AKP កំពង់ធំ ថ្ងៃទី១៩ ខែកញ្ញា ឆ្នាំ២០២៧-- ឯកឧត្តម លៀង ពេជ្រ សមាជិកក្រុមប្រឹក្សាខេត្តពោធិ៍សាត់ និងជាប្រធានក្រុមប្រឹក្សាភិបាល នៃវិទ្យាស្ថានវិទ្យាសាស្រ្តគ្រប់គ្រង និងសេដ្ឋកិច្ច,លោក ជា វ៉ាន់ចាន់អភិបាលរង នៃគណៈអភិបាលខេត្ត និងជាប្រធានសហភាពសហព័ន្ធយុវជនកម្ពុជា ខេត្តកំពង់ធំ,លោក ហាន កុសល អភិបាលរង នៃគណៈអភិបាលខេត្ត និងជាសមាជិកគណៈកម្មាធិការ សហភាពសហព័ន្ធយុវជនកម្ពុជាថ្នាក់កណ្ដាល បានអញ្ជើញបើកបវេទនកាលជំនាន់ទី៣ ឆ្នាំសិក្សា២០២៦-២០២៧ នៅវិទ្យាស្ថានវិទ្យាសាស្ត្រគ្រប់គ្រង និងសេដ្ឋកិច្ច ខេត្តកំពង់ធំ ស្ថិតនៅភូមិព្រៃគុយ ឃុំព្រៃគុយ ស្រុកកំពង់ស្វាយ ខេត្តកំពង់ធំ នាព្រឹកថ្ងៃសៅរ៍ ទី១៩ ខែកញ្ញា ឆ្នាំ២០២៦ និងមានការអញ្ជើញចូលរួមពីលោក ខា ស៊ីចាន់ អគ្គនាយកនៃវិទ្យាស្ថានវិទ្យាសាស្ត្រគ្រប់គ្រង និងសេដ្ឋកិច្ច លោក ឃាត់ វុទ្ធី នាយកសាខា លោកនាយករង  លោកសាស្ត្រាចារ្យ លោកគ្រូអ្នកគ្រូ និងនិស្សិតជាច្រើនរូប។

លោក ហាន កុសល អភិបាលរងនៃគណៈអភិបាលខេត្តកំពង់ធំ បានលើកឡើងថា នៅវិទ្យាស្ថានវិទ្យាសាស្ត្រគ្រប់គ្រង និងសេដ្ឋកិច្ច សាខាខេត្តកំពង់ធំមានចក្ខុវិស័យជាវិទ្យាស្ថានដែលផ្ដល់គុណភាពអប់រំប្រកបដោយឧត្តមភាព ដែលនិស្សិតគ្រប់គ្នាបញ្ចប់ការសិក្សា និងទទួលបានការងារធ្វើ។ ប្តេជ្ញាដើម្បីផ្ដល់ការអប់រំយ៉ាងទូលំទូលាយ លើកស្ទួយជីវភាពរស់នៅនិស្សិតក្នុងការកសាងប្រទេសជាតិ។ ជ្រើសរើសនិស្សិតឱ្យចូលរៀនប្រកបដោយប្រសិទ្ធភាព និងមានការគ្រប់គ្រងនិស្សិតបណ្ដុះបណ្ដាលនិស្សិតឱ្យមានចំណេះដឹង ជំនាញសមត្ថភាព និងផ្ដល់ឱកាសដល់និស្សិតឱ្យមានការងារធ្វើគ្រប់ៗគ្នា។\

លោក ជា វ៉ាន់ចាន់ បានថ្លែងថា អត្ថប្រយោជន៍ដែលយុវជនអាចទទួលបានតាមរយៈការសិក្សា និងការចូលរួមក្នុងកម្មវិធីអប់រំដែលផ្តល់ការណែនាំអំពីការងារ និងគោលដៅជីវិត។ ក្នុងនោះ រួមមានការទទួលបានការយល់ដឹងអំពីការងារ និងការរៀបចំគោលដៅជីវិត ទទួលបានវិញ្ញាបនបត្របញ្ជាក់ការសិក្សា ព្រមទាំងទទួលបានឱកាសក្នុងការស្វែងរកការងារ និងឱកាសផ្សេងៗដែលអាចជួយដល់ការអភិវឌ្ឍសមត្ថភាពរបស់ខ្លួន។ អត្ថប្រយោជន៍ពិសេសមួយដែលយុវជនអាចទទួលបាន គឺឱកាសអាហារូបករណ៍១០០% ពីវិទ្យាស្ថានវិទ្យាសាស្ត្រគ្រប់គ្រង និងសេដ្ឋកិច្ចខេត្តកំពង់ធំ ព្រមទាំងអត្ថប្រយោជន៍ និងឱកាសផ្សេងៗទៀតដែលពាក់ព័ន្ធនឹងការសិក្សា និងការងារ។

ឯកឧត្តម លៀង ពេជ្រ សមាជិកក្រុមប្រឹក្សាខេត្តពោធិ៍សាត់ និងជាប្រធានក្រុមប្រឹក្សាភិបាលនៃវិទ្យាស្ថានគ្រប់គ្រង និងសេដ្ឋកិច្ច បានចាត់ទុកពិធីបើកបវេស្សនកាលជំនាន់ទី៣ ឆ្នាំសិក្សា២០២៦-២០២៧ ជាឱកាសពិសេសសម្រាប់ប្អូនៗដែលទើបបញ្ចប់ថ្នាក់ទី១២ ប៉ុន្តែមិនទាន់មានគោលដៅច្បាស់លាស់ ដើម្បីទទួលបានព័ត៌មាន និងការណែនាំដែលអាចជួយឱ្យពួកគេធ្វើការសម្រេចចិត្តបានកាន់តែច្បាស់លាស់លើការសិក្សា និងអាជីពនាពេលអនាគត។ ចូលរួមជួយបង្កើនការយល់ដឹងរបស់យុវជនអំពីសារៈសំខាន់នៃការកំណត់គោលដៅជីវិត ការអភិវឌ្ឍសមត្ថភាព និងការត្រៀមខ្លួនសម្រាប់ឱកាសការងារនាពេលខាងមុខ។

សូមបញ្ជាក់ថា ទីតាំងគោលដៅរបស់វិទ្យាស្ថានវិទ្យាសាស្ត្រ និងសេដ្ឋកិច្ច(IMSE )មាន៣គឺ÷ ១.ទីតាំងគោលដៅខេត្តពោធិ៍សាត់ សាខាទី២ ខេត្តកំពង់ធំ និងសាខាទី៣ ខេត្តសៀមរាប។ សម្រាប់វិទ្យាស្ថានវិទ្យាសាស្ត្រ និងសេដ្ឋកិច្ចខេត្តកំពង់ធំ មានលោកគ្រូអ្នកគ្រូចំនួន១៦នាក់ និងសិស្ស-និស្សិតចំនួន១៤០នាក់៕

ដោយ ស៊ុម វណ្ណា