AKP ឧត្តរមានជ័យ ថ្ងៃទី៩ ខែតុលា ឆ្នាំ២០២៦--រដ្ឋបាលខេត្តឧត្តរមានជ័យ បានរៀបចំពិធីសម្ពោធដាក់ឱ្យប្រើប្រាស់ជាផ្លូវការផ្លូវភ្លោះបេតុងអាមេមួយខ្សែមានប្រវែងសរុប ៣៤៦០ម៉ែត្រ និងទទឹងប្រវែង១៥ម៉ែត្រ កាលពីថ្ងៃទី៨ ខែតុលា ឆ្នាំ២០២៦ ដែលជាសមិទ្ធផលហេដ្ឋារចនាសម្ព័ន្ធថ្មីមួយទៀត សម្រាប់បម្រើដល់ការធ្វើដំណើរ និងការដឹកជញ្ជូនរបស់ប្រជាពលរដ្ឋ។

ពិធីនេះប្រព្រឹត្តទៅក្រោមអធិបតីភាព ឯកឧត្តម ស៊ី ប្រាសិទ្ធ ប្រធានក្រុមប្រឹក្សាខេត្ត និងឯកឧត្តម មាន ចាន់យ៉ាដា អភិបាល នៃគណៈអភិបាលខេត្តឧត្តរមានជ័យ ដោយមានការចូលរួមពីថ្នាក់ដឹកនាំ មន្ត្រីរាជការ កងកម្លាំងមានសមត្ថកិច្ច អាជ្ញាធរមូលដ្ឋាន និងប្រជាពលរដ្ឋក្នុងមូលដ្ឋានយ៉ាងច្រើនកុះករ។

ឯកឧត្តម មាន ចាន់យ៉ាដា មានប្រសាសន៍ថា ផ្លូវភ្លោះបេតុងអាមេខ្សែនេះ តភ្ជាប់ចាប់ពី រង្វង់មូលព្រះលោកេស្វារៈ រហូតដល់ រង្វង់មូលព្រះបាទជ័យវរ្ម័នទី៧ ដែលជាផ្លូវសំខាន់ស្ថិតនៅក្នុងតំបន់កណ្តាលក្រុងសំរោង។ ការដាក់ឱ្យប្រើប្រាស់ផ្លូវនេះនឹងជួយសម្រួលដល់ការធ្វើដំណើររបស់ប្រជាពលរដ្ឋ កាន់តែងាយស្រួលជាងមុនកាត់បន្ថយការកកស្ទះចរាចរណ៍ និងជំរុញការតភ្ជាប់ហេដ្ឋារចនាសម្ព័ន្ធក្នុងក្រុងសំរោងឱ្យកាន់តែមានភាពល្អប្រសើរ។

ឯកឧត្តមមានប្រសាសន៍បន្តថា សមិទ្ធផលនេះក៏ជាផ្នែកមួយនៃការអភិវឌ្ឍ និងកែលម្អសោភ័ណភាពទីក្រុង ព្រមទាំងរួមចំណែកលើកកម្ពស់សក្តានុពលសេដ្ឋកិច្ច សង្គម និងការរស់នៅរបស់ប្រជាពលរដ្ឋក្នុងខេត្តឧត្តរមានជ័យឱ្យកាន់តែប្រសើរឡើង។ សមិទ្ធផលថ្មីជាប្រវត្តិសាស្រ្តនេះ ត្រូវបានស្ថាបនាសាងសងប្រកដដោយគុណភាព ដែលមានបំពាក់ភ្លើងសូឡាបំភ្លឺផ្លូវ អមទៅដោយសួនច្បារបែកចែកទ្រូងផ្លូវ គឺជាសមិទ្ធផល ដ៏ថ្មីស្រឡាង បម្រើជាប្រយោជន៍ដល់ប្រជាពលរដ្ឋប្រើប្រាស់ សម្រួលដល់ការធ្វើដំណើរនិងលើកកម្ពស់ជីវភាពរស់នៅរបស់ប្រជាពលរដ្ឋ បង្កើនសោភ័ណ្ឌភាព និងការអភិវឌ្ឍ រីកចម្រើនរបស់ខេត្តថែមទៀត៕

ដោយ ទិត ស្រ៊