AKP បន្ទាយមានជ័យ ថ្ងៃទី២ ខែតុលា ឆ្នាំ២០២៦--អាជ្ញាធរខេត្តបន្ទាយមានជ័យ បានអំពាវនាវដល់ប្រជាពលរដ្ឋដែលធ្វើដំណើរតាមបណ្តោយផ្លូវជាតិលេខ៥ ជាពិសេសនៅត្រង់ចំណុចប្រសព្វផ្លូវវាងក្រុង ចូលទៅក្នុងក្រុងសិរីសោភ័ណ ត្រង់ចំណុចមុខវត្តសិរីមង្គល រហូតដល់មន្ទីរសុខាភិបាលនៃរដ្ឋបាលខេត្ត ត្រូវបង្កើនការប្រុងប្រយ័ត្នខ្ពស់ ខណៈទឹកជំនន់បានហូរច្រោះបណ្តាលឱ្យផ្លូវមួយចំនួនរងការខូចខាត និងកើតមានជង្ហុកធំៗ ដែលអាចបង្កហានិភ័យដល់ការធ្វើដំណើរ។

ការអំពាវនាវនេះធ្វើឡើងក្នុងពេលដែលស្ថានភាពទឹកជំនន់នៅខេត្តបន្ទាយមានជ័យ នៅតែបន្តបង្កផលប៉ះពាល់នៅតាមក្រុង-ស្រុកមួយចំនួន។ ថ្វីដ្បិតស្ថានភាពទឹកជំនន់នៅក្នុងក្រុងប៉ោយប៉ែតមាននិន្នាការស្រកចុះជាបណ្តើរៗក្តី ប៉ុន្តែក្រុងសិរីសោភ័ណ និងស្រុកមង្គលបូរី កំពុងទទួលរងការហូរចូលនៃទឹកពីផ្នែកខាងលើ បណ្តាលឱ្យជន់លិចផ្ទះសម្បែង ផលដំណាំ និងហេដ្ឋារចនាសម្ព័ន្ធមួយចំនួន ពិសេសបណ្តាញផ្លូវដែលជាផ្លូវធ្វើដំណើរដ៏សំខាន់របស់ប្រជាពលរដ្ឋ។

ក្នុងស្ថានភាពនេះ ឯកឧត្តម អ៊ុ រាត្រី អភិបាល នៃគណៈអភិបាលខេត្តបន្ទាយមានជ័យ បានដឹកនាំដោយផ្ទាល់នូវកម្លាំងមានសមត្ថកិច្ច និងអាជ្ញាធរមូលដ្ឋាន ដើម្បីចុះអន្តរាគមន៍ និងជម្លៀសប្រជាពលរដ្ឋដែលរស់នៅតំបន់ប្រឈមនឹងការជន់លិច ទៅកាន់ទីទួលមានសុវត្ថិភាព នៅក្នុងភូមិសាស្ត្រក្រុងសិរីសោភ័ណ និងស្រុកមង្គលបូរី។

នៅរសៀលថ្ងៃទី០១ ខែតុលា ឆ្នាំ២០២៦ ឯកឧត្តមអភិបាលខេត្ត បានណែនាំដល់ប្រជាពលរដ្ឋដែលធ្វើដំណើរតាមផ្លូវជាតិលេខ៥ ត្រូវបង្កើនការប្រុងប្រយ័ត្ន ជាពិសេសនៅចំណុចប្រសព្វផ្លូវវាងក្រុង ចូលក្នុងក្រុងសិរីសោភ័ណ ចាប់ពីតំបន់មុខវត្តសិរីមង្គល រហូតដល់មន្ទីរសុខាភិបាលនៃរដ្ឋបាលខេត្ត។ តំបន់នេះបានទទួលរងការហូរច្រោះពីទឹកជំនន់ បណ្តាលឱ្យមានកំណាត់ផ្លូវរងការខូចខាត និងមានជង្ហុកធំៗ ដែលអ្នកបើកបរអាចមើលមិនឃើញបានច្បាស់នៅពេលទឹកនៅបន្តហូរ ឬនៅពេលធ្វើដំណើរពេលយប់។

អាជ្ញាធរខេត្តបានអំពាវនាវឱ្យអ្នកបើកបរគ្រប់ប្រភេទ កាត់បន្ថយល្បឿន ប្រុងប្រយ័ត្នចំពោះសញ្ញា និងទីតាំងផ្លូវរងការខូចខាត និងអនុវត្តតាមការណែនាំរបស់សមត្ថកិច្ច ដើម្បីចៀសវាងគ្រោះថ្នាក់ដែលអាចកើតឡើងដោយសារស្ថានភាពផ្លូវមិនប្រក្រតី។

យោងតាមរបាយការណ៍ផលប៉ះពាល់ និងការខូចខាតដោយសារគ្រោះទឹកជំនន់របស់គណៈកម្មាធិការគ្រប់គ្រងគ្រោះមហន្តរាយខេត្តបន្ទាយមានជ័យ គិតត្រឹមម៉ោង ១៦:០០ នាទីល្ងាច ថ្ងៃទី០១ ខែតុលា ឆ្នាំ២០២៦ ទូទាំងខេត្ត មានប្រជាពលរដ្ឋត្រូវបានជម្លៀសទៅកាន់ទីទួលសុវត្ថិភាពសរុប ៣,២៤២គ្រួសារ ខណៈផ្លូវចំនួន ៥០២កន្លែង ស្មើនឹងប្រវែងប្រមាណ ២៩៤,២៥០ម៉ែត្រ បានទទួលរងផលប៉ះពាល់។

ក្នុងចំណោមតំបន់រងផលប៉ះពាល់ ក្រុងប៉ោយប៉ែតមានប្រជាពលរដ្ឋជម្លៀសទៅទីទួលសុវត្ថិភាពចំនួន ១,៥៦៤គ្រួសារ ខណៈក្រុងសិរីសោភ័ណមាន ៧៧១គ្រួសារ ស្រុកមង្គលបូរី ៨៥៦គ្រួសារ ស្រុកអូរជ្រៅ ៣៣គ្រួសារ និងស្រុកភ្នំស្រុក ១៨គ្រួសារ។

ដោយឡែក ផលប៉ះពាល់លើវិស័យកសិកម្មក៏មានទំហំគួរឱ្យកត់សម្គាល់ ដោយមានដំណាំស្រូវរងផលប៉ះពាល់សរុប ២,៧០០០ហិកតា ដំឡូងមី ១៥៦ហិកតា និងដំណាំរួមផ្សំ ១០ហិកតា ខណៈដំណាំស្រូវខូចខាតសរុប ៤៣៤ហិកតា។

ក្នុងចំណោមហេដ្ឋារចនាសម្ព័ន្ធដែលរងផលប៉ះពាល់ ផ្លូវគឺជាផ្នែកមួយដែលអាជ្ញាធរយកចិត្តទុកដាក់ជាពិសេស ព្រោះការខូចខាតផ្លូវដោយសារទឹកហូរច្រោះ អាចប៉ះពាល់ទាំងការធ្វើដំណើរ ការដឹកជញ្ជូនទំនិញ និងការឆ្លើយតបសង្គ្រោះបន្ទាន់។ ជាពិសេសផ្លូវជាតិលេខ៥ គឺជាច្រកធ្វើដំណើរ និងដឹកជញ្ជូនដ៏សំខាន់ក្នុងខេត្ត ដូច្នេះការរក្សាសុវត្ថិភាពអ្នកធ្វើដំណើរត្រូវបានចាត់ទុកជាអាទិភាព។

ជាមួយគ្នានេះ មន្ទីរសាធារណការ និងដឹកជញ្ជូនខេត្តបន្ទាយមានជ័យ ក៏បានចេញសេចក្តីជូនដំណឹងនៅថ្ងៃទី០១ ខែតុលា ឆ្នាំ២០២៦ ស្តីពីការផ្អាកជាបណ្តោះអាសន្នចំពោះយានយន្តធុនធំគ្រប់ប្រភេទ ដែលធ្វើដំណើរឆ្លងកាត់កំណាត់ផ្លូវជាតិលេខ៥ ចាប់ពីគីឡូម៉ែត្រលេខ ៣៤០+០០០ ដល់គីឡូម៉ែត្រលេខ ៣៦១+៨៥០ ក្នុងភូមិសាស្ត្រខេត្តបន្ទាយមានជ័យ ចាប់ពីតំបន់អូរស្ងួត រហូតដល់ផ្លូវវាងក្រុងទឹកថ្លា។

វិធានការនេះត្រូវបានអនុវត្តក្នុងបរិបទដែលទឹកជំនន់នៅតែបន្តបង្កសម្ពាធលើហេដ្ឋារចនាសម្ព័ន្ធ និងប្រព័ន្ធដឹកជញ្ជូន ដើម្បីកាត់បន្ថយហានិភ័យចំពោះអ្នកប្រើប្រាស់ផ្លូវ និងការខូចខាតបន្ថែមលើកំណាត់ផ្លូវដែលកំពុងរងផលប៉ះពាល់។

អាជ្ញាធរខេត្តបន្ទាយមានជ័យ ក៏បានបន្តអំពាវនាវដល់ប្រជាពលរដ្ឋនៅតំបន់ទំនាប និងតំបន់ប្រឈមនឹងទឹកជំនន់ ត្រូវតាមដានព័ត៌មាន និងការណែនាំរបស់អាជ្ញាធរជាប្រចាំ ព្រមទាំងត្រៀមលក្ខណៈជម្លៀសទៅកាន់ទីទួលមានសុវត្ថិភាពនៅពេលមានការជូនដំណឹង។ ចំពោះអ្នកធ្វើដំណើរ ត្រូវជ្រើសរើសល្បឿនសមស្រប និងបង្កើនការប្រុងប្រយ័ត្នជាពិសេសនៅកន្លែងដែលទឹកកំពុងហូរកាត់ផ្លូវ ឬមានសញ្ញានៃការខូចខាត ដើម្បីការពារសុវត្ថិភាពអាយុជីវិតជាចម្បង៕

ដោយ ឈុន សារ៉ាត