AKP ភ្នំពេញ ថ្ងៃទី២០ ខែឧសភា ឆ្នាំ២០២៦-- ក្រសួងព័ត៌មានបានរៀបចំសិក្ខាសាលាដ៏មានសារៈសំខាន់មួយក្រោមប្រធានបទ «រួមគ្នាលើកកម្ពស់សីលធម៌ តាមរយៈការផ្សព្វផ្សាយ» ក្រោមអធិបតីភាព ឯកឧត្តម ជុំ កុសល រដ្ឋលេខាធិការក្រសួងព័ត៌មាន និងជាតំណាងដ៏ខ្ពង់ខ្ពស់របស់ ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន នាព្រឹកថ្ងៃទី២០ ខែឧសភា ឆ្នាំ២០២៦ នៅសាលចតុមុខមង្គល ទីស្តីការក្រសួងព័ត៌មាន ដោយមានការអញ្ជើញចូលរួមពីថ្នាក់ដឹកនាំពីអន្តរក្រសួង មន្ត្រីជំនាញពាក់ព័ន្ធ អ្នកសារព័ត៌មាន ព្រមទាំងអ្នកបង្កើតមាតិកាឌីជីថល (Content Creators) ក៏ដូចជាពិធីករអនឡាញជាច្រើនរូបទៀត។

ថ្លែងបើកអង្គសិក្ខាសាលា ឯកឧត្តម ជុំ កុសល បានពន្យល់ និងសង្កត់ធ្ងន់យ៉ាងស៊ីជម្រៅទៅលើតម្លៃពិតប្រាកដនៃពាក្យ «សីលធម៌» ដែលជារបៀបរៀបរយ គ្រឿងលម្អកាយ និងជាច្បាប់សម្រាប់តម្រង់ទិសអាកប្បកិរិយារបស់មនុស្សនៅក្នុងសង្គម បើបុគ្គលម្នាក់ៗបាត់បង់សីលធម៌ នោះតម្លៃ និងកិត្តិយសក៏ត្រូវបាត់បង់ដូចគ្នាដែរ។ ឯកឧត្តមក៏បានសម្តែងនូវការព្រួយបារម្ភចំពោះនិន្នាការបច្ចុប្បន្ន ដែលមានបុគ្គល ឬអ្នកផលិតមាតិកាមួយចំនួននៅលើបណ្តាញសង្គម បានប្រើប្រាស់ការផ្សាយផ្ទាល់ (Live) ជេរប្រមាថ ដៀលត្មះ ឬវាយប្រហារគ្នាទៅវិញទៅមក ក្នុងគោលបំណងទាញយកការមើល (Views) និងប្រជាប្រិយភាព ដោយមិនខ្វល់ពីការខូចខាតសីលធម៌សង្គមឡើយ។

បន្ថែមលើនេះ ឯកឧត្តមបានផ្តល់ការណែនាំ និងរំលឹកដល់អ្នកសារព័ត៌មាន និងអ្នកផលិតមាតិកាទាំងអស់ថា ចំពោះការផ្សព្វផ្សាយព័ត៌មានអវិជ្ជមាន រឿងរ៉ាវអនាចារ ឬអំពើហិង្សានានា ទោះបីជារឿងពិតជាក់ស្តែងដែលបានកើតឡើងនៅក្នុងសង្គមក៏ដោយ ក៏អ្នកសារព័ត៌មានត្រូវជញ្ជឹងគិត និងវិភាគឱ្យបានគ្រប់ជ្រុងជ្រោយ មុននឹងសម្រេចចិត្តចុះផ្សាយ។ ឯកឧត្តមបានសង្កត់ធ្ងន់ថា ប្រសិទ្ធភាពនៃការគ្រប់គ្រង និងលើកកម្ពស់សីលធម៌សង្គម គឺត្រូវផ្តើមចេញពីសតិសម្បជញ្ញៈ និងការដឹងខុសត្រូវរបស់បុគ្គលម្នាក់ៗជាចម្បង ក្នុងការរួមចំណែកវាយតម្លៃរាល់ព័ត៌មាន ឬមាតិកាទាំងឡាយ មុននឹងសម្រេចចិត្តផ្សព្វផ្សាយទៅកាន់សាធារណជន ដើម្បីធានាថា ការផ្សព្វផ្សាយនោះមិនជះឥទ្ធិពលអវិជ្ជមានដល់សង្គម និងកិត្តិយសខ្លួនឯងនោះឡើយ។

សូមបញ្ជាក់ថា គោលបំណងចម្បងនៃសិក្ខាសាលានេះ គឺដើម្បីផ្សព្វផ្សាយនូវសេចក្តីណែនាំអន្តរក្រសួង ក្នុងគោលដៅរួមគ្នាជំរុញ និងលើកកម្ពស់វប្បធម៌ ប្រពៃណី ទំនៀមទម្លាប់ និងសីលធម៌ដ៏ល្អផូរផង់របស់ជាតិខ្មែរ។ ទន្ទឹមនឹងនេះ កម្មវិធីក៏បានផ្តោតការយកចិត្តទុកដាក់ខ្ពស់ទៅលើការថែរក្សាកិត្តិយស សេចក្តីថ្លៃថ្នូរ និងគុណតម្លៃរបស់ស្ត្រីខ្មែរ ក្នុងបរិបទនៃការរីកចម្រើនយ៉ាងរហ័សផ្នែកប្រព័ន្ធឌីជីថល និងប្រព័ន្ធផ្សព្វផ្សាយនាពេលបច្ចុប្បន្ន ព្រមទាំងការទប់ស្កាត់ និងហាមឃាត់ការផលិត ផ្សព្វផ្សាយ និងចែកចាយបន្តនូវរាល់មាតិកា (Content) ទាំងឡាយណាដែលរំលោភបំពាន ឬជះឥទ្ធិពលអវិជ្ជមានដល់តម្លៃសង្គម ៕

ដោយ ទូច វលក័្ខណ