AKP ភ្នំពេញ ថ្ងៃទី២៣ ខែកញ្ញា ឆ្នាំ២០២៦--

ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃបានថ្លែងថា បទល្មើសឆបោក កាលពីដើមឡើយមានលក្ខណៈប្រពៃណី ឆបោកតាមរយៈមនុស្ស និងមនុស្ស ដោយត្រូវវិវត្តទៅតាមរយៈប្រព័ន្ធបច្ចេកវិទ្យា និងមានកលល្បិចថ្មីៗ ដែលក្រុមឧក្រិដ្ឋជនអាចធ្វើការឆបោកគ្រប់គោលដៅទាំងអស់នៅលើសកលលោក ដោយប្រើប្រាស់ពេលវេលាតែប៉ុន្មាននាទីប៉ុណ្ណោះ។ ការលើកឡើងរបស់ឯកឧត្ដមរដ្ឋមន្រ្ដីក្រសួងមហាផ្ទៃយ៉ាងដូច្នេះ ក្នុងឱកាសចូលរួមក្នុងពិធីបើកសន្និសីទអន្តរជាតិ ស្តីពីការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា នាព្រឹកថ្ងៃទី២៣ ខែកញ្ញា ឆ្នាំ២០២៦ នៅរាជធានីភ្នំពេញ ក្រោមមូលបទ៖ «រួមគ្នាឆ្ពោះទៅកាត់ផ្តាច់ច្រវាក់ និងបញ្ចប់ការឆបោកតាមប្រព័ន្ធបច្ចេកវិទ្យា» ក្នុងនាមកម្ពុជាធ្វើជាម្ចាស់ផ្ទះក្នុងការរៀបចំសន្និសីទអន្តរជាតិនេះ។

ឯកឧត្តមអភិសន្តិបណ្ឌិត ស សុខា បានលើកឡើងថា ជាការកត់សម្គាល់ក្នុងរយៈពេលចុងក្រោយនេះបទល្មើសឆបោកតាមប្រព័ន្ធបច្ចេកវិទ្យាកើនឡើងគួរឱ្យកត់សម្គាល់ប្រៀបធៀបទៅនឹងបទល្មើសផ្សេងទៀត ដែលបណ្តាលមកពី៖ ១. មធ្យោបាយនៃការប្រព្រឹត្តបទល្មើសមានភាពងាយស្រួលដោយគ្រាន់តែមានប្រព័ន្ធអ៊ីនធឺណិត និងឧបករណ៍អេឡិចត្រូនិចមួយចំនួន។ ២. ភាពចន្លោះប្រហោងនៃច្បាប់រវាងប្រទេសនីមួយៗ។ ៣. ការចំណាយដើមទុនតិចបានផលច្រើន។ ៤. ការផ្លាស់ប្ដូរទំនៀមទម្លាប់នៃការរស់នៅរបស់ប្រជាពលរដ្ឋ និងការធ្វើពាណិជ្ជកម្មផ្ទាល់ទៅជាការទំនាក់ទំនង និងការទូទាត់ប្រាក់តាមប្រព័ន្ធឌីជីថល និងរូបិយប័ណ្ណគ្រីបតូ (Crypto) ហើយយោងតាមទិន្នន័យ UNODC នៅឆ្នាំ២០២៣ ជនរងគ្រោះនៅតំបន់អាស៊ីបូព៌ា អាស៊ីអាគ្នេយ៍ និងតំបន់ដទៃទៀតបានបាត់បង់ប្រាក់ចន្លោះ ៨៨,៣ ទៅ១១៩,១ប៊ីលានដុល្លារអាម៉េរិក។

ឯកឧត្ដមអភិសន្ដិបណ្ឌិតបានបន្ដថា បើតាមរបាយការណ៍ INTERPOL បានបង្ហាញឱ្យឃើញថា ការបាត់បង់នៅទូទាំងពិភពលោកមានរហូតទៅដល់ ៤៤២ ប៊ីលានដុល្លារ ដោយសារតែបទល្មើសឆបោកតាមប្រព័ន្ធបច្ចេកវិទ្យានេះ ហើយបន្ថែមពីលើការបាត់បង់ថវិកា បទល្មើសនេះ ក៏ជាដើមចមធ្វើឱ្យមានការកើនឡើងនៃបទល្មើសផ្សេងៗទៀតដូចជា ការជួញដូរមនុស្ស ការធ្វើការដោយបង្ខំ និងការសម្អាតប្រាក់ ក្លាយជាបណ្ដាញអេកូឡូស៊ីនៃឧក្រិដ្ឋកម្មមួយ ដែលបង្កើតឱ្យមានជនរងគ្រោះ ២ប្រភេទ គឺជនរងគ្រោះដែលបានបាត់បង់ទ្រព្យសម្បត្តិ និងជនរងគ្រោះដែលត្រូវគេជួញដូរ កេងប្រវ័ញ្ចកម្លាំងពលកម្ម និងបង្ខំឱ្យធ្វើការឆបោក។ ឯកឧត្ដមរដ្ឋមន្រ្ដីបានគូសបញ្ជាក់ទៀតថា ដោយសារតែការវិវត្តយ៉ាងឆាប់រហ័ស និងទាំងទំហំព្រឹត្តិការណ៍ការយ៉ាងស្មុគស្មាញ បង្ហាញឱ្យឃើញថាគ្មានប្រទេសណាមួយអាចដោះស្រាយបញ្ហានេះបានដោយខ្លួនឯងនោះឡើយ ទាមទារឱ្យមានកិច្ចសហប្រតិបត្តិការអន្តរជាតិ និងការធ្វើសកម្មភាពរួមគ្នាជាបន្ទាន់ ដើម្បីទប់ស្កាត់ និងលុបបំបាត់បណ្ដាញនេះទាំងស្រុង ស្របតាមមូលបទ "រួមគ្នាឆ្ពោះទៅកាត់បន្ថយ និងបញ្ចប់ការឆបោកតាមប្រព័ន្ធបច្ចេកវិទ្យា" ។

ជាមួយគ្នានេះ ឯកឧត្ដមអភិសន្ដិបណ្ឌិតបានបន្ថែមថា ដើម្បីឆ្លើយតបទៅនឹងការគំរាមកំហែងបទល្មើសនេះ កម្ពុជា បានដាក់ចេញយុទ្ធនាការប្រយុទ្ធប្រឆាំងនឹងអំពើឆបោកតាមប្រព័ន្ធបច្ចេកវិទ្យា គឺជារបៀបវារៈអាទិភាពរបស់រាជរដ្ឋាភិបាល ដោយបានដាក់ចេញយន្តការជាបន្តបន្ទាប់ រួមមាន ការបង្កើតគណៈកម្មាធិការចំពោះកិច្ចប្រយុទ្ធប្រឆាំងនឹងអំពើឆបោកតាមប្រព័ន្ធបច្ចេកវិទ្យា ការដាក់ចេញក្របខ័ណ្ឌច្បាប់ លិខិតបទដ្ឋានគតិយុត្តិពាក់ព័ន្ធ ក្នុងការឆ្លើយតបទៅនឹងបទល្មើសមួយនេះ។

ក្នុងឱកាសនោះ ឯកឧត្តមអភិសន្តិបណ្ឌិត ស សុខា បានអះអាងផងដែរថា ក្រសួងមហាផ្ទៃកម្ពុជាក៏កំពុងសិក្សា ពិនិត្យលទ្ធភាពក្នុងការបង្កើតមជ្ឈមណ្ឌលជាតិប្រឆាំងនឹងអំពើឆបោកតាមប្រព័ន្ធបច្ចេកវិទ្យា ដើម្បីបង្កើនប្រសិទ្ធភាពក្នុងការដោះស្រាយករណីឆបោកតាមប្រព័ន្ធបច្ចេកវិទ្យានេះឱ្យទាន់ពេលវេលា ដោយការដាក់ចេញក្របខ័ណ្ឌច្បាប់ និងយន្តការទាំងអស់នេះ ដើម្បីទ្រទ្រង់សម្រេចឱ្យបាននូវការប្ដេជ្ញាចិត្តផ្នែកនយោបាយយ៉ាងម៉ឺងម៉ាត់របស់ប្រមុខរាជរដ្ឋាភិបាល គឺការបោសសម្អាតការឆបោកតាមប្រព័ន្ធបច្ចេកវិទ្យាឱ្យអស់ពីទឹកដីកម្ពុជា និងមិនឱ្យបទល្មើសនេះកើតឡើងសារជាថ្មីម្តងទៀតឡើយ៕

ដោយ៖ ចាន់ សុភឿន