AKP ភ្នំពេញ ថ្ងៃទី១០ ខែកញ្ញា ឆ្នាំ២០២៦--ក្លិបអ្នកកាសែតកម្ពុជារៀបចំបេសកម្មសម្រាប់អ្នកសារព័ត៌មានជាតិ អន្តរជាតិទៅកាន់តំបន់ប្រាសាទព្រះវិហារ និងតំបន់រងផលប៉ះពាល់ដោយសារយោធាបាញ់បំផ្លាញ។

ការចុះបេសកម្មផ្ទាល់របស់ក្រុមអ្នកសារ ព័ត៌មានជាតិ និងអន្តរជាតិជិត៥០នាក់ចាប់ពីថ្ងៃទី៩ដល់១១កញ្ញា ឆ្នាំ២០២៦
បន្ទាប់ពីជម្លោះប្រដាប់អាវុធនៅតាមតំបន់ព្រំដែនកម្ពុជា-ថៃ បានបង្កផលប៉ះពាល់យ៉ាងធ្ងន់ធ្ងរ ដល់សន្តិសុខ សុវត្ថិភាព ជីវភាពរស់នៅ និងសុខុមា លភាពរបស់ប្រជាពលរដ្ឋកម្ពុជានៅ តំបន់រងផលប៉ះពាល់។

ក្នុងបរិបទនេះ ការរាយការណ៍ព័ត៌មានដែលមានភាពត្រឹមត្រូវ មានប្រភពច្បាស់លាស់ និងភស្តុតាង ពិតជាមានសារៈសំខាន់ខ្លាំងណាស់ដើម្បីជួយឱ្យសាធារណជនជាតិ និង អន្តរជាតិយល់ដឹងអំពីស្ថានភាពជាក់ស្តែង និងផលវិបាកដែលកើតមានចំពោះប្រជាជន ស៊ីវិល និងបេតិកភណ្ឌវប្បធម៌។

ពាក់ព័ន្ធបេសកកម្ម​ទៅកាន់រមណីយ ដ្ឋានប្រាសាទព្រះវិហារលោក​ ពុយ​ គា​ ប្រធាន​ក្លិបអ្នកកាសែតកម្ពុជាបានបញ្ជាក់ថា៖"យើងមកទីនេះមិនមែនដើម្បីប្រាប់អ្នកសារព័ត៌មានថា ត្រូវសរសេរអ្វីទេ​ ឬគួរសរសេរអ្វីនោះទេ។ យើងមកទីនេះដើម្បីផ្តល់ឱកាសឱ្យអ្នកសារព័ត៌មានឃើញ ស្តាប់ សួរ ផ្ទៀងផ្ទាត់ ហើយបន្ទាប់មកសម្រេចចិត្តដោយវិជ្ជាជីវៈថា តើអ្វីគួរត្រូវរាយការណ៍។ យើងមកទីនេះ ដើម្បីស្វែងរកការពិត មិនមែនដើម្បីបង្កើតរឿងមិនពិតនោះទេ"។

លោកប្រធានក្លឹបថា៖យើងអាចការពារបេតិកភណ្ឌពិភពលោកដោយមោទនភាព ប៉ុន្តែត្រូវរាយការណ៍ដោយវិជ្ជាជីវៈ និងការទទួលខុសត្រូវ។ ព័ត៌មានល្អ មិនមែនជាព័ត៌មានដែលលឿន ហើយទាញអារម្មណ៍​ជាតិនិយមនោះទេ ប៉ុន្តែជាព័ត៌មានដែលមានភស្តុតាង និងឱ្យសាធារណជនជឿទុកចិត្ត។

លោកថាUNESCO បានសង្កត់ធ្ងន់ថា បេតិកភណ្ឌពិភពលោកគួរត្រូវបានការពារ និងអាចធ្វើជាឧបករណ៍សម្រាប់ ការសន្ទនា ការយោគយល់ និងសន្តិភាព មិនមែនជាឧបករណ៍សម្រាប់ជម្លោះឡើយ។
លោកប្រធានក្លឹបបានអះអាងថា បេសកកម្មព័ត៌មានរបស់យើងគឺ ទៅដល់ទីកន្លែងដើម្បីយល់ការពិត; និងរាយការណ៍ការពិតដល់សាធារណជន និងដើម្បីសន្តិភាព​។

ប្រាសាទព្រះវិហារ ដែលត្រូវបានចុះបញ្ជីជាបេតិកភណ្ឌ ពិភពលោករបស់អង្គការយូណេស្កូ ជាទីតាំងដ៏សំខាន់សម្រាប់ការធ្វើសេចក្តីរាយការណ៍ អំពីផលប៉ះពាល់នៃការវាយប្រហារពីទាហានថៃមកលើបេតិកភណ្ឌវប្បធម៌។

ក្លិបអ្នកកាសែតកម្ពុជា បានដឹកនាំអ្នកសារព័ត៌មានជាតិ និងអន្តរជាតិទៅបំពេញបេសកកម្មព័ត៌មាននៅខេត្ត ព្រះវិហារ និងតំបន់ប្រាសាទព្រះវិហារ ដើម្បីចុះពិនិត្យ និងប្រមូលព័ត៌មានពីទីតាំងជាក់ស្តែងនៃតំបន់ដែលរងផលប៉ះពាល់។ធ្វើរាយការណ៍អំពីការខូចខាតចំពោះហេដ្ឋារចនាសម្ព័ន្ធ ទ្រព្យសម្បត្តិ និងបេតិកភណ្ឌ វប្បធម៌។

ស្វែងយល់ពីផលប៉ះពាល់ទៅលើជីវភាព និងសុវត្ថិភាពរបស់ប្រជាពលរដ្ឋ។

ប្រមូលសក្ខីកម្ម និងសំឡេងរបស់ប្រជាពលរដ្ឋដែលរស់នៅក្នុងតំបន់រងផលប៉ះពាល់។

រាយការណ៍ពីហានិភ័យដែលបង្កឡើងដោយសំណល់ជាតិផ្ទុះ រួមមានគ្រាប់មិន ទាន់ផ្ទុះ និងសំណល់សង្គ្រាមផ្សេងៗ។
ផ្តល់ព័ត៌មានដែលមានប្រភពច្បាស់ លាស់ និងអាចផ្ទៀងផ្ទាត់បានដល់សាធារណ ជនជាតិ និងអន្តរជាតិ៕

ដោយ៖ប៊ុនរិទ្ធ