AKP បន្ទាយមានជ័យ ថ្ងៃទី៥ ខែតុលា ឆ្នាំ២០២៦--ឯកឧត្តម អ៊ុ រាត្រី អភិបាលនៃគណៈអភិបាលខេត្តបន្ទាយមានជ័យ និងលោកជំទាវ ព្រមទាំងឯកឧត្តម ប្លែក វ៉ារី ប្រធានក្រុមប្រឹក្សាខេត្ត ឯកឧត្តម-លោកជំទាវ សមាជិកក្រុមប្រឹក្សាខេត្ត មន្ត្រីរាជការ និងថ្នាក់ដឹកនាំមន្ទីរ-អង្គភាពនានា នាព្រឹកថ្ងៃទី០៥ ខែតុលា ឆ្នាំ២០២៦ បានអញ្ជើញចូលរួមរាប់បាត្របញ្ចប់បុណ្យកាន់បិណ្ឌវេនទី៩ ឆ្លងចូលវេនបិណ្ឌទី១០ នៅវត្តច័ន្ទសីសាមគ្គី រតនារាមកូបកើត និងវត្តពោធិសូរិយារាម ស្ថិតនៅឃុំកូប ស្រុកអូរជ្រៅ ខេត្តបន្ទាយមានជ័យ។

ក្នុងឱកាសនោះ ឯកឧត្តម អ៊ុ រាត្រី បានមានប្រសាសន៍ថា ពិធីបុណ្យកាន់បិណ្ឌ និងភ្ជុំបិណ្ឌ គឺជាប្រពៃណី និងទំនៀមទម្លាប់ដ៏ល្អផូរផង់របស់ប្រជាជនកម្ពុជា ដែលបានបន្សល់ទុកពីបុរាណកាល និងត្រូវបានប្រជាពលរដ្ឋខ្មែរបន្តអនុវត្តយ៉ាងខ្ជាប់ខ្ជួនពីមួយជំនាន់ទៅមួយជំនាន់។

ឯកឧត្តមបានបញ្ជាក់ថា ការចូលរួមធ្វើបុណ្យកាន់បិណ្ឌ មិនត្រឹមតែជាការប្រតិបត្តិតាមប្រពៃណីព្រះពុទ្ធសាសនាប៉ុណ្ណោះទេ ប៉ុន្តែថែមទាំងជាឱកាសដ៏សំខាន់សម្រាប់កូនចៅជំនាន់ក្រោយបានស្គាល់ យល់ដឹង និងបន្តថែរក្សាមរតកវប្បធម៌ ទំនៀមទម្លាប់ និងអត្តសញ្ញាណជាតិរបស់ខ្លួនឱ្យបានគង់វង្ស។

ឯកឧត្តម អ៊ុ រាត្រី ក៏បានលើកឡើងពីសារៈសំខាន់នៃការធ្វើបុណ្យឧទ្ទិសកុសលជូនដល់បុព្វការីជន ញាតិការដែលបានចែកឋានទៅ ព្រមទាំងការធ្វើទាន ប្រគេនចង្ហាន់ និងទេយ្យវត្ថុដល់ព្រះសង្ឃ ដែលជាការបង្ហាញពីសេចក្តីកតញ្ញូ និងការដឹងគុណចំពោះអ្នកមានគុណ ជាពិសេសឪពុកម្តាយ ជីដូនជីតា និងបុព្វបុរសខ្មែរដែលបានបន្សល់ទុកនូវកេរដំណែលដ៏មានតម្លៃដល់កូនចៅជំនាន់ក្រោយ។

ជាមួយគ្នានេះ ឯកឧត្តមអភិបាលខេត្ត បានអំពាវនាវដល់ប្រជាពលរដ្ឋគ្រប់រូបឱ្យបន្តចូលរួមថែរក្សា និងលើកតម្កើងព្រះពុទ្ធសាសនា ព្រមទាំងប្រពៃណី ទំនៀមទម្លាប់ដ៏ល្អរបស់ជាតិ តាមរយៈការប្រតិបត្តិអំពើល្អ ការធ្វើបុណ្យធ្វើទាន ការរួបរួមសាមគ្គី និងការគោរពប្រតិបត្តិតាមគន្លងធម៌។

ឯកឧត្តមបានចាត់ទុកការជួបជុំគ្នារបស់ថ្នាក់ដឹកនាំ មន្ត្រីរាជការ និងប្រជាពលរដ្ឋនៅតាមទីវត្តអារាម ក្នុងឱកាសបុណ្យកាន់បិណ្ឌនេះថា ជាការរួមចំណែកដ៏មានសារៈសំខាន់ក្នុងការពង្រឹងសាមគ្គីភាព និងភាពសុខដុមរមនានៅក្នុងសហគមន៍ ព្រោះពិធីបុណ្យប្រពៃណីខ្មែរមិនត្រឹមជាពេលវេលាសម្រាប់ធ្វើបុណ្យប៉ុណ្ណោះទេ ប៉ុន្តែជាវេទិកាមួយដែលធ្វើឱ្យប្រជាពលរដ្ឋបានជួបជុំ សួរសុខទុក្ខគ្នា និងចែករំលែកក្តីស្រឡាញ់ ក្តីមេត្តា និងទឹកចិត្តសប្បុរសធម៌។

ពិធីរាប់បាត្រនាព្រឹកនេះ បានប្រព្រឹត្តទៅក្នុងបរិយាកាសប្រកបដោយសទ្ធាជ្រះថ្លា និងសាមគ្គីភាព ដោយថ្នាក់ដឹកនាំ មន្ត្រីរាជការ និងពុទ្ធបរិស័ទ បាននាំយកចង្ហាន់ និងទេយ្យវត្ថុប្រគេនព្រះសង្ឃ ព្រមទាំងឧទ្ទិសកុសលផលបុណ្យជូនដល់បុព្វការីជន និងញាតិការដែលបានចែកឋានទៅ។

ការរៀបចំពិធីបុណ្យកាន់បិណ្ឌនេះ ក៏បានបង្ហាញឱ្យឃើញពីការចូលរួមរបស់រដ្ឋបាលខេត្ត និងប្រជាពលរដ្ឋក្នុងការថែរក្សា លើកតម្កើង និងផ្សព្វផ្សាយប្រពៃណីវប្បធម៌ខ្មែរ ជាពិសេសការបណ្តុះស្មារតីកូនចៅជំនាន់ក្រោយឱ្យចេះគោរព និងស្រឡាញ់កេរដំណែលដ៏ថ្លៃថ្លារបស់ដូនតា ដើម្បីឱ្យប្រពៃណីដ៏ល្អនេះបន្តរស់រវើក និងគង់វង្សជារៀងរហូត។

សូមបញ្ជាក់ផងដែរថា បុណ្យកាន់បិណ្ឌ និងភ្ជុំបិណ្ឌ គឺជាពិធីបុណ្យប្រពៃណីសាសនាដ៏ធំមួយរបស់ប្រជាជនកម្ពុជា ដែលមានរយៈពេល១៥ថ្ងៃ ដោយចាប់ផ្តើមពីបិណ្ឌទី១ រហូតដល់ថ្ងៃភ្ជុំបិណ្ឌ ហើយជាឱកាសដែលពុទ្ធបរិស័ទនាំគ្នាទៅវត្តធ្វើបុណ្យ ស្តាប់ធម៌ រាប់បាត្រ និងឧទ្ទិសកុសលជូនដល់បុព្វការីជនដែលបានចែកឋានទៅ៕

ដោយ ឈុន សារ៉ាត