AKP ភ្នំពេញ ថ្ងៃទី២២ ខែកញ្ញា ឆ្នាំ២០២៦ -- រដ្ឋមន្ត្រីការបរទេសចិនលោក វ៉ាង យី (Wang Yi) បាននិយាយកាលពីថ្ងៃចន្ទថា ការពង្រឹងកិច្ចសហប្រតិបត្តិការផ្តល់ផលប្រយោជន៍ទៅវិញទៅមករវាងចិន និងអាល្លឺម៉ង់បម្រើផលប្រយោជន៍របស់ភាគីទាំងពីរ និងជាជម្រើសដ៏ត្រឹមត្រូវសម្រាប់ទាំងពីរ។

នៅក្នុងការសន្ទនាតាមទូរស័ព្ទជាមួយរដ្ឋមន្ត្រីការបរទេសអាល្លឺម៉ង់ ចូហាន់ វ៉ាដេភូល (Johann Wadephul) លោក វ៉ាង ដែលជាសមាជិកការិយាល័យនយោបាយនៃគណៈកម្មាធិការមជ្ឈិមបក្សកុម្មុយនិស្តចិនបានអំពាវនាវឱ្យប្រទេសចិន និងអាល្លឺម៉ង់ បញ្ជូនសញ្ញាវិជ្ជមាននៃការរួមគ្នាលើកកម្ពស់ពហុភាគីនិយម និងពាណិជ្ជកម្មសេរី ជំរុញទំនុកចិត្តក្នុងការអភិវឌ្ឍទំនាក់ទំនងចិន-អាល្លឺម៉ង់ និងដើរតួនាទីស្ថាបនាក្នុងការអភិវឌ្ឍន៍ទំនាក់ទំនងចិន-សហភាពអឺរ៉ុប។

ដោយកត់សម្គាល់ថា ប្រទេសចិន និងអាល្លឺម៉ង់ គឺជាប្រទេសសេដ្ឋកិច្ចដ៏សំខាន់ក្នុងពិភពលោក និងជាដៃគូយុទ្ធសាស្ត្រគ្រប់ជ្រុងជ្រោយ លោក វ៉ាងបាននិយាយថា ចំពោះមុខឯកតោភាគីនិយម និងឌីហ្កុបលភាយនីយកម្មចាំបាច់ត្រូវភាគីទាំងពីរពង្រឹងទំនាក់ទំនងយុទ្ធសាស្ត្រ បង្កើនការជឿទុកចិត្តគ្នា និងពង្រឹងកិច្ចសហប្រតិបត្តិការជាក់ស្តែង។

លោក វ៉ាង បាននិយាយថា ភាគីទាំងពីរគួរតែពេញចិត្តចំពោះវឌ្ឍនភាពដែលសម្រេចបានរហូតមកដល់ពេលនេះ ជំរុញកិច្ចសហប្រតិបត្តិការចិន-អាល្លឺម៉ង់ឱ្យកាន់តែស៊ីជម្រៅ និងរឹងមាំជាងមុន ហើយបន្តបង្កើតលទ្ធផលថ្មីបន្ថែមទៀត។

លោក វ៉ាង ក៏បានសម្តែងក្តីសង្ឃឹមថា ប្រទេសអាល្លឺម៉ង់នឹងរក្សានូវវិធីសាស្រ្តសមហេតុផល និងជាក់ស្តែង ដើរតួនាទីជាវិជ្ជមាននៅក្នុងសហភាពអឺរ៉ុប និងជួយលើកកម្ពស់សហភាពអឺរ៉ុប ក្នុងការលើកស្ទួយពាណិជ្ជកម្មសេរីច្រានចោលការគាំពារនិយម និងបន្តដើរលើផ្លូវត្រូវនៃការបើកចំហ កិច្ចសហប្រតិបត្តិការ ការសន្ទនា និងការពិគ្រោះយោបល់។

ចំណែកឯលោក វ៉ាដេភូល បាននិយាយថា ទំនាក់ទំនងអាឡឺម៉ង់ និងចិនបានរក្សាសន្ទុះនៃការអភិវឌ្ឍយ៉ាងរឹងមាំក្នុងប៉ុន្មានឆ្នាំថ្មីៗនេះ។

លោក វ៉ាដេភូល បាននិយាយថា ប្រទេសអាឡឺម៉ង់ទន្ទឹងរង់ចាំការពង្រឹងបន្ថែមទៀតនូវការផ្លាស់ប្តូរកម្រិតខ្ពស់ជាមួយប្រទេសចិន ដោយរៀបចំការពិគ្រោះយោបល់អន្តររដ្ឋាភិបាលអាល្លឺម៉ង់-ចិន ការពង្រឹងកិច្ចសហប្រតិបត្តិការជាក់ស្តែងក្នុងវិស័យដូចជាពាណិជ្ជកម្ម និងសេដ្ឋកិច្ច និងបន្តជំរុញទំនាក់ទំនងទ្វេភាគី៕

ដោយ៖ មូល មិនា (ប្រភព៖ ភីបផលដេលី)