AKP បន្ទាយមានជ័យ ថ្ងៃទី២០ ខែតុលា ឆ្នាំ២០២៦– បេក្ខជនចំនួន ៣៤៩នាក់ បានចូលរួមប្រឡងប្រជែងជ្រើសរើសក្របខ័ណ្ឌមន្ត្រីនគរបាលជាតិបំពេញជួស ឆ្នាំ២០២៦ នៅខេត្តបន្ទាយមានជ័យ ដើម្បីចូលបម្រើការងារនៅវរសេនាតូចនគរបាលការពារព្រំដែនគោកលេខ៤ នៃស្នងការដ្ឋាននគរបាលខេត្ត។ ការប្រឡងនេះ គឺជាដំណើរការដ៏សំខាន់ក្នុងការជ្រើសរើសធនធានមនុស្សដែលមានសមត្ថភាព គុណវុឌ្ឍិ និងភាពស័ក្តិសម ដើម្បីបំពេញភារកិច្ចការពារសន្តិសុខ និងសុវត្ថិភាពជូនប្រជាពលរដ្ឋ។

ពិធីប្រឡងប្រជែងនេះ បានប្រព្រឹត្តទៅនៅស្នងការដ្ឋាននគរបាលខេត្តបន្ទាយមានជ័យ នាព្រឹកថ្ងៃអង្គារ ទី២០ ខែតុលា ឆ្នាំ២០២៦ ក្រោមអធិបតីភាពឯកឧត្តម ឧត្តមសេនីយ៍ឯក សាស្ត្រាចារ្យ ស្វាយ ចាន់ដា អគ្គនាយករង នៃអគ្គនាយកដ្ឋានធនធានមនុស្ស និងជាប្រធានអនុគណៈកម្មការក្រុមទី១ ដោយមានការចូលរួមពីលោកឧត្តមសេនីយ៍ត្រី សឿម សារិទ្ធ ស្នងការនៃស្នងការដ្ឋាននគរបាលខេត្តបន្ទាយមានជ័យ លោកវរសេនីយ៍ទោ ប៉ាង រំដួល នាយរងការិយាល័យបុគ្គលិក តំណាងអគ្គស្នងការដ្ឋាននគរបាលជាតិ និងមន្ត្រីពាក់ព័ន្ធជាច្រើនរូបទៀត។

ក្នុងឱកាសនោះ ឯកឧត្តម ឧត្តមសេនីយ៍ឯក សាស្ត្រាចារ្យ ស្វាយ ចាន់ដា បានចូលរួមដឹកនាំ និងត្រួតពិនិត្យដំណើរការប្រឡងប្រជែង ក្នុងនាមជាប្រធានអនុគណៈកម្មការក្រុមទី១ ដើម្បីធានាឱ្យការប្រឡងប្រព្រឹត្តទៅដោយមានរបៀបរៀបរយ និងស្របតាមគោលការណ៍នៃការជ្រើសរើសក្របខ័ណ្ឌមន្ត្រីនគរបាលជាតិ។

ការជ្រើសរើសក្របខ័ណ្ឌមន្ត្រីនគរបាលជាតិ តាមរយៈការប្រឡងប្រជែង គឺជាយន្តការសំខាន់មួយក្នុងការលើកកម្ពស់គុណភាពធនធានមនុស្សក្នុងវិស័យនគរបាលជាតិ ដោយផ្តល់ឱកាសឱ្យបេក្ខជនបង្ហាញពីសមត្ថភាព និងលទ្ធភាពរបស់ខ្លួនតាមរយៈការប្រឡង។ ការជ្រើសរើសអ្នកមានសមត្ថភាព និងគុណវុឌ្ឍិសមស្រប ក៏ជាមូលដ្ឋានក្នុងការកសាងកម្លាំងនគរបាលឱ្យកាន់តែមានប្រសិទ្ធភាពក្នុងការបំពេញភារកិច្ច និងឆ្លើយតបទៅនឹងតម្រូវការជាក់ស្តែងរបស់អង្គភាព។

ជាពិសេស សម្រាប់កម្លាំងនគរបាលការពារព្រំដែនគោក ការមានធនធានមនុស្សដែលមានសមត្ថភាព វិន័យ និងស្មារតីទទួលខុសត្រូវខ្ពស់ គឺមានសារៈសំខាន់ក្នុងការបំពេញភារកិច្ចការពារបូរណភាពទឹកដី រក្សាសន្តិសុខ សណ្តាប់ធ្នាប់តាមបណ្តោយព្រំដែន និងចូលរួមបម្រើប្រជាពលរដ្ឋឱ្យបានកាន់តែល្អប្រសើរ។
ការរៀបចំការប្រឡងប្រជែងនេះ ក៏បានបង្ហាញពីការយកចិត្តទុកដាក់លើការគ្រប់គ្រង និងអភិវឌ្ឍធនធានមនុស្សក្នុងកង កម្លាំងនគរបាលជាតិ ដោយផ្តោតលើការជ្រើសរើសកម្លាំងថ្មីដែលអាចបំពេញតួនាទី និងភារកិច្ចបានស្របតាមតម្រូវការរបស់អង្គ ភាព ព្រមទាំងរួមចំណែកពង្រឹងសមត្ថភាពក្នុងការការពារសន្តិសុខ និងសុវត្ថិភាពសង្គម។

សូមបញ្ជាក់ថា បេក្ខជនទាំង ៣៤៩នាក់ ដែលបានចូលរួមប្រឡងប្រជែងនៅខេត្តបន្ទាយមានជ័យនេះ គឺជាអ្នកចូលរួមក្នុងដំណើរការជ្រើសរើសក្របខ័ណ្ឌមន្ត្រីនគរបាលជាតិបំពេញជួស ឆ្នាំ២០២៦ សម្រាប់បំពេញតម្រូវការកម្លាំងនៅវរសេនាតូចនគរបាលការពារព្រំដែនគោកលេខ៤ នៃស្នងការដ្ឋាននគរបាលខេត្តបន្ទាយមានជ័យ៕

ដោយ៖ ឈុន សារ៉ាត