AKP ភ្នំពេញ ថ្ងៃទី២០ ខែឧសភា ឆ្នាំ២០២៦--នៅអំឡុងពេលនៃការចូលរួមកម្មវិធីវេទិកាអប់រំពិភពលោកឆ្នាំ២០២៦នៅចក្រភពអង់គ្លេស ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រី្ត រដ្ឋមន្រ្តីក្រសួងអប់រំ យុវជន និងកីឡា បានជួបពិភាក្សាការងារជាមួយ លោកជំទាវ Georgia Gould OBE MP រដ្ឋមន្ត្រីទទួលបន្ទុកស្ដង់ដារសាលារៀន នៃចក្រភពអង់គ្លេស ដោយភាគីទាំងពីរបានលើកឡើងនូវវឌ្ឍនភាពលទ្ធផលកំណែទម្រង់អប់រំ និងចំណុចសំខាន់ៗមួយចំនួន រួមមាន កិច្ចសហការ និងការផ្ដល់អាហារូបករណ៍ដល់និស្សិតកម្ពុជាចាប់ពីថ្នាក់បរិញ្ញាប័ត្រ រហូតដល់ថ្នាក់បណ្ឌិត ដើម្បីមកសិក្សានៅចក្រភពអង់គ្លេស តាមរយៈកម្មវិធីអាហារូបករណ៍ Chevening ជាដើម។

សូមជម្រាបផងដែរថា ក្រសួងអប់រំ យុវជន និងកីឡាបាន និងកំពុងសម្របសម្រួលការអនុវត្តន៍សាកល្បងនៃគម្រោង ASEAN-UK SAGE ចំនួនពីរជាមួយចក្រភពអង់គ្លេស រួមមាន ១.ការពង្រឹងសមត្ថភាពពិនិត្យតាមដាន និងវាយតម្លៃ (M&E) សម្រាប់ការសិក្សាកម្រិតមូលដ្ឋាន ការគាំទ្រដល់គ្រូបង្រៀន និងអ្នករៀបចំគោលនយោបាយក្នុងការប្រើប្រាស់វិធីសាស្រ្តផ្អែកលើទិន្នន័យ ដើម្បីកែលម្អលទ្ធផលសិក្សារបស់សិស្សានុសិស្ស និង ២.ការបង្កើនការបន្តការសិក្សាតាមរយៈកម្មវិធីបង្រៀនស្របតាមកម្រិតសមត្ថភាពសិស្សសម្រាប់កុមារ និងយុវជនក្រៅសាលា ដោយអនុវត្តកិច្ចអន្តរាគមន៍តាមគោលដៅ ដើម្បីពន្លឿនការសិក្សារបស់កុមារ និងយុវជនក្រៅសាលា ដោយធានាថាពួកគេទទួលបានជំនាញអក្ខរកម្ម និងលេខនព្វន្តសំខាន់ៗ។ 

ការពិភាក្សា និងសិក្សាពីលទ្ធភាពបន្តការគាំទ្របន្ថែមទៀតពីសំណាក់ចក្រភពអង់គ្លេស ពាក់ព័ន្ធការផ្តល់អាហារូបករណ៍ក្រោមកម្មវិធីដែលមានស្រាប់ និងការផ្តល់វគ្គបណ្តុះបណ្តាលរយៈពេលខ្លីលើជំនាញផ្សេងៗដល់និស្សិត មន្ត្រីរាជការកម្ពុជា និងការផ្លាស់ប្តូរយុវជននៃប្រទេសទាំងពីរ។ ការពិនិត្យលទ្ធភាពលើការពង្រឹងកិច្ចសហប្រតិបត្តិការរវាងសាកលវិទ្យាល័យកម្ពុជា និងចក្រភពអង់គ្លេស ដើម្បីពង្រឹងស្តង់ដារនៃការរៀននិងបង្រៀន និងកម្មវិធីសិក្សា សំដៅផ្តល់ឱ្យនិស្សិតកម្ពុជានូវចំណេះដឹង និងជំនាញដែលស្មើនឹងគុណភាពអប់រំនៅចក្រភពអង់គ្លេស។ ការពិភាក្សា និងពិនិត្យលទ្ធភាពក្នុងការអនុវត្តកម្មវិធីអប់រំបែប “Sandwich Program” ដែលអនុញ្ញាតឱ្យនិស្សិតសិក្សានៅកម្ពុជា និងបន្តការសិក្សានៅចក្រភពអង់គ្លេស ឬតាមអ៊ីនធឺណិត ដើម្បីពង្រីកការទទួលបានចំណេះដឹង និងបទពិសោធន៍ថ្មីៗ៕

ដោយ ចាន់ សុភឿន (ប្រភព៖ ក្រសួងអប់រំ)