AKP ភ្នំពេញ ថ្ងៃទី១ ខែតុលា ឆ្នាំ២០២៦ -- គណៈប្រតិភូក្រសួងព័ត៌មានកម្ពុជានៃ​ព្រះ​រាជាណាចក្រ​កម្ពុជា ដែល​ដឹក​នាំ​ដោយ ឯកឧត្តម ប្រាក់ ថាវអមិដា អនុរដ្ឋលេខាធិការក្រសួងព័ត៌មាន និង​ជា​តំណាងដ៏ខ្ពង់ខ្ពស់ ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន បានអញ្ជើញចូលរួមក្នុង «វេទិកាប្រព័ន្ធផ្សព្វផ្សាយ CICA លើកទី១» (First CICA Media Forum) នាថ្ងៃទី០១ ខែតុលា ឆ្នាំ២០២៦ នៅរដ្ឋធានីបាគូ សាធារណរដ្ឋ​អាស៊ែ​បៃ​ហ្សង់ ដើម្បីរួមចំណែកពង្រឹងសន្តិសុខព័ត៌មាន និងលើកកម្ពស់កិច្ចសហប្រតិបត្តិការសារព័ត៌មានក្នុងទ្វីបអាស៊ី។

វេទិកាអន្តរជាតិកម្រិតខ្ពស់នេះ ត្រូវ​បាន​រៀប​ចំ​ឡើង​ដោយ​ទីភ្នាក់ងារ​អភិវឌ្ឍន៍​ប្រព័ន្ធ​ផ្សព្វ​ផ្សាយ​នៃ​សាធារណរដ្ឋ​អាស៊ែបៃហ្សង់ (Media Development Agency of the Republic of Azerbaijan) ក្រោម​មូលបទ​ដ៏​មាន​​សារៈសំខាន់គឺ «ការ​កសាង​ទំនុក​ចិត្ត​តាមរយៈ​ប្រព័ន្ធ​ផ្សព្វ​ផ្សាយ​ក្នុង​ពិភពលោក​ដែល​មាន​ការ​​បែក​បាក់» (“Building Trust through Media in a Polarized World”)។

វេទិកានេះបានប្រមូលផ្តុំនូវមន្ត្រីជាន់ខ្ពស់រដ្ឋាភិបាល ថ្នាក់ដឹកនាំស្ថាប័នប្រព័ន្ធផ្សព្វផ្សាយ និង​អ្នក​ជំនាញ​ការ​ទំនាក់​ទំនងមកពីបណ្តាប្រទេសជាសមាជិកសន្និសីទស្តីពី​អន្តរកម្ម និងវិធានការកសាងទំនុកចិត្តនៅអាស៊ី (CICA) យ៉ាងច្រើនកុះករ។

វេទិកានាពេលនេះ មានគោលបំណងសំខាន់ក្នុងការពង្រឹងកិច្ចសហប្រតិបត្តិការ និង​ការ​តភ្ជាប់​បណ្តាញ​ប្រព័ន្ធ​ផ្សព្វផ្សាយក្នុងតំបន់ ព្រមទាំងពិភាក្សាផ្លាស់ប្តូរទស្សនទានជុំវិញការលើកកម្ពស់ទំនុកចិត្តសាធារណៈ ការ​ចែករំលែកបទពិសោធន៍ក្នុងការរាយការណ៍ព័ត៌មានប្រកបដោយក្រមសីលធម៌ និង​ការ​ទទួល​ខុស​ត្រូវ​ខ្ពស់​។ បន្ថែម​ពីនេះ អង្គ​វេទិកា​ ក៏​បាន​ផ្តោត​ការ​ពិភាក្សា​យ៉ាង​ស៊ី​ជម្រៅ​លើ​វិធានការ​រួម​គ្នា​ដើម្បី​ប្រយុទ្ធ​ប្រឆាំង​នឹង​ព័ត៌មាន​មិន​ពិត និងព័ត៌មានក្លែងក្លាយ ក៏ដូចជាការឆ្លើយតបចំពោះបញ្ហាប្រឈម និង​កាលានុវត្តភាព​ថ្មី​ៗ​ដែល​កើត​ចេញ​ពីការវិវត្តយ៉ាងឆាប់​រហ័ស​នៃបច្ចេកវិទ្យាបញ្ញាសិប្បនិម្មិត (AI) និងបណ្តាញទំនាក់ទំនងសង្គម។

ពិធីបើកជាផ្លូវការនៃវេទិកា ត្រូវបានប្រព្រឹត្តទៅក្រោមអធិបតីភាពរបស់ឥស្សរជនជាន់ខ្ពស់ រួមមាន លោក Hikmat Hajiyev ជំនួយការប្រធានាធិបតី និង​ជា​ប្រធាននាយកដ្ឋាន​កិច្ច​ការ​គោល​នយោបាយ​ការ​បរទេស​នៃ​ខុទ្ទកាល័យប្រធានាធិបតីអាស៊ែបៃហ្សង់ ឯកអគ្គរដ្ឋទូត Kairat Sarybay អគ្គលេខាធិការ CICA និង លោក Khalaf Khalafov តំណាងប្រធានាធិបតីអាស៊ែបៃហ្សង់ទទួលបន្ទុកបេសកកម្មពិសេស។

វេទិកាពេញមួយថ្ងៃនេះ ត្រូវបានរៀបចំឡើងដើម្បីពិភាក្សាលើបញ្ហាប្រឈម និង​កាលានុវត្តភាព​នៃ​វិស័យ​ព័ត៌មា​នក្នុងយុគសម័យឌីជីថល តាមរយៈសម័យប្រជុំតុមូលចំនួនពីរ រួមមាន៖
១. សម័យប្រជុំទី១៖ «​អាស៊ែបៃហ្សង់ក្នុង​នាម​ជា​ប្រធាន​ដឹក​នាំ​៖ គំនិតផ្តួចផ្តើម កិច្ចសហប្រតិបត្តិការ និង​លទ្ធផល» (Azerbaijani Chairmanship: Initiatives, Cooperation, Results) ដែល​ពិនិត្យ​លើ​វឌ្ឍនភាព និងគំនិតផ្តួចផ្តើមក្នុងក្របខ័ណ្ឌតំបន់។
២. សម័យប្រជុំទី២៖ «តួនាទីនៃប្រព័ន្ធផ្សព្វផ្សាយក្នុងការកសាង​សាមគ្គីភាព​​សង្គម និងការ​ជំរុញ​កិច្ច សន្ទនាអន្តរវប្បធម៌» (The Role of the Media in Strengthening Social Cohesion and Intercultural Dialogue) ដែលផ្តោតលើការប្រើប្រាស់ព័ត៌មានពិតដើម្បីបង្កើតការយោគយល់គ្នា ដែលក្នុងនោះ ឯកឧត្តម ប្រាក់ ថាវអមិដា ក៏ត្រូវបានអញ្ជើញជាវាគ្មិនកិត្តិយសផងដែរ។
ក្រៅពីកិច្ចពិភាក្សាខាងលើ អង្គវេទិកា​បាន​ផ្លាស់​ប្តូរ​បទ​ពិសោធន៍​យ៉ាង​ទូលំ​ទូលាយ​លើ​ការ​ពង្រឹង​ក្រម​សីលធម៌​វិជ្ជាជីវៈសារព័ត៌មាន យុទ្ធសាស្ត្រប្រយុទ្ធប្រឆាំងនឹងព័ត៌មានក្លែងក្លាយ និងព័ត៌មានមិនពិត ព្រម​ទាំង​ការ​ទាញ​យកផលប្រយោជន៍ និងការគ្រប់គ្រងហានិភ័យពីបច្ចេកវិទ្យាបញ្ញាសិប្បនិម្មិត (AI) លើប្រព័ន្ធ​ផ្សព្វ​ផ្សាយ​ទំនើប។

វត្តមានរបស់គណៈប្រតិភូកម្ពុជា ដែលរួមមានថ្នាក់ដឹកនាំ និងមន្ត្រីជំនាញនៃក្រសួងព័ត៌មាន ព្រម​ទាំង​តំណាង​អ្នក​សារព័ត៌មានជាតិ បាន​ឆ្លុះប​ញ្ចាំង​យ៉ាង​ច្បាស់​ពី​ការ​ប្តេជ្ញាចិត្ត​របស់​កម្ពុជា​ក្នុងការ​ចូលរួ​មចំណែក​យ៉ាង​សកម្មជាមួយសហគមន៍អន្តរជាតិ ដើម្បីលើកកម្ពស់សណ្តាប់ធ្នាប់ព័ត៌មាន សន្តិសុខព័ត៌មាន និង​ការ​កសាង​ស្ពានមិត្តភាពរវាងប្រជាជាតិទាំងឡាយតាមរយៈវិស័យព័ត៌មាន៕

ដោយ៖ ប៊ុនរិទ្ធ