AKP ភ្នំពេញ ថ្ងៃទី១២ ខែកញ្ញា ឆ្នាំ២០២៦–

ក្រសួងមហាផ្ទៃ នៃរាជរដ្ឋាភិបាលកម្ពុជាបានឱ្យដឹងថា គិតត្រឹមថ្ងៃទី១២ ខែកញ្ញា ឆ្នាំ២០២៦នេះនៅមានប្រជាពលរដ្ឋចំនួន ១៨.៦៨៨នាក់ទៀត (ក្នុងនោះមានស្ត្រី ៩.៤២៨នាក់ និងកុមារ ៦.០៦៦នាក់) មិនទាន់អាចវិលត្រឡប់ទៅកាន់ភូមិករណ៍ និងលំនៅឋានដើមវិញ ដោយសារការរារាំងពីសំណាក់យោធាថៃដែលនេះជាការបញ្ជាក់ថា ភាគីថៃពុំបានអនុវត្តតាមកាតព្វកិច្ចនៃបទឈប់បាញ់ដែលបានចូលជាធរមាន កាលពីថ្ងៃទី២៧ ខែធ្នូ ឆ្នាំ២០២៥ ឱ្យបានពេញលេញ និងស្មោះត្រង់ឡើយ។ ផ្ទុយទៅវិញ យោធាថៃបាននិងកំពុងបន្តរំលោភយ៉ាងធ្ងន់ធ្ងរលើអធិបតេយ្យភាព និងបូរណភាពទឹកដីកម្ពុជា តាមរយៈការកាន់កាប់ទីតាំងស៊ីវិល ការបំផ្លិចបំផ្លាញទ្រព្យសម្បត្តិពលរដ្ឋស៊ីវិល និងការរារាំងប្រជាពលរដ្ឋកម្ពុជាមិនឱ្យវិល
ត្រឡប់ទៅកាន់លំនៅឋានដើមវិញ។

ក្នុងសេចក្តីប្រកាសព័ត៌មានស្តីពីស្ថានភាពពលរដ្ឋភៀសសឹក និងផលប៉ះពាល់លើតំបន់ស៊ីវិលកម្ពុជា គិតមកត្រឹមព្រឹកថ្ងៃទី១២ ខែកញ្ញា ឆ្នាំ២០២៦ ក្រសួងមហាផ្ទៃ នៃរាជរដ្ឋាភិបាលកម្ពុជា បានសង្កត់ធ្ងន់ថា ការរារាំង និងការមិនអាចវិលត្រឡប់នេះ មិនមែនជាផលប៉ះពាល់ដោយអចេតនានៃជម្លោះនោះទេ ប៉ុន្តែជាលទ្ធផលផ្ទាល់នៃការបន្តកាន់កាប់ដោយខុសច្បាប់ពីសំណាក់យោធាថៃមកលើភូមិឋានស៊ីវិល និងការចូលកម្ទេចផ្ទះសំបែង ទ្រព្យសម្បត្តិពលរដ្ឋ បន្ទាប់ពីបទឈប់បាញ់បានចូលជាធរមាន។ សកម្មភាពទាំងនេះក៏បានរំលោភបំពានយ៉ាងធ្ងន់ធ្ងរលើអនុសញ្ញាទីក្រុងសឺណែវ ឆ្នាំ១៩៤៩ ដែលបានហាមឃាត់ដាច់ខាតការបណ្តេញចេញ ការផ្ទេរដោយបង្ខំ និងការជម្លៀសជនស៊ីវិលពីទឹកដីដែលត្រូវកាន់កាប់។

តាមរយៈសេចក្តីប្រកាសព័ត៌មាននាថ្ងៃនេះ ក្រសួងមហាផ្ទៃ នៃរាជរដ្ឋាភិបាលកម្ពុជា បានគូសបញ្ជាក់ជាថ្មីថា ផ្អែកតាមគោលការណ៍ច្បាប់អន្តរជាតិ «ដរាបណា អ្នកដែលកំពុងកាន់កាប់ខុសច្បាប់ ត្រូវបានតវ៉ាប្រឆាំងជានិច្ចដោយម្ចាស់ដែនដី ដរាបនោះអ្នកដែលកំពុងកាន់កាប់ដោយខុសច្បាប់នឹងមិនទទួលបានសិទ្ធិកាន់កាប់ស្ថាពរឡើយ។ ផ្ទុយទៅវិញ ដរាបណាម្ចាស់ដែនដីនៅតែប្រឆាំងតវ៉ាជានិច្ច ដរាបនោះ ខ្លួនមិនបាត់បង់សិទ្ធិដោយការផុតអាជ្ញាយុកាលឡើយ»។ ក្រសួងមហាផ្ទៃ សូមបញ្ជាក់ជំហរប្រឆាំងតវ៉ា និង ប្រកាសមិនទទួលស្គាល់ជាដាច់ខាតរាល់ការកែប្រែខ្សែព្រំដែនដោយឯកតោភាគី ឬដោយការប្រើប្រាស់កម្លាំង ទាំងក្នុងអតីតកាល បច្ចុប្បន្ន និងអនាគត ព្រមទាំងទទូចឱ្យភាគីថៃបង្ហាញសុច្ឆន្ទៈពិតប្រាកដក្នុងការចូលរួមអនុវត្តឱ្យបានពេញលេញនូវសេចក្តីប្រកាសរួមនៃកិច្ចប្រជុំពិសេស GBC ថ្ងៃទី២៧ ខែធ្នូ ឆ្នាំ២០២៥ ជាពិសេសវិលត្រឡប់មកពន្លឿនការងារវាស់វែងខណ្ឌសីមារបស់ JBC ផ្អែកលើផែនទី និងសន្ធិសញ្ញារវាងបារាំង-សៀម ព្រមទាំងឯកសារផ្លូវការដែលបានឯកភាពគ្នា ដើម្បីបង្កើតបាននូវព្រំដែនសន្តិភាព សហប្រតិបត្តិការ និងអភិវឌ្ឍន៍ជាអចិន្ត្រៃយ៍៕

ដោយ៖ ចាន់ សុភឿន (ប្រភព៖ ក្រសួងមហាផ្ទៃ)