AKP កំពង់ចាម ថ្ងៃទី៩ ខែកញ្ញា ឆ្នាំ២០២៦--លោក ឃន ប្រុស អភិបាលរងខេត្តកំពង់ចាម បានជំរុញដល់អាជ្ញាធរគ្រប់លំដាប់ថ្នាក់របស់ស្រុកចំការលើទាំងអស់ ត្រូវបង្កើនការយកចិត្តទុកដាក់ខ្ពស់ក្នុងការធានាឱ្យបាននូវស្ថិរភាពសន្តិសុខសណ្តាប់ធ្នាប់សាធារណៈនៅក្នុងមូលដ្ឋានរបស់ខ្លួនឱ្យបានកាន់តែប្រសើរឡើង ពិសេសគឺការពង្រឹងការអនុវត្តគោលនយោបាយភូមិឃុំមានសុវត្ថិភាព ដែលជាគន្លឹះស្នូលក្នុងការអភិវឌ្ឍសេដ្ឋកិច្ចក្នុងមូលដ្ឋាន និងត្រូវខិតខំបម្រើសេវាសាធារណៈជូនប្រជាពលរដ្ឋឱ្យកាន់តែមានប្រសិទ្ធភាពខ្ពស់ សំដៅការជឿជាក់លើការដឹកនាំរបស់រាជរដ្ឋាភិបាលកម្ពុជា ដើម្បីឈានឆ្ពោះទៅកាន់បោះឆ្នោតនាពេលខាងមុខសម្រេចបានជោគជ័យ។

លោកអភិបាលរងខេត្តថ្លែងដូចនេះ ក្នុងពិធីប្រកាសចូលកាន់មុខតំណែងអភិបាលរង នៃគណៈអភិបាលស្រុកចំការលើ ខេត្តកំពង់ចាម នាព្រឹកថ្ងៃទី៩ ខែកញ្ញា ឆ្នាំ២០២៦នេះ។ យោងតាមប្រកាសលេខ ១០៦៩២ ស្ដីពីការតែងតាំងមន្ត្រីរាជការ លោក ទៀង ទូច ឋានន្តរសក្តិនាយក្រមការ ថ្នាក់លេខ៦ ត្រូវបានតែងតាំងជា អភិបាលរង នៃគណៈអភិបាលស្រុកចំការលើ។

លោក ឃន ប្រុស ក៏បានណែនាំដល់ លោក ទៀង ទូច ដែលត្រូវបានតែងតាំងជាអភិបាលរង នៃគណៈអភិបាលស្រុកចំការលើថ្មី រួមទាំងមន្ត្រីជាថ្នាក់ដឹកនាំ និងមន្ត្រីរាជការទាំងអស់ត្រូវចេះសាមគ្គីភាពផ្ទៃក្នុងដោយប្រកាន់ខ្ពស់នូវក្រមសីលធម៌វិជ្ជាជីវៈ ត្រូវខិតខំបម្រើផលប្រយោជន៍ជូនប្រជាពលរដ្ឋក្នុងមូលដ្ឋាន រួមគ្នាជំរុញការអភិវឌ្ឍមូលដ្ឋានឱ្យមានការរីកចម្រើនរីកចម្រើនជាលំដាប់ ទាំងផ្នែកសេដ្ឋកិច្ចសង្គម ក៏ដូចសេដ្ឋកិច្ចគ្រួសារឱ្យមានជីវភាពធូរធារ៕

ដោយ ឆាយ ម៉ុត