ថាប័នកម្ពុជា បានបង្ហាញអំពីចំណងមិត្តភាពដ៏រឹងមាំរវាងប្រទេសកម្ពុជា និងសាធារណរដ្ឋកូរ៉េ។
ឯកឧត្តម ឃួន ផុនរតនៈ ឯកអគ្គរាជទូតកម្ពុជាប្រចាំសាធារណរដ្ឋកូរ៉េ និងសហការី បានអញ្ជើញចូលរួមកម្មវិធី “2026 Cambodia-Jungwon International Forum and Study Visit” នៅសាកលវិទ្យាល័យជុងវ៉ុន ស្ថិតក្នុងស្រុកខេសាន់ ខេត្តឈុងឆុងប៊ុកដូ សាធារណរដ្ឋកូរ៉េ ដោយមានការអញ្ជើញចូលរួមពីតំណាងក្រសួងស្ថាប័នកម្ពុជារួមមាន តំណាងក្រសួងប្រៃសណី យ៍ និងទូរគមនាគមន៍ តំណាងក្រសួងកិច្ច ការនារី ក្រសួងសង្គមកិច្ច ក្រសួងអប់រំ​ យុវជន​ និងកីឡា សាកលវិទ្យាល័យភូមិន្ទភ្នំពេញ និងសាកលវិទ្យាល័យពាណិជ្ជសាស្ត្រអេស៊ីលីដា ជាដើមកាលនៅថ្ងៃទី១៩ ខែឧសភា ឆ្នាំ២០២៦។

ក្នុងសុន្ទរកថាស្វាគមន៍ Dr. Jang Kiwon សាកលវិទ្យាធិការនៃសាកលវិទ្យាជុងវ៉ុន បានបង្ហាញអំពីគម្រោងសហប្រតិបត្តិការចំនួន៤ របស់សាកលវិទ្យាល័យជាមួយក្រសួង-ស្ថាប័នរបស់ប្រទេសកម្ពុជាលើវិស័យអប់រំឌីជីថល អន្តរនូបនីយកម្មលើការអប់រំថ្នាក់សាកល ការបណ្តុះបណ្តាលវិជ្ជាជីវៈ ផ្នែកកសិកម្ម និងអប់រំសុខមាលភាពសង្គមជាដើម។

ឯកឧត្តមឯកអគ្គរាជទូត បានមានប្រសា សន៍ថាកិច្ចសហប្រតិបត្តិការរវាងសាកលវិទ្យាល័យជុងវ៉ុន និងក្រសួង -ស្ថាប័នកម្ពុជា បានបង្ហាញអំពីចំណង មិត្តភាពដ៏រឹងមាំរវាងប្រទេសកម្ពុជា និងសាធារណរដ្ឋកូរ៉េ ហើយកិច្ចសហប្រតិ បត្តិការនេះ នឹងអាចជួយលើកកម្ពស់វិស័យអប់រំ និងការអភិវឌ្ឍធនធាន មនុស្សរបស់ប្រទេសកម្ពុជា។

ឆ្លៀតក្នុងឱកាសនេះ ឯកឧត្តមឯកអគ្គរាជទូត ក៏បានអញ្ជើញចុះហត្ថលេខា លើអនុស្សរណៈនៃការយោគយល់​ (MOU) ជាមួយសាកលវិទ្យាល័យជុងវ៉ុន ស្តីពីការពង្រឹងកិច្ចសហប្រតិបត្តិការលើវិស័យអប់រំ ផ្លាស់ប្តូរព័ត៌មាន និងការជំរុញទំនាក់ទំនងរវាងស្ថាប័ននៃភាគីទាំងពីរ ផងដែរ៕

ដោយ៖ ប៊ុនរិទ្ធ