AKP បន្ទាយមានជ័យ ថ្ងៃទី២៣ ខែតុលា ឆ្នាំ២០២៦ --លោកស្រីឧត្តមសេនីយ៍ទោ ហ៊ាង ឆវី មេបញ្ជាការរងកងរាជអាវុធហត្ថលើផ្ទៃប្រទេស និងជាប្រធានក្រុមការងារទី១ បានគូសបញ្ជាក់ពីការយកចិត្តទុកដាក់ចំពោះសុខុមាលភាព និងអត្ថប្រយោជន៍របស់យោធិនដែលដល់អាយុសោធននិវត្តន៍ ព្រមទាំងការបន្តរក្សាសាមគ្គីភាព និងស្មារតីជាមហាគ្រួសារកងរាជអាវុធហត្ថ តាមរយៈការអនុវត្តន៍ច្បាប់ស្តីពីរបបសោធននិវត្តន៍ និងការជួយគាំទ្រតាមរយៈមូលនិធិរបស់កងរាជអាវុធហត្ថ។

ការគូសបញ្ជាក់នេះធ្វើឡើងក្នុងពិធីផ្សព្វផ្សាយការងារសោធននិវត្តន៍ ឆ្នាំ២០២៧ របស់កងរាជអាវុធហត្ថខេត្តបន្ទាយមានជ័យ ដែលបានប្រព្រឹត្តទៅនាព្រឹកថ្ងៃសុក្រ ទី២៣ ខែតុលា ឆ្នាំ២០២៦ ក្រោមអធិបតីភាពលោកស្រីឧត្តមសេនីយ៍ទោ ហ៊ាង ឆវី ដោយមានការចូលរួមពីលោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យ មេបញ្ជាការរង នាយសេនាធិការរង ប្រធាន-អនុប្រធានមន្ទីរ នាយការិយាល័យ មេបញ្ជាការមូលដ្ឋានកងរាជអាវុធហត្ថក្រុង-ស្រុក និងយោធិនដែលដល់អាយុចូលនិវត្តន៍។

ក្នុងឱកាសនោះ លោកឧត្តមសេនីយ៍ត្រី បោន ប៊ិន បានរាយការណ៍សង្ខេបអំពីស្ថានភាពបច្ចុប្បន្ន និងការងារគ្រប់គ្រងយោធិននៃកងរាជអាវុធហត្ថខេត្តបន្ទាយមានជ័យ។ តាមរបាយការណ៍ យោធិនដែលដល់អាយុសោធននិវត្តន៍ក្នុងឆ្នាំ២០២៦ និងឆ្នាំ២០២៧ មានចំនួនសរុប ៥៨នាក់ ក្នុងនោះស្ត្រីចំនួន ២នាក់។

លោកស្រីឧត្តមសេនីយ៍ទោ ហ៊ាង ឆវី បានពន្យល់ថា ច្បាប់ស្តីពីរបបសោធននិវត្តន៍ និងសោធនបាត់បង់សមត្ថភាពការងារ ត្រូវបានប្រកាសឱ្យប្រើប្រាស់ដំបូងក្នុងឆ្នាំ១៩៩៤ នឹងត្រូវបានធ្វើវិសោធនកម្មជាបន្តបន្ទាប់ រួមទាំងការធ្វើបច្ចុប្បន្នភាពពាក់ព័ន្ធនឹងច្បាប់ស្តីពីរបបសន្តិសុខសង្គម។ ច្បាប់នេះមានសារៈសំខាន់ក្នុងការកំណត់ក្របខណ្ឌគ្រប់គ្រង និងផ្តល់អត្ថប្រយោជន៍ដល់យោធិនដែលបានបំពេញភារកិច្ចបម្រើជាតិ ព្រមទាំងធានាឱ្យការចូលនិវត្តន៍ និងការទទួលបានសិទ្ធិអត្ថប្រយោជន៍ប្រព្រឹត្តទៅស្របតាមបទប្បញ្ញត្តិជាធរមាន។

លោកស្រីឧត្តមសេនីយ៍ទោបានសង្កត់ធ្ងន់ថា ការចូលនិវត្តន៍មិនមែនមានន័យថា យោធិនត្រូវផ្តាច់ខ្លួនចេញពីមហាគ្រួសារកងរាជអាវុធហត្ថនោះទេ ព្រោះស្មារតីសាមគ្គីភាព ការយកចិត្តទុកដាក់ និងការជួយគ្នាទៅវិញទៅមក គឺជាគុណតម្លៃដែលត្រូវបន្តរក្សាទុក ទោះបីយោធិនបានបញ្ចប់ការបំពេញភារកិច្ចជាផ្លូវការក៏ដោយ។

ជាមួយគ្នានេះ លោកស្រីបានលើកឡើងអំពីការបង្កើតមូលនិធិចំនួន២ ក្រោមការដឹកនាំរបស់ឯកឧត្តមនាយឧត្តមសេនីយ៍ សៅ សុខា ដើម្បីចូលរួមជួយគាំទ្រដល់កម្លាំងកងរាជអាវុធហត្ថដែលកំពុងបំពេញការងារ និងអតីតយោធិនដែលបានចូលនិវត្តន៍ ពិការ ឬទទួលមរណភាព។

ដោយមូលនិធិទី១ គឺ «មហាគ្រួសារអាវុធហត្ថ» ដែលមានគោលបំណងជួយទ្រទ្រង់យោធិនដែលកំពុងបម្រើការងារក្នុងជួរកងរាជអាវុធហត្ថ ក្នុងករណីពលីជីវិតដោយមិនពាក់ព័ន្ធនឹងបទល្មើស។ តាមការលើកឡើងក្នុងពិធី ឯកឧត្តមនាយឧត្តមសេនីយ៍ សៅ សុខា បានឧបត្ថម្ភថវិកាផ្ទាល់ខ្លួនចំនួន ៥លានរៀល ហើយមានការចូលរួមបន្ថែមពីមហាគ្រួសារកងរាជអាវុធហត្ថផងដែរ។

ចំណែកមូលនិធិទី២ គឺ «មូលនិធិអតីតមហាគ្រួសារកងរាជអាវុធហត្ថ» ដែលមានគោលបំណងជួយដល់យោធិនដែលបានចូលនិវត្តន៍ ពិការ ឬទទួលមរណភាព ព្រមទាំងគ្រួសារសព។ តាមការបញ្ជាក់របស់លោកស្រីឧត្តមសេនីយ៍ទោ មូលនិធិនេះក៏ផ្តល់ការឧបត្ថម្ភដល់គ្រួសារសពក្នុងទឹកប្រាក់ចំនួន ៥លានរៀលផងដែរ។

លោកស្រីបានបញ្ជាក់ថា ថវិកាសម្រាប់មូលនិធិទាំងនេះបានមកពីការចូលរួមដោយស្ម័គ្រចិត្តរបស់យោធិននៃកងរាជអាវុធហត្ថ ដែលបង្ហាញពីស្មារតីសាមគ្គីភាព ការចែករំលែក និងការទទួលខុសត្រូវចំពោះគ្នាទៅវិញទៅមក។ ការបង្កើតមូលនិធិទាំងនេះ មិនត្រឹមតែជាការជួយសម្រាលបន្ទុកផ្នែកហិរញ្ញវត្ថុដល់អ្នកដែលជួបការលំបាកប៉ុណ្ណោះទេ ប៉ុន្តែក៏ជាការបន្តចងភ្ជាប់ទំនាក់ទំនងរវាងយោធិនដែលកំពុងបំពេញការងារ និងអតីតយោធិនដែលបានលះបង់កម្លាំងកាយចិត្តបម្រើអង្គភាពផងដែរ។

ទន្ទឹមនឹងនេះ លោកស្រីឧត្តមសេនីយ៍ទោ ហ៊ាង ឆវី បានលើកឡើងពីគុណបំណាច់ និងការលះបង់របស់យោធិនកងរាជអាវុធហត្ថខេត្តបន្ទាយមានជ័យ ដែលបានបំពេញភារកិច្ចក្នុងបុព្វហេតុការពារបូរណភាពទឹកដី សន្តិសុខ សុវត្ថិភាព និងទ្រព្យសម្បត្តិរបស់ប្រជាពលរដ្ឋ។ ការបំពេញភារកិច្ចនេះទាមទារឱ្យយោធិនមានស្មារតីទទួលខុសត្រូវខ្ពស់ ការអត់ធ្មត់ និងការត្រៀមខ្លួនប្រឈមនឹងហានិភ័យគ្រប់ពេលវេលា ហើយក្នុងចំណោមអ្នកបំពេញភារកិច្ចទាំងនោះ ក៏មានយោធិនដែលបានពលីជីវិតក្នុងសមរភូមិជាមួយទាហានសៀមឈ្លានពានផងដែរ។

លោកស្រីបានគូសបញ្ជាក់ថា ការលះបង់របស់វីរកងទ័ព វីរនគរបាល និងវីរកងរាជអាវុធហត្ថ គឺជាគុណតម្លៃដែលប្រជាជនកម្ពុជាចងចាំ និងគោរពដឹងគុណជានិច្ច ជាពិសេសការលះបង់ក្នុងការការពារទឹកដី អាយុជីវិត និងទ្រព្យសម្បត្តិរបស់ប្រជាពលរដ្ឋពីការឈ្លានពាន។ ដូច្នេះ ការថែរក្សាសុខុមាលភាព និងការគិតគូរដល់អតីតយោធិន ក៏ដូចជាគ្រួសាររបស់ពួកគេ គឺជាផ្នែកមួយនៃការទទួលស្គាល់ចំពោះគុណបំណាច់ដែលពួកគេបានបំពេញជូនជាតិមាតុភូមិ។

ពិធីផ្សព្វផ្សាយការងារសោធននិវត្តន៍ឆ្នាំ២០២៧ នាពេលនេះ មិនត្រឹមតែជាការផ្តល់ព័ត៌មានអំពីច្បាប់ និងនីតិវិធីពាក់ព័ន្ធនឹងការចូលនិវត្តន៍ប៉ុណ្ណោះទេ ប៉ុន្តែក៏ជាឱកាសសម្រាប់យោធិនដែលដល់អាយុចូលនិវត្តន៍បានយល់ច្បាស់អំពីសិទ្ធិ អត្ថប្រយោជន៍ និងការគាំទ្រដែលពួកគេអាចទទួលបាន ព្រមទាំងជាការបញ្ជាក់ពីស្មារតីមិនបោះបង់គ្នាចោលរបស់មហាគ្រួសារកងរាជអាវុធហត្ថ។

ការយកចិត្តទុកដាក់ចំពោះយោធិនមុន និងក្រោយពេលចូលនិវត្តន៍ គឺជាកត្តាសំខាន់ក្នុងការលើកកម្ពស់សុខុមាលភាព និងការធានាឱ្យអ្នកដែលបានបំពេញភារកិច្ចបម្រើជាតិទទួលបានការគិតគូរតាមសិទ្ធិ និងអត្ថប្រយោជន៍ដែលច្បាប់បានកំណត់។ ទន្ទឹមនឹងនេះ ស្មារតីសាមគ្គីភាព និងការចងចាំគុណបំណាច់របស់យោធិន គឺជាតម្លៃដែលត្រូវបន្តថែរក្សាក្នុងមហាគ្រួសារកងរាជអាវុធហត្ថជានិច្ច៕

ដោយ ឈុន សារ៉ាត