AKPបន្ទាយមានជ័យបន្ទាយមានជ័យថ្ងៃទី២០ខែតុលាឆ្នាំ២០២៦–ដោយចាត់ទុកជំងឺឆ្កែឆ្កួតជាបញ្ហាសុខភាពសាធារណៈដែលតម្រូវឱ្យមានការចូលរួមពីគ្រប់ភាគីពាក់ព័ន្ធ លោកស្រី អន ស៊ីថា ប្រធានស្តីទីមន្ទីរកសិកម្ម រុក្ខាប្រមាញ់ និងនេសាទខេត្តបន្ទាយមានជ័យ បានបង្ហាញពីសារៈសំខាន់នៃការជំរុញរៀបចំយុទ្ធនាការចាក់វ៉ាក់សាំងការពារជំងឺឆ្កែឆ្កួតលើសត្វឆ្កែ និងឆ្មាទ្រង់ទ្រាយធំលើកទី១ ទូទាំងខេត្ត ដើម្បីចូលរួមទប់ស្កាត់ការរីករាលដាលនៃជំងឺដ៏កាចសាហាវនេះ ព្រមទាំងកាត់បន្ថយហានិភ័យនៃការចម្លងពីសត្វមកមនុស្ស។

ការលើកកម្ពស់ការចាក់វ៉ាក់សាំងការពារជំងឺឆ្កែឆ្កួតនេះ មិនត្រឹមតែជាការយកចិត្តទុកដាក់ចំពោះសុខភាពសត្វប៉ុណ្ណោះទេ ប៉ុន្តែថែមទាំងជាវិធានការបង្ការដ៏មានសារៈសំខាន់ក្នុងការការពារអាយុជីវិតប្រជាពលរដ្ឋ និងលើកកម្ពស់សុខុមាលភាពសហគមន៍ ស្របតាមគោលការណ៍សុខភាពតែមួយ  ដែលផ្តោតលើទំនាក់ទំនងរវាងសុខភាពមនុស្ស សត្វ និងបរិស្ថាន។

កាលពីថ្ងៃចន្ទ ទី១៩ ខែតុលា ឆ្នាំ២០២៦ ការិយាល័យផលិតកម្ម និងបសុព្យាបាល បានសហការជាមួយអគ្គនាយកដ្ឋានសុខភាពសត្វ និងផលិតកម្មសត្វ វិទ្យាស្ថានជាតិប៉ាស្ទ័រកម្ពុជា អង្គការ WVS មន្ទីរសុខាភិបាល រដ្ឋបាលក្រុង ស្រុកទាំង៩ ក្នុងខេត្ត មន្ត្រីកសិកម្មឃុំ សង្កាត់ និងភ្នាក់ងារសុខភាពសត្វភូមិ រៀបចំកម្មវិធីបើកយុទ្ធនាការចាក់វ៉ាក់សាំងការពារជំងឺឆ្កែឆ្កួតលើសត្វឆ្កែ និងឆ្មាទ្រង់ទ្រាយធំលើកទី១ ទូទាំងខេត្តបន្ទាយមានជ័យ។

កម្មវិធីនេះបានប្រព្រឹត្តទៅនៅសាលប្រជុំធំ នៃមន្ទីរកសិកម្ម រុក្ខាប្រមាញ់ និងនេសាទខេត្ត ក្រោមអធិបតីភាពលោកស្រី អន ស៊ីថា ប្រធានស្តីទីមន្ទីរ ដោយមានអ្នកចូលរួមសរុបចំនួន៣៤នាក់ ក្នុងនោះមានស្ត្រីចំនួន៥នាក់។

ការរៀបចំយុទ្ធនាការនេះបង្ហាញពីកិច្ចសហការរវាងស្ថាប័នជំនាញ អាជ្ញាធរមូលដ្ឋាន និងដៃគូពាក់ព័ន្ធ ក្នុងការរួមគ្នាដាក់ចេញនូវវិធានការបង្ការជំងឺឆ្កែឆ្កួតឱ្យកាន់តែមានប្រសិទ្ធភាព និងពង្រីកវិសាលភាពនៃការទទួលបានសេវាចាក់វ៉ាក់សាំងសម្រាប់សត្វចិញ្ចឹមនៅតាមមូលដ្ឋាននានាក្នុងខេត្ត។

ក្នុងនាមជាថ្នាក់ដឹកនាំមន្ទីរជំនាញកសិកម្មខេត្ត លោកស្រី អន ស៊ីថា បានបង្ហាញពីការចូលរួមយ៉ាងសំខាន់របស់មន្ទីរក្នុងការជំរុញការអនុវត្តវិធានការបង្ការ និងទប់ស្កាត់ជំងឺឆ្កែឆ្កួត តាមរយៈការរៀបចំយុទ្ធនាការចាក់វ៉ាក់សាំងលើសត្វឆ្កែ និងឆ្មាជាលក្ខណៈទ្រង់ទ្រាយធំ។

ការជំរុញនេះឆ្លុះបញ្ចាំងពីការយកចិត្តទុកដាក់ចំពោះសុខភាពសត្វ និងសុខភាពសាធារណៈ ដោយផ្តោតលើគោលដៅសំខាន់ គឺកាត់បន្ថយហានិភ័យនៃការឆ្លងជំងឺឆ្កែឆ្កួតពីសត្វមកមនុស្ស និងបង្កើនសុវត្ថិភាពសម្រាប់ប្រជាពលរដ្ឋនៅទូទាំងខេត្តបន្ទាយមានជ័យ។

ទន្ទឹមនឹងនេះ កិច្ចសហការរវាងអង្គភាពជំនាញ និងអាជ្ញាធរមូលដ្ឋាន គឺជាកត្តាសំខាន់ក្នុងការធានាឱ្យការអនុវត្តយុទ្ធនាការអាចឈានដល់ប្រជាពលរដ្ឋបានកាន់តែទូលំទូលាយ។ ការចូលរួមរបស់មន្ត្រីកសិកម្មឃុំ សង្កាត់ និងភ្នាក់ងារសុខភាពសត្វភូមិ ក៏មានតួនាទីសំខាន់ក្នុងការផ្សព្វផ្សាយព័ត៌មាន និងជំរុញឱ្យម្ចាស់សត្វនាំសត្វចិញ្ចឹមរបស់ខ្លួនមកទទួលការចាក់វ៉ាក់សាំងតាមការណែនាំរបស់មន្ត្រីជំនាញ។

ជំងឺឆ្កែឆ្កួត គឺជាជំងឺឆ្លងដ៏គ្រោះថ្នាក់ដែលបង្កឡើងដោយវីរុស និងអាចចម្លងពីសត្វទៅមនុស្ស ជាទូទៅតាមរយៈការខាំ ឬការកោសដែលបណ្តាលឱ្យមានរបួស និងការប៉ះពាល់ទឹកមាត់សត្វដែលមានមេរោគទៅនឹងស្បែកដែលរងរបួស ឬភ្នាសរំអិល។

ចំពោះប្រជាពលរដ្ឋ ប្រសិនបើត្រូវបានឆ្កែ ឆ្មា ឬសត្វដែលអាចមានជំងឺឆ្កែឆ្កួតខាំ ឬកោស ត្រូវលាងរបួសជាមួយសាប៊ូ និងទឹកច្រើនឱ្យបានយ៉ាងហោចណាស់១៥នាទី រួចទៅទទួលការវាយតម្លៃ និងព្យាបាលបង្ការនៅមណ្ឌលសុខាភិបាលឱ្យបានឆាប់បំផុត។ មិនត្រូវរង់ចាំឱ្យមានរោគសញ្ញាទើបទៅពេទ្យឡើយ។

ការបើកយុទ្ធនាការចាក់វ៉ាក់សាំងការពារជំងឺឆ្កែឆ្កួតលើសត្វឆ្កែ និងឆ្មាទ្រង់ទ្រាយធំលើកទី១ ទូទាំងខេត្តបន្ទាយមានជ័យ គឺជាជំហានមួយក្នុងការពង្រឹងការងារបង្ការ និងទប់ស្កាត់ជំងឺឆ្លងពីសត្វមកមនុស្ស តាមរយៈការចូលរួមរបស់ស្ថាប័នជំនាញ និងដៃគូពាក់ព័ន្ធ។

ដើម្បីឱ្យយុទ្ធនាការនេះសម្រេចបាននូវគោលដៅ ប្រជាពលរដ្ឋគួរចូលរួមនាំសត្វឆ្កែ និងឆ្មារបស់ខ្លួនមកចាក់វ៉ាក់សាំងតាមការណែនាំរបស់មន្ត្រីជំនាញ ព្រមទាំងចូលរួមអនុវត្តវិធានការថែទាំ និងគ្រប់គ្រងសត្វចិញ្ចឹមឱ្យបានត្រឹមត្រូវ។

ជារួម ការជំរុញរបស់លោកស្រី អន ស៊ីថា ក្នុងការរៀបចំយុទ្ធនាការនេះ បានបង្ហាញពីសារៈសំខាន់នៃការយកចិត្តទុកដាក់លើសុខភាពសត្វ សុខភាពមនុស្ស និងសុវត្ថិភាពសហគមន៍។ ការបង្ការជំងឺឆ្កែឆ្កួតមិនអាចពឹងផ្អែកលើស្ថាប័នណាមួយតែមួយបានឡើយ ប៉ុន្តែត្រូវការការសហការពីគ្រប់ភាគី រួមទាំងអាជ្ញាធរ មន្ត្រីជំនាញ ម្ចាស់សត្វ និងប្រជាពលរដ្ឋ។

ការចាក់វ៉ាក់សាំងឱ្យសត្វចិញ្ចឹម គឺជាការការពារសត្វផង និងជាការការពារអាយុជីវិតមនុស្សផងដែរ។ នេះជាសារសំខាន់ដែលសង្គមគួរយកចិត្តទុកដាក់ ដើម្បីរួមគ្នាកាត់បន្ថយហានិភ័យនៃជំងឺឆ្កែឆ្កួត និងកសាងសហគមន៍មួយដែលមានសុវត្ថិភាព និងសុខភាពល្អប្រសើរជាងមុន៕

ដោយ៖ ឈុន សារ៉ាត